Təhsil Nazirliyinin kollegiyasında

Yeni qiymətləndirmə sistemi, nəticələr, problemlər və qarşıda duran vəzifələr geniş müzakirə olundu

Fevralın 9-da Azərbaycan Respublikası Təhsil Nazirliyi kollegiyasının növbəti iclası keçirildi. "Yeni qiymətləndirmə sistemi: nailiyyətlər, problemlər və qarşıda duran vəzifələr" mövzusunda məsələnin müzakirə olunduğu geniş iclasda kollegiya üzvləri ilə yanaşı, millət vəkilləri, nazirliyin şöbə müdirləri və struktur bölmələri rəhbərləri, Bakı Şəhəri üzrə Təhsil İdarəsinin məsul işçiləri, sınaq imtahanları keçirilən məktəblərin direktorları və imtahan rəhbərləri, KİV nümayəndələri iştirak edirdilər.

Təhsil naziri, kollegiyanın sədri Misir Mərdanov müzakirə olunan məsələ barədə  geniş məruzə etdi. Ekranda slaydların nümayişi vasitəsi ilə təqdim olunan məruzəsində nazir diqqəti öncə məsələnin vacibliyinə, aktuallığına yönəldərək bildirdi ki, uzun illər təhsilimizdə məqsədyönlü qiymətləndirmə siyasəti aparılmayıb. Yalnız qiymətləndirmə sistemi mövcud olub. Halbuki təhsil alanların nailiyyətlərinin düzgün qiymətləndirilməsi təhsilin keyfiyyətini təmin edən əsas amillərdəndir və bu işdə o, heç də təhsilin məzmunundan, müəllim amilindən az əhəmiyyət kəsb etmir.

Nazir son illərdə aparılan təhsil islahatlarında yeni qiymətləndirmə sisteminin tətbiqi istiqamətində xeyli iş görüldüyünü bildirdi, bütün bunları müzakirə etməyə ehtiyac duyulduğunu və bu məqsədlə də həmin məsələnin kollegiyaya çıxarıldığını söylədi.

Mövcud qiymətləndirmə sisteminin geniş təhlilini verən nazir qeyd etdi ki, bu sistem müəllimin subyektiv mülahizələrinə əsaslanır, şagirdi bir qayda olaraq, əzbərçiliyə və qiymət almaq xatirinə oxumağa təhrik edir; onun inkişafını sistemli şəkildə izləməyə imkan vermir; şagirdin təlim nəticələri lazımi səviyyədə əsaslandırılmır, o, daha artıq nailiyyətlər əldə etməyə həvəsləndirilmir. Təlim prosesində yalnız formal biliklər qiymətləndirilir, böyük əhəmiyyəti olan tətbiqi bacarıqlar və nailiyyətlər isə qiymətləndirmədən kənarda qalır.

Mövcud qiymətləndirmə inkişaf və təkmilləşdirməyə zəmin yaratmır, mexaniki qiymət yazmaqla məhdudlaşır, nəticələr təhlil olunmur, təhsilalanın biliyinin ona verilən qiymətə nə dərəcədə uyğun olub-olmamasını müəyyənləşdirmək mümkün olmur.

Bütün təhsil pillələrində (ümumi orta, texniki peşə, orta ixtisas, ali) imtahanlar, bir qayda olaraq, formal keçirilir, mövcud standartlara uyğun bilik və bacarıqlara yiyələnib-yiyələnməməsindən asılı olmayaraq, hamıya təhsil haqqında sənəd verilir. Məhz bütün bunlara görə də Misir Mərdanov son illər aparılan təhsil islahatlarında yeni qiymətləndirmə sisteminin yaradılmasına xüsusi önəm verildiyini, bu məqsədlə "Azərbaycan Respublikasında ümumi təhsilin milli qiymətləndirmə Konsepsiyası"nın hazırlanaraq təsdiq üçün hökumətə təqdim olunduğunu söylədi. Bildirdi ki, həmin konsepsiyada məktəbdaxili, milli və beynəlxalq qiymətləndirmə sistemlərinin hazırlanması üzrə əsas prinsiplər, hər birinin məqsədləri, komponentləri göstərilməklə tətbiq mexanizmləri təqdim edilmiş, zəruri fəaliyyətlər təsvir olunmuş, gözlənilən nəticələr proqnozlaşdırılmışdır.

Sonra təhsil naziri yeni qiymətləndirmə sisteminin modeli ilə kollegiya iştirakçılarını tanış etdi, bu sistemin üç mühüm istiqaməti olan məktəbdaxili qiymətləndirmə, milli qiymətləndirmə və beynəlxalq qiymətləndirmə barədə geniş məlumat verdi. Qeyd etdi ki, yeni sistemdə şagird nailiyyətlərinə kompleks yanaşma, müasir qiymətləndirmə üsul və vasitələrinin, imtahan modellərinin tətbiqi nəzərdə tutulur.

Məruzə-təqdimatda hər üç istiqamətin mahiyyəti, məzmunu barədə də məlumat verildi. Qeyd olundu ki, məktəbdaxili qiymətləndirmə 3 komponentdən ibarətdir. Onların birincisi olan şagird irəliləyişlərinin monitorinqi müntəzəm, davamlı aparılan təsviri qiymətləndirməni (indiki cari qiymətləndirmədən fərqli olaraq, bu zaman şagirdin nailiyyətləri təhlil olunur, ona daha yaxşı nailiyyətlər əldə etməyin yolları göstərilir), bəhs və bölmələr üzrə test vasitəsilə qiymətləndirməni və test vasitəsilə yarımillik qiymətləndirməni əhatə edir.

Şagird irəliləyişlərinin monitorinqi məktəb səviyyəsində müəllimlər tərəfindən həyata keçirilir. Bu mərhələdə şagirdlərin nailiyyətləri formativ (müntəzəm, davamlı), mikrosummativ (bəhs və bölmələr üzrə) və makrosummativ (yarımilliklər üzrə) formada qiymətləndirilir.

İkinci komponent olan kurrikulum üzrə qiymətləndirmə şagirdin təlim nəticələrinin müvafiq məzmun standartlarına uyğunluğunu müəyyənləşdirmək üçün aparılır. Nəzərdə tutulur ki, I siniflərdə yeni kurrikulum tətbiq edildikdən sonra dərs ilinin sonunda qiymətləndirmə aparılacaq və zəruri olarsa, kurrikulumda təkmilləşdirilməli sahələr müəyyənləşdiriləcək.

Məktəbdaxili qiymətləndirmənin üçüncü komponenti olan təhsil pillələri üzrə buraxılış imtahanları isə mərkəzləşmiş qaydada aparılan imtahanlar formasında həyata keçirilir, müvafiq təhsil sənədi verilməsi ilə başa çatır.

Misir Mərdanov hər üç komponent üzrə son illər görülmüş işlər, aparılmış eksperimentlər və əldə olunmuş uğurlar barədə də kollegiya iştirakçılarına geniş məlumat verdi. Bildirdi ki, yaxın gələcəkdə məktəbdaxili qiymətləndirmənin köklü şəkildə dəyişdirilməsi, mövcud gündəlik qiymətləndirmənin aradan qaldırılması zəruri vəzifə kimi qarşıya qoyulub. Bununla əlaqədar, 2006-2007-ci dərs ilində şagird nailiyyətlərinin tədris vahidləri (bəhs və bölmələr) üzrə test yoxlamaları əsasında qiymətləndirilməsi 4 pilot məktəbində ("İntellekt" liseyi, Elitar gimnaziya, Sumqayıt şəhər 18 nömrəli məktəb və Abşeron rayonu Novxanı kənd məktəbi) tətbiq edilmişdir. Bu proses V və VIII siniflərdə ana dili və riyaziyyat fənlərini əhatə etmiş həmin siniflərdə dərs deyən fənn müəllimləri treninqlərdən keçirilmiş, xüsusi formada sinif jurnalları hazırlanmışdır. Lakin ötən müddət ərzində eksperimentin gedişinin izlənilmədiyini, nəticələrin təhlil edilmədiyini, məktəblərə lazımi kömək göstərilmədiyini deyən Misir Mərdanov nazirliyin müvafiq şöbələrinə eksperimentin tətbiqi vəziyyətini ciddi araşdırmağı, təhlil etməyi və təkliflər hazırlamağı tapşırdı.

Milli qiymətləndirmə barədə danışan nazir dedi ki, o, təhsil prosesinin təşkili, planlaşdırılması, aparıldığı şərait haqqında toplanmış məlumatlar vasitəsilə kurrikulumun keyfiyyətini və təhsil sistemində baş verən dəyişiklikləri dəyərləndirmək məqsədilə ümumi orta təhsilin bir pilləsindən digərinə keçid mərhələsində, 4-5 ildən bir həyata keçirilir.

Milli qiymətləndirmə sahəsində təcrübə əldə etmək və təşkilati prosedurları sınaqdan keçirmək məqsədilə 2006-cı ilin aprel-may aylarında ana dili və riyaziyyat fənləri üzrə ölkənin 170 ümumtəhsil məktəbinin 8000 nəfər IV və IX sinif şagirdini əhatə edən qiymətləndirmə aparılmış, nəticələr yeni kurrikulum hazırlığında nəzərə alınmışdır.

Nəzərdə tutulur ki, yeni kurrikulum tətbiq edildikdən sonra 2012-ci ildə ölkənin bütün məktəblərinin IV və IX siniflərində milli qiymətləndirmə aparılsın.

Məruzə-təqdimatda qeyd olundu ki, ölkəni təmsil edən şagirdlərin təlim göstəriciləri əsasında təhsilin vəziyyəti barədə təsəvvür əldə etmək, müvafiq məlumatları təhlil etməklə problemləri aşkara çıxarmaq, onların həlli yollarını müəyyənləşdirmək, perspektiv inkişaf istiqamətlərini proqnozlaşdırmaq və vəziyyəti digər ölkələrlə müqayisə etmək məqsədilə beynəlxalq qiymətləndirmə aparılır. Belə bir qiymətləndirmə 2006-cı ildə beynəlxalq PİSA təşkilatı tərəfindən ana dili, riyaziyyat və təbiət fənləri üzrə aparılmış və o 72 ümumtəhsil məktəbinin 15 yaşlı 6500 şagirdini əhatə etmişdir. Riyaziyyatdan nəzəri qabiliyyətlər üzrə reytinq cədvəlində Azərbaycan şagirdləri iştirakçı 57 ölkə arasında 4-cü, tətbiqi qabiliyyətlərə görə isə 32-ci yeri tutmuşdur. Oxu və təbiət fənləri üzrə qabiliyyət göstəricilərinə görə ölkəmiz müvafiq olaraq 54 və 55-ci olmuşdur. Hazırda qiymətləndirmənin nəticələri təhlil olunur. Təhlil əsasında Təhsil Nazirliyi, ehtiyac yaranarsa, kurrikulumların tətbiqi, müəllim hazırlığı və təlim texnologiyaları sahəsində dəyişikliklər etməyi planlaşdırır.

Nazir kollegiyada orta təhsil kursu üzrə mərkəzləşdirilmiş şəkildə keçirilən buraxılış imtahanlarından da danışdı, XI siniflərdə tətbiq olunan bu yeniliyi məktəbdaxili qiymətləndirmənin təkmilləşdirilməsi istiqamətində atılmış ən mühüm addım adlandırdı. Bildirdi ki, 2005-2006-cı dərs ilində İmişli və Bakı şəhərinin Xətai rayonlarının ümumtəhsil məktəblərində tətbiq olunmaqla başlanan bu eksperimentə 2006-2007-ci dərs ilində nazirliyin tabeliyində olan lisey və gimnaziyalar, Bakı şəhərinin Xətai və Səbail rayonlarının, Sumqayıt şəhərinin, İmişli rayonunun ümumtəhsil məktəbləri də qoşulmuşdur.

Sonra ötən tədris ilində mərkəzləşdirilmiş qaydada keçirilmiş buraxılış imtahanlarının ümumi nəticələrini əks etdirən cədvəl iclas iştirakçılarının diqqətinə çatdırıldı. Nazir imtahanlarda iştirak edən 11866 XI sinif şagirdindən 10865-nin, yəni 91,56 faizinin uğurlu nəticələr əldə etməsini müsbət qiymətləndirsə də 634 nəfər imtahana buraxılmayan, 1001 nəfər isə imtahandan "2" qiymət alan olmaqla bütövlükdə 1635 şagirdin attestat ala bilməməsini ciddi mənfi hal hesab etdi.

Orta təhsil kursu  üzrə mərkəzləşdirilmiş buraxılış imtahanlarının üstünlüklərindən danışan Misir Mərdanov bu sahədə atılmış addımların təhsilin keyfiyyətinin yaxşılaşdırılmasına, təhsilə münasibətdə şagirdlərin və müəllimlərin, məktəb rəhbərlərinin, eləcə də valideynlərin məsuliyyətinin artırılmasına, habelə neqativ halların aradan qaldırılmasına xidmət etdiyini, mərkəzləşdirilmiş imtahanların ictimaiyyətin, ilk növbədə, valideynlərin məktəbə münasibətini dəyişdiyini, məktəbin, müəllimin nüfuzunun yüksəlməsinə səbəb olduğunu vurğuladı. Bildirdi ki, dünya təcrübəsində imtahanlar təhsilalanların dövlət standartları səviyyəsində bilik və bacarıqlara yiyələnməsi barədə etibarlı mənbə rolunu oynayır, təhsil sistemində aparılacaq dəyişiklikləri əsaslandırır və bu səbəbdən yüksək statusa malikdir.

Beynəlxalq təcrübədə təhsilin hər bir pilləsinin nəticələri digər pilləyə keçiddə, o cümlədən ali təhsil pilləsinə qəbulda əsas amil kimi nəzərə alınır. Təhlil göstərir ki, ümumi orta təhsilin nəticələrinin nəzərə alınmaması bu pillədə təhsilin keyfiyyətinə mənfi təsir göstərir, məktəbin və müəllimin statusunun aşağı düşməsinə səbəb olur, şagirdlərin və müəllimlərin keyfiyyətli təhsilə stimullaşdırılmasına mane olur.

Dünyada ali məktəblərə qəbulun əsas parametrinin məhz orta məktəbin nəticələri olduğunu deyən nazir ABŞ-da ali məktəbə qəbul imtahanı zamanı toplanan balın ümumi balın yalnız 30 faizini təşkil etdiyini, digər 70 faizinin isə məhz məktəbin nəticələri, yəni şagirdin orta məktəb göstəriciləri, məktəbin şagird haqqında rəyi, şagirdin maraq və qabiliyyəti və sair nəzərə alınmaqla formalaşdığını söylədi.

Nazir dedi: - Bir çoxlarının düşündüyü kimi, orta təhsil pilləsinin nəticələrinin ali məktəblərə qəbulda nəzərə alınması heç də neqativ hallara gətirib çıxarmır, əksinə, bu nəticələr təhlillərin aparılmasına, problemlərin aşkara çıxarılmasına və təhsilin inkişafına yönəlmiş tədbirlərin həyata keçirilməsinə imkan yaradır.

Bu nəticələr həmçinin təhsilin inkişafında xüsusi əhəmiyyət kəsb edən aşağıdakı amilləri əhatə edir:

- məzunların mövcud təhsil standartları üzrə hazırlıq səviyyəsi müəyyən olunur;

- imtahanın nəticələri orta təhsilin məzmununda dəyişiklik aparılması üçün etibarlı mənbə rolunu oynayır;

- dərsliklərin məzmun baxımından təkmilləşdirilməsi üçün tutarlı əsas verir;

- təlim strategiyalarının mahiyyətcə yeniləşdirilməsinə şərait yaradır;

- növbəti illərdə şagird nailiyyətlərinin monitorinqinin istiqamətlərinin müəyyənləşdirilməsini şərtləndirir;

- müəllim əməyinin qiymətləndirilməsi üçün indikator rolunu oynayır;

- müəllim hazırlığının yaxın və uzaq perspektivlərinin müəyyənləşdirilməsinə zəmin yaradır.

Məruzə-təqdimatında təhsil naziri cari dərs ilində orta təhsil kursu üzrə mərkəzləşdirilmiş buraxılış imtahanlarının daha geniş miqyasda - nazirliyin tabeliyindəki lisey və gimnaziyaları, Bakı, Gəncə, Sumqayıt, Əli Bayramlı, Mingəçevir şəhərlərinin, Abşeron, İmişli, Ucar, İsmayıllı rayonlarının, həmin ərazilərdə yerləşən məcburi köçkün rayonlarının ümumtəhsil məktəblərini; bu bölgələrdə fəaliyyət göstərən peşə liseylərini əhatə etməklə keçiriləcəyini diqqətə çatdırıb, yekun qiymətin hesablanması qaydasındakı yenilik barədə məlumat verdi. Bildirdi ki, şagirdin yekun qiyməti hesablanarkən buraxılış imtahanının nəticələri ilə bərabər, onun X və XI siniflərdə aldığı illik qiymətlər və il ərzində keçirilən sınaq imtahanlarının nəticələri də nəzərə alınacaqdır.

Daha sonra Misir Mərdanov ötən il noyabrın 25-də orta təhsil kursu üzrə mərkəzləşdirilmiş qaydada keçirilmiş ilk yoxlama imtahanlarının nəticələri ilə kollegiya iştirakçılarını tanış etdi. Verilən məlumatdan aydın oldu ki, yoxlama imtahanları rayon və şəhərlərdə yaradılmış 90 mərkəzdə keçirilməklə 52096 şagirdi və 893 məktəbi əhatə  etmişdir.

90 nəfər imtahan rəhbəri, 90 nəfər də bina rəhbəri təyin edilmiş, 1827 otaqda 4000-dək çox nəzarətçi imtahan prosesində iştirak etmişdir.

Yoxlama imtahanlarında 11 məktəb 80-100, 118 məktəb 50-80, 281 məktəb 30-50, 361 məktəb 10-30, 75 məktəb 0-10 faiz arasında nəticə göstərib.47 məktəbin göstəricisi isə 0 olub. Nəticələrin müxtəlif yönlərdən aparılmış statistik təhlillərini   əks etdirən cədvəllər, o cümlədən imtahanların nəticələri üzrə tərtib edilmiş reytinq cədvəlində ilk 50 və son 100 yeri tutan məktəblərin siyahısı kollegiya iştirakçılarının diqqətinə çatdırıldı. Aydın oldu ki, yoxlama imtahanlarını verməli olan 52096 şagirddən 48682-i, yəni 93,4 faizi onlarda iştirak edib. 10.009 (20,6%) şagird 1 fəndən, 7114 (14,6 %) şagird 2 fəndən 14815 (30,4%) nəfər 3 və daha çox fəndən "2" qiymət alıb. Yoxlama imtahanlarında cəmi 16744 şagird müvəffəq qiymət alıb ki, bu da imtahan verənlərin 34,4 faizini təşkil edir.

Rayonlar (şəhərlər) üzrə imtahan nəticələrinə əsasən tərtib edilmiş reytinq cədvəlində ilk sırada ali məktəblərin nəzdindəki ümumtəhsil məktəbləri yer alıb. Onların müvəffəqiyyət faizi 65,2-dir. Təhsil Nazirliyinin tabeliyində olan lisey və gimnaziyalar 57,6 faizlə ikinci, Sumqayıt məktəbləri isə üçüncü (44,8%) nəticə göstəriblər. Reytinq cədvəlində sonuncu yerdə peşə liseyləri qərar tutublar. Onların orta göstəricisi 8,95 faizdir.

Nəticələrin aşağı olmasının əsas səbəbini yoxlama imtahanlarının ilk dəfə keçirilməsi ilə əlaqələndirən nazir fevralın sonlarında keçiriləcək ikinci yoxlama imtahanında onların yaxşı olacağına ümid etdiklərini bildirdi. Bununla belə, Misir Mərdanov 100-dən çox məktəbin sınaq imtahanlarında çox aşağı (0-10 faiz arasında) nəticə göstərməsini, 47 məktəbdən isə bir şagirdin belə müvəffəq qiymət ala bilməməsini çox ciddi nöqsan hesab etdi. Rayon təhsil şöbələrinin rəhbərlərinə belə məktəblərlə bağlı ciddi tədbirlər görməyi tapşırdı.

Sınaq imtahanlarının nəticələrinə əsasən tərtib olunmuş rayonlar üzrə reytinq cədvəli də kollegiya iştirakçılarına təqdim olundu. 32 şəhər və rayonu əhatə edən reytinq cədvəlində də ilk sırada ali məktəblərin nəzdindəki ümumtəhsil məktəbləri yer alıb. Bakının Səbail rayonu 59,3 faiz nəticə ilə ikinci, Təhsil Nazirliyinin tabeliyindəki lisey və gimnaziyalar isə 57,6 faizlə üçüncü yerdə qərar tutublar. Bu reytinq cədvəlində də peşə liseyləri sonuncu yerdədir. Peşə liseylərinin nəticələrinin çox pis olduğunu deyən nazir belə davam edərsə, onlardan orta təhsilin götürülməsi barədə fikirləşmək məcburiyyəti qarşısında qalacaqlarını bildirdi.

Sonra təhsil naziri reytinq cədvəlində ilk 50 yeri tutan məktəblərin nəticələri ilə kollegiya iştirakçılarını tanış etdi. Məlum oldu ki, onların hamısı 60 faizdən yüksək nəticə göstərib. Siyahıda ilk yerlərdə isə Sumqayıt Təbiət Texniki Elmləri liseyi və Cəbrayıl rayonundakı Xələfli kənd orta məktəbinin adıdır. Hər iki təhsil müəssisəsinin XI sinif şagirdləri bütün fənlərdən müsbət qiymətlər alaraq 100 faizlik nəticə göstərmişlər.

Kollegiya iştirakçıları reytinq cədvəlində son 100 yeri tutmuş məktəblərin göstəriciləri ilə də tanış oldular. Bu sırada Bakı şəhərinin bəzi məktəblərinin də yer alması mənfi qiymətləndirildi.

Nazir rayon təhsil şöbələrinin və məktəblərin rəhbərlərinin bütün bunlardan nəticə çıxarmalı olduqlarını vurğuladı.

İclasda nümayiş etdirilən başqa bir cədvəldə diqqət yoxlama imtahanlarında iştirak etməyən və siyahılardan əlavə gələn şagirdlərin sayına cəlb edildi. Məlum oldu ki, məktəblərin verdikləri siyahılarda adı olan 2462 şagird imtahanda iştirak etməyib. İmtahanlarda iştirak edən 268 şagirdin adı isə nazirliyə göndərilmiş siyahılara düşməyib. Nazir bunu da xoşagəlməz hal adlandırdı. Bəzi məktəb direktorlarını şagirdlərinin sayını dəqiq bilməməkdə günahlandırdı.

Məruzə-təqdimatda yoxlama imtahanlarında qeydə alınmış ciddi problemlərdən də söz açıldı. Bildirildi ki, ayrı-ayrı imtahan mərkəzlərində nəzarətçilərin öz işinə etinasız yanaşması üzündən şagirdlərin bir-birinə kömək etməyə cəhd göstərməsi, cavab kartlarında ağ ştrixlə düzəlişlərin aparılması, adları siyahıda olmayan şagirdlərin yoxlama imtahanında iştirakının təmin edilməsi, sual kitabçalarının şagirdlərə siyahıdakı variantlar üzrə paylanmaması, imtahan materiallarının az verilməsi, otaqda 30 yer olduğu halda, 60 şagirdə həmin otağın nömrəsinin verilməsi, siyahılarda variantın rəqəmlə göstərilməsi, bəzi şagirdlərdə hazır cavabların aşkar edilməsi, bir sıra otaqlarda imtahanların 1 nəzarətçi ilə keçirilməsi və s. kimi çatışmazlıqlar, problemlər aşkar olunmuşdur. Bütün bunlarla yanaşı, nazir yoxlama imtahanlarında bir sıra ümumi problemlərin də müşahidə olunduğunu dedi. Buna misal kimi siyahılarda şagirdlərin adlarında, yerləşdirilməsində, kodlaşdırılmasında xeyli sayda qeyri-dəqiqliklər və səhvlərin olmasını, 268 şagirdin adının ümumiyyətlə siyahıya salınmamasını, xeyli sayda nəzarətçi müəllimlərin təyin olunduqları mərkəzlərə gəlməməsi və gecikməsini, bəzi nəzarətçilərin yaşlı olmaları və səhhəti ilə əlaqədar öz funksiyalarını yerinə yetirə bilməməsini, bir sıra nəzarətçilərin imtahanların keçirilməsi qaydalarına dair lazımi biliklərə malik olmamasını, öz vəzifə funksiyalarını yerinə yetirməməsini, mərkəzlər üzrə imtahan materiallarının qablaşdırılmasında nöqsanlara yol verilməsini, lazım olandan az sayda test kitabçalarının göndərilməsini, bəzi mərkəzlərə xarici dil üçün əlavələrin ümumiyyətlə verilməməsini, cavab kartlarının doldurulmasında xeyli sayda şagirdlərin səhvlərə yol verməsini, əksər nəzarətçilərin cavab kartlarının düzgün doldurulmasına nəzarət etməməsini, nəticədə çoxlu sayda cavab kartının korlanmasını, variantlar üzrə sual kitabçalarının şagirdlərə düzgün paylanmamasını, bəzi nəzarətçilərin bu işə məsuliyyətsiz yanaşmasını, bir sıra mərkəzlərdə şagird sayının çox olmasını, imtahan otaqlarının bir neçə mərtəbədə yerləşməsi səbəbindən imtahan rəhbərlərinin nəzarət imkanlarının zəif olmasını, bir sıra məktəb rəhbərlərinin üzərlərinə düşən vəzifələri yerinə yetirməməsi səbəbindən ümumilikdə 2462 şagirdin yoxlama imtahanında iştirak etməməsini, mərkəzləşdirilmiş imtahanlara hazırlıq və imtahanın keçirilməsi qaydaları barədə şagirdlərin təlimatlandırılması, cavab kartlarının düzgün doldurulması, yer və kodların düzgün verilməsi ilə bağlı məktəb rəhbərləri tərəfindən lazımi tədbirlərin həyata keçirilməməsini qeyd etdi.

Təhsil naziri məruzə-təqdimatında yanvarın 27-də Təhsil Nazirliyi tabeliyindəki lisey və gimnaziyaların IX siniflərində keçirilən mərkəzləşdirilmiş sınaq imtahanını da müsbət qiymətləndirib onun nəticələri ilə iclas iştirakçılarını tanış etdi. Nazir bu işi gələcəkdə də davam etdirəcəklərini vurğuladı.

Məruzə-təqdimatın sonunda hazırlanmış qərar layihəsi ilə kollegiya iştirakçıları tanış edildi. Nazir imtahanların təşkili və keçirilməsi prosesində iştirak edən bütün təhsil işçilərinə, xüsusən də məktəb rəhbərlərinə deyilənlərdən nəticə çıxarıb öz işlərinə daha məsuliyyətlə yanaşmağı, fevralın 24-də keçirilməsi nəzərdə tutulan növbəti yoxlama imtahanına daha ciddi hazırlaşmalarını tövsiyə etdi. Belə yoxlama imtahanlarının ali məktəblərdə də aparılmasını məqsədəuyğun sayan nazir bu təşəbbüsdə olmaq istəyənlərə Təhsil Nazirliyi tərəfindən müvafiq kömək göstəriləcəyini söylədi.

Kollegiyada məruzə-təqdimatdakı bəzi məqamlara aydınlıq gətirilməsi üçün təhsil nazirinə suallar ünvanlandı, çıxışlar oldu. çıxış üçün söz alan Gəncə Şəhər Təhsil İdarəsinin müdiri Mahal  Əliyev, BDU-nun rektoru, millət vəkili, akademik Abel Məhərrəmov, Milli Məclisin üzvü, BDU-nun kafedra müdiri Bəxtiyar Əliyev, Bakıdakı 20 nömrəli məktəb-liseyin direktoru Əkbər Qocayev, Abşeron Rayon Təhsil Şöbəsinin müdiri Nadir Ağayev, Beynəlxalq Təhsil Kompleksinin baş direktoru Sara Xanlarova  və başqaları müzakirə olunan məsələyə tam aydınlıq gətirən, geniş təhlilə əsaslanan məruzəni yüksək qiymətləndirərək bəzi məsələlərlə bağlı öz fikir və mülahizələrini bildirdilər, təkliflər irəli sürdülər.

Yusif ƏLİYEV