"Ən yaxşı ümumtəhsil məktəbi" və "Ən yaxşı müəllim" müsabiqələrinə sənədlərin qəbulu martın 15-dək davam edəcək

Azərbaycan Respublikasının Prezidenti İlham Əliyevin təhsilə göstərdiyi diqqətin ən önəmli təzahürlərindən biri də 2007-ci il sentyabrın 4-də "Ən yaxşı ümumtəhsil məktəbi və ən yaxşı müəllim mükafatlarının təsis edilməsi haqqında" sərəncam imzalamasıdır. ötən müddət ərzində müsabiqələrin keçirilməsi istiqamətində bir sıra əhəmiyyətli işlər görülüb. Sərəncamdan irəli gələn vəzifələrlə əlaqədar respublikanın bütün rayon (şəhər) təhsil şöbələrinə təhsil naziri Misir Mərdanovun təlimati məktubu göndərilib. Təhsil Nazirliyinin əməkdaşları, yerli və beynəlxalq qeyri-hökumət təşkilatlarının nümayəndələrindən ibarət Təşkilat Komitəsi yaradılıb, müsabiqənin keçirilməsi qaydaları hazırlanaraq təsdiq olunub, təhsil ictimaiyyəti qaydalarda müəyyən edilmiş şərtlər və meyarlarla tanış edilib.

Hər iki nominasiya üzrə müsabiqənin 3 mərhələdə keçirilməsi nəzərdə tutulur. İlkin mərhələyə "Ən yaxşı ümumtəhsil məktəbi" və "Ən yaxşı müəllim" adını qazanmaq arzusunda olan namizədlərin sənədlərinin qeydiyyata alınması və müəyyənləşdirilmiş meyarlar əsasında seçimin aparılması daxildir. Seçim prosesində zəruri işlərin görülməsi məqsədilə hər iki müsabiqə üzrə ayrı-ayrı işçi qrupların yaradılması qərara alınıb.

Təhsil Nazirliyinin Şəhərlər üzrə ümumi təhsil və məktəbəqədər tərbiyə şöbəsinin baş məsləhətçisi,  "Ən yaxşı ümumtəhsil məktəbi" müsabiqəsinin məsul katibi Məhərrəm Səfərov hazırda iştirak üçün göndərilən sənədlərin qeydiyyata alınması üzrə iş aparıldığını dedi və müsabiqəyə 18 sənədin təqdim olunduğunu bildirdi. Bunlardan 3-ü Sumqayıt, 2-si Mingəçevir şəhərlərinin, 3-ü İsmayıllı, 3-ü Kürdəmir, hərəsindən biri olmaqla Qax, Ağdaş, Samux rayonlarının ümumtəhsil məktəbləridir. Bakı şəhərindən qeydiyyata alınan 4 ümumtəhsil müəssisəsi isə Təhsil Nazirliyinin tabeliyində olan T.İsmayılov adına "İntellekt" məktəb-liseyi,  "Tərəqqi" texniki-humanitar liseyi, Fizika-riyaziyyat və informatika təmayüllü lisey və S.Bəhlulzadə adına Xarici dillər təmayüllü gimnaziyadır.

Bu mərhələdəki  işin mexanizmi haqqında M.Səfərovun verdiyi məlumatdan aydın oldu ki, qaydaya əsasən, müsabiqəyə qatılmaq iddiasında olan məktəbin rəhbəri xüsusi formalı məktubla müvafiq təhsil şöbəsinə müraciət edir. Sənədlər araşdırılır və yalnız məktəbin fəaliyyətinin qoyulan şərtlərə uyğunluğu müəyyən edildikdən sonra Təşkilat Komitəsinə təqdim olunur və qeydiyyata alınır. "Ən yaxşı ümumtəhsil məktəbi" müsabiqəsində son 3 ildə təhsil müəssisəsinin məzunlarının ali məktəblərə qəbul faizi və qəbul imtahanlarında topladığı yüksək ballar, respublika və beynəlxalq səviyyəli olimpiadalarda, müsabiqə və yarışlarda şagirdlərin əldə etdiyi nailiyyətlər, pedaqoji və şagird kontingentinin ayrı-ayrı təşkilatların və şirkətlərin həyata keçirdiyi layihələrdə iştirakı, həmin məktəbdə Valideyn-Müəllim Assosiasiyasının yaradılması və fəaliyyəti, daxili intizam qaydalarına riayət olunmasının səviyyəsi və s. məsələlər həlledici amil rolunu oynayacaq.

 Kənd rayonları üzrə ümumi təhsil və məktəbəqədər tərbiyə şöbəsinin aparıcı məsləhətçisi, "Ən yaxşı müəllim" müsabiqəsinin məsul katibi Avaz Yusifovun verdiyi məlumata görə, indiyədək bu yarışlarda iştirak etmək üçün respublikanın müxtəlif bölgələrini təmsil edən 138 müəllim müraciət edib. Onların arasında Bakı, Sumqayıt, Əli Bayramlı və Şəki şəhərlərində pedaqoji fəaliyyət göstərən müəllimlər sayca daha çoxdur və bir neçə fənni - riyaziyyat (23 nəfər), xarici dil (21 nəfər), Azərbaycan dili və ədəbiyyatı (17 nəfər), fizika (14 nəfər) və  tarixi (13 nəfər) tədris edənlər, həmçinin ibtidai sinif müəllimləri (16 nəfər) üstünlük təşkil edir.  "Ən yaxşı müəllim" müsabiqəsində iştirak etmək arzusunda olan müəllimlər məktəblərdən fərqli olaraq Təşkilat Komitəsinə birbaşa müraciət etmək hüququna malikdirlər.  Müsabiqədə müəllimin təlim-tərbiyə prosesində qabaqcıl iş təcrübəsi ilə fərqlənməsi, kompüter və müasir təlim texnologiyalarından istifadə qabiliyyəti, şagirdlərinin ayrı-ayrı göstəricilər üzrə yüksək nəticələri əsas meyar kimi götürülür. "Ən yaxşı ümumtəhsil məktəbi" və "Ən yaxşı müəllim" müsabiqələrinə sənəd qəbulu bir aya yaxın müddətdir ki, başlayıb və təhsil naziri Misir Mərdanovun göstərişinə əsasən martın 15-dək davam edəcək. Digər mərhələlər üzrə zəruri tədbirlərin həyata keçirilməsi də nəzərdə tutulur.

Hicran ƏKBƏROVA