Bakıdakı 204 nömrəli məktəb beynəlxalq İnternet-təhsil layihəsinin qalibidir

2008-ci il fevral ayından etibarən Azərbaycanda ilk dəfə olaraq "İntel" və "Trans Telekom" (Rusiya) şirkətlərinin təşəbbüsü ilə "Letopisi.ru" İnternet-təhsil layihəsi keçirilib. Layihə ingilis, alman, fransız, Ukrayna, qazax, rus və Azərbaycan dillərində aparılıb.

Layihənin 1-ci mərhələsi qeydiyyata alınma mərhələsi olub. Həmin mərhələdə Rusiya Federasiyasının, Orta Asiya ölkələrinin, Ukrayna, Estoniya və başqa ölkələrdən ümumilikdə 1000-ə yaxın təhsil ocağı qeydiyyata alınmış, Azərbaycandan 14 məktəb qoşulmuşdu. Bunlar Bakı Kompüter Kolleci, Avropa liseyi, 23, 189, 7 nömrəli məktəblər, Sumqayıt şəhər təbiət təmayüllü gimnaziya və digərləri idi. Müsabiqədə şəhid Ə.Əliyev adına 204 nömrəli orta məktəb ("Bibioki" adlı komandası ilə) də qeydiyyata alınmışdı. Komandanın rəhbəri 204 nömrəli məktəbin biologiya müəllimi, "İntel. Gələcək üçün təhsil" proqramının təlimçisi Almaz Həsrətdir. 2-ci mərhələdə bir neçə yüz təhsil ocağı İnternetdə yaratdıqları layihə işlərinə və onların keyfiyyətinə görə seçilərək növbəti mərhələyə - finala keçid aldılar. Finalda Azərbaycandan yeganə olaraq 204 nömrəli məktəb iştirak edirdi.

3-cü mərhələ seçilmiş 300 intellektual məktəb arasında keçirilirdi. Artıq yarışma başa çatıb. "Məktəbin siması - 2008" təhsil layihəsində fəal iştirakına görə 204 nömrəli məktəb və onun "Bibioki" komandasının rəhbəri Almaz Həsrət fəxri fərmanlarla təltif edilib. Həmçinin məktəbin şagirdləri, komandanın kapitanı XI "J" sinif şagirdi Anar Həmidov, üzvləri Aygün Bağırova (IX "J"), Fərid Mikayılzadə (XI "B") və Orxan Rüstəmov (IX "J") da fəxri fərmanla təltif olunublar.

204 nömrəli məktəb layihələrin bir çoxunda 1-ci yerə layiq görülüb və diplomla, sertifikatlarla təltif olunub.

Bu yaxınlarda Almaz Həsrətin rəhbərliyi ilə "Bibioki" komandası 2 İnternet layihəsində də qalib çıxaraq 1-ci yerə layiq görülüb.

"Letopisi.ru" İnternet-təhsil layihəsinin təşkilatçılarının təşəbbüsü ilə bu ilin dekabrın 4-5-də Moskvada "XXI yüzildə nəyi və necə öyrənməli və öyrətməli" adlı elmi-praktik konfrans keçirilib. Bu beynəlxalq konfransda Azərbaycanı 204 nömrəli məktəb və onun müəllimi Almaz Həsrət təmsil edib.

Məktəbin kollektivi qazandıqları uğuru Azərbaycan təhsilinin, məktəbinin və şagirdlərinin uğuru hesab edir.

TAHİRƏ