Mikayıl Müşfiqin yubileyi qeyd edildi

Fevralın 13-də Bakıdakı 147 nömrəli texniki-humanitar liseyin akt zalında Azərbaycanın görkəmli şairi Mikayıl Müşfiqin anadan olmasının 100 illik yubileyi qeyd edildi.

Mərasimdə professor Nizami Cəfərov, yazıçı, professor Gülhüseyn Hüseynoğlu, Xətai Rayon İcra Hakimiyyətinin məsul işçisi Qüdrət Səfərov, Bakı Şəhəri üzrə Təhsil İdarəsinin böyük məsləhətçisi Firudin Abbasov, professor Məlikbaxış Babayev, məktəbin pedaqoji kollektivi, şagirdlər və digər qonaqlar iştirak edirdilər.

Toplantını giriş sözü ilə açan liseyin direktoru Həlimə Mehdiyeva yığıncaq iştirakçılarını salamlayaraq şairin qısa, lakin şərəfli ömür yolu keçdiyini, bu gün də xatirələrdə yaşadığını, qədirbilən xalqımız tərəfindən həmişə hörmətlə anıldığını qeyd etdi.

Mərasimdə öncə meydan liseyin şagirdlərinə verildi. Onlar M.Müşfiqin sözlərinə yazılmış mahnılar ifa etdilər, şeirlərindən nümunələr söylədilər. Şagirdlərin təqdim etdiyi bədii kompozisiya iştirakçılar tərəfindən alqışlarla qarşılandı.

M.Müşfiq poeziyasının araşdırıcısı və bilicisi, yazıçı Gülhüseyn Hüseynoğlu şairin həyat və yaradıcılığından kövrək duyğularla söz açdı. Vətəninin, xalqının xoşbəxtliyi uğrunda mübarizə apardığına görə 29 yaşında güllələnən Müşfiqin cəmi 12 il yaradıcılıqla məşğul olduğunu və milləti üçün misilsiz sənət inciləri qoyduğunu deyən G.Hüseynoğlu həmçinin M.Müşfiq haqqında aşıq Şəmşirdən və Mehdixan Vəkilovdan eşitdiyi xatirələri də mərasim iştirakçılarının diqqətinə çatdırdı.

AMEA-nın müxbir üzvü, Milli Məclisin Mədəniyyət məsələləri daimi komissiyasının sədri, Azərbaycan Atatürk Mərkəzinin rəhbəri, professor Nizami Cəfərov çıxış edərək dedi: - M.Müşfiq 12 il yaradıcılıq yolu keçsə də, bu az zaman ərzində əsrə bərabər, bu gün də aktuallığı ilə seçilən bədii-poetik əsərlər yaratmışdır. Dövrünün inqilabçı, mübariz şairi kimi tanınan Müşfiq bu gün belə dillərdən düşməyən bir sıra lirik şeirlərin, uşaq poemalarının müəllifi kimi sevilməkdədir. 1937-ci ildə həbs edilən M.Müşfiq 30 yaşı tamam olmamış "günah"larına görə güllələndi. Müşfiqin "günahı" Vətənini sevməsi, millətin tərəqqisi üçün çalışması, dövrünün eybəcərliklərini qorxmadan, mübariz şair kimi qələmə alması idi.

Mənim könlüm deyir ki,

Hələ bunlar nədir ki,

Böyük günlər, şanlı günlər, şən günlər,

Yoluna düşən günlər

Hələ qarşımızdadır!

- deyən şair məhz bu günü - Azərbaycanımızın müstəqilliyini, xalqımızın tərəqqisini görmək arzularıyla yaşayırdı.

Digər çıxış edənlər də M.Müşfiqin xalqın nəğməkar oğlu kimi sevildiyini, şeirlərinin dillər əzbəri olduğunu, millətin vətənpərvər oğlu kimi daim qəlblərdə yaşayacağını vurğuladılar.

Sonda liseyin direktoru Həlimə Mehdiyeva bu təhsil ocağında şair və mütəfəkkirlərin yubileylərinin keçirilməsinin ənənə halını aldığını söylədi, tədbirdə iştirak edən qonaqlara minnətdarlığını bildirdi.

Nizami MİRZƏ