Uşaqlar qayğıdan razılıq etdilər

Dünyanın 131 ölkəsində 440 SOS Uşaq Kəndi var. 2000-ci ildə ulu öndər Heydər Əliyevin  təşəbbüsü ilə "SOS Uşaq Kəndləri - Azərbaycan" Assosiasiyası  yaradılıb. Elə o vaxtdan Sevil Əliyeva Assosiasiyanın fəxri prezidenti seçilib. "SOS Uşaq Kəndləri - Azərbaycan" Assosiasiyası imkanlı şəxslərin, xeyirxah insanların, şirkətlərin, ianələrin hesabına maliyyələşir. Assosiasiyanın Xətai rayon filialında müasir tipli, 14 ailə evində 100 uşaq məskunlaşıb. Buraya 6 aylığından 8 yaşına qədər kimsəsiz, valideyn himayəsindən məhrum olan uşaqlar götürülür.

Uşaqların bir neçəsi ilə görüşüb söhbət edirik.

- Adım Aydandır. 1999-cu ildə Balakən rayonunda anadan olmuşam. Bakı SOS Uşaq Kəndinə gəlişim belə yadımda qalıb: 5 il öncə atam mənə dedi ki, sən Bakı şəhərini tanımaq istəyirdin, odur ki, hazırlaş, gedək. Biz bura - SOS Uşaq Kəndinə gəldik. Atam dedi ki, sən burada xalalarla qal, mən də bir azdan qayıdacağam. Bir neçə gün darıxsam da, Lalə xalanın nəvazişi və uşaqlarla dostluğum sayəsində mən buranı çox istəməyə başladım. 2 il uşaq bağçasına getdim. İndi də Xətai rayonundakı 257 nömrəli orta məktəbin III sinfində oxuyuram. "4", "5" qiymətlər alıram. Arzum böyüyəndə həkim olmaqdır. Bir neçə dəfə atam və anamla görüşmüşəm.

Rəşidənin 7 yaşı var. O, buraya 6 aylığından gətirilib. Gözünü açıb bu evdə böyüyən bacı-qardaşlarını görüb. Rəşidə böyük bacısı Güneli daha çox istəyir.

Röya, Gülarə, Elvin, Elçin bacı-qardaşları Cəlilabad rayonundandırlar. Onlar SOS Uşaq Kəndi açılandan burada böyüyürlər. Onlar bu evdə tam qayğı ilə əhatə olunublar. Uşaqların atası Qazaxıstana qazanc dalınca getmiş, ananın dolanışıq vəziyyəti çətin olduğundan 4 uşağını SOS Uşaq Kəndinə gətirib.

Aytən 6 ildir ki, SOS Uşaq Kəndindədir. 257 nömrəli məktəbin VIII sinfində oxuyur. Hər iki valideyni olsa da, onlarla müntəzəm əlaqə saxlamaq istəmir. "Anam mənə dedi ki, evə qayıt, mən isə etiraz etdim. Ona görə ki, atam anamla bir yerdə yaşamır".

Aytən nəvaziş göstərdikləri üçün SOS Uşaq Kəndindəki ana və xalasından çox razıdır. O, kimya, Azərbaycan dili və tarix fənlərini dərindən öyrənmək istəyir. Arzusu rəssam olmaqdır. Yaxşı şəkillər çəkir. Vaxtı olanda ana və xalasına yemək hazırlamaqda kömək edir. Dostları isə Dilbər, Aişə, Anar və Elvindir. Aytən bildirdi ki, gələcəkdə ali təhsil alacaq və işləyəcəyi müəssisələrdə nümunəvi olmağa çalışacaq. Borclu olduğu SOS Uşaq Kəndinin adını uca tutacaq. Aytən onlara yaradılan şərait üçün hər kəsə minnətdardır.

Sifai SƏFƏROVA,

foto Fazil İDRİSOĞLUNUNDUR