Azərbaycan Dillər Universitetində İnformasiya resurs kompleksi açıldı

Azərbaycan Dillər Universitetində ölkəmizdə analoqu olmayan İnformasiya resurs kompleksi yaradılmışdır. Dekabrın 5-də kompleksin rəsmi açılışı olmuşdur. Bu münasibətlə düzənlənən mərasimdə bir sıra nazirliklərin, ali məktəblərin, ölkəmizdə fəaliyyət göstərən xarici dövlətlərin səfirliklərinin və beynəlxalq qurumların nümayəndələri, millət vəkilləri, ziyalılar, KİV əməkdaşları iştirak edirdilər.

Universitetin əsas binasında yerləşən İnformasiya resurs kompleksinin rəmzi açılışını bildirən qırmızı lent kəsildikdən sonra kompleksin məlumat-sorğu mərkəzində açılış mərasimi keçirildi.

Tədbir iştirakçılarını salamlayan Azərbaycan Dillər Universitetinin rektoru, millət vəkili, Milli Məclisin AŞPA-dakı nümayəndə heyətinin rəhbəri, professor Səməd Seyidov İnformasiya resurs kompleksinin açılışını universitetləri üçün tarixi əhəmiyyətli hadisə kimi dəyərləndirib kollektivlərinin bundan hədsiz sevinc hissi duyduğunu söylədi. Rektor kompleksin yaradılmasına mənəvi və maddi dəstək vermiş Azərbaycan Respublikasının Prezidenti cənab İlham Əliyevə ADU-nun professor-müəllim və tələbə heyəti adından təşəkkür etdi, ölkə başçısının göstərdiyi diqqət və qayğı sayəsində son bir neçə il ərzində universitetlərində köklü dəyişikliklərin baş verdiyini diqqətə çatdırdı.

Səməd Seyidov açılışına toplaşdıqları mərkəzin istər kitablarının, elektron materiallarının sayı, istərsə də kompüterlərin miqdarı və müasirliyi baxımından dünyanın aparıcı universitetlərindəki mərkəzlərdən heç də əskik olmadığını vurğulayaraq onun ölkəmizin təhsil sistemində aparılan məqsədyönlü islahatların nəticəsi olaraq meydana gəldiyini söylədi. Qeyd etdi ki, İnformasiya resurs kompleksinin yaradılmasında xarici partnyorları, xüsusən də ABŞ səfirliyi və Britaniya Şurası onlara yaxından kömək göstərib. ABŞ səfirliyi kompleksə daxil olan Amerika mərkəzinin yaradılması və müasir avadanlıqla, İKT ilə təchizi üçün qrant ayırıb, Britaniya Şurası isə özünün İçərişəhərdə yerləşən zəngin kitabxanasını ADU-ya köçürməklə mərkəzin xarici dillərdə olan ədəbiyyat fondunu və elektron resurslarını daha da zənginləşdirib. Bütün bunlara görə rektor hər iki qurumun ünvanına xüsusi minnətdarlığını ifadə etdi.

Rektor çıxışında bir fikri də vurğuladı ki, yaradılmasının ali məqsədi Azərbaycanın inkişafına, azərbaycançılıq ideyasının dünyada yayılmasına xidmət etmək olan mərkəzdən təkcə Dillər Universitetinin müəllim və tələbələri deyil, digər universitetlərin əməkdaşları və tələbələri, elmlə məşğul olanlar, bu istiqamətdə inkişaf etmək istəyənlər də istifadə edə biləcəklər.

Rektor çıxışının sonunda kompleksin açılışı münasibəti ilə rəhbərlik etdiyi ali məktəbin professor-müəllim və tələbə heyətini təbrik etdi.

Mərasimdə çıxış edən Azərbaycan Respublikasının rabitə və informasiya texnologiyaları naziri, akademik Əli Abbasov mərkəzin açılmasını Azərbaycan təhsil sisteminin inkişafı yolunda yeni bir hadisə adlandırdı. Nazir ölkə başçısı İlham Əliyevin Azərbaycanın hərtərəfli inkişafına böyük diqqət yetirdiyini, yeni cəmiyyət quruculuğunda təhsilin və yeni texnologiyaların prioritet istiqamətlər elan olunduğunu, hər iki sahənin inkişafına xüsusi önəm verildiyini diqqətə çatdırdı. Qeyd etdi ki, Azərbaycanın gələcək inkişafı, ölkəmizin bütün dünyada tutduğu yer, rəqabət qabiliyyətliliyi və bir çox digər vacib göstəricilər gələcək cəmiyyətimizin nə qədər intellektual potensiala malik və iqtisadiyyatımızın nə səviyyədə innovasiyalı, texnologiyayönümlü olmasından asılıdır. Əli Abbasov informasiya texnologiyalarının təhsilin keyfiyyətinin yüksəldilməsində də mühüm amillərdən biri hesab olunduğunu, məhz buna görə də ölkəmizin ümumtəhsil məktəblərinin kompüterləşdirilməsi istiqamətində iki böyük Dövlət Proqramının  həyata keçirildiyini, bütün ali məktəblərdə İKT-nin tətbiq olunduğunu bildirdi.

İnformasiya resurslarının yaradılmasının, informasiyaya kütləvi çıxışın təmin edilməsinin çox vacib məsələlər sayıldığını deyən nazir Azərbaycanda son illər bu istiqamətlərdə də müsbət addımlar atıldığını, ADU-da İnformasiya resurs kompleksinin açılmasını bu baxımdan sevindirici hal saydığını söylədi və toplaşanları bu münasibətlə təbrik etdi.

Açılış mərasimində iştirak edən təhsil nazirinin müavini Elmar Qasımov təbrik sözü söylədi. Təhsil naziri və nazirlik adından İnformasiya resurs kompleksinin açılışı münasibəti ilə tədbirə toplaşanları təbrik edən nazir müavini öncə resurs kompleksinin açılışını yüksək qiymətləndirib onun təkcə Dillər Universitetinin kollektivi üçün deyil, ümumilikdə ölkənin bütün təhsil sistemi üçün əhəmiyyətli hadisə hesab etdiyini bildirdi. İnformasiya resurs kompleksinin ali məktəblərimizin dünya universitetləri şəbəkəsinə çıxması yolunda dəyərli bir vasitə sayan E.Qasımov burada quraşdırılmış avadanlığın İKT-nin son nailiyyətlərini əks etdirdiyini diqqətə çatdırdı. İnformasiya resurs kompleksinin tələbələr qarşısında açdığı imkanlara toxunan E.Qasımov bildirdi ki, ölkə Prezidenti cənab İlham Əliyevin xüsusi sərəncamı ilə təsdiq olunmuş "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın uğurla həyata keçirilməsi üçün tələbələrimizin dünyanın ən nüfuzlu universitetlərinə qəbulu prosesinin sürətləndirilməsi vacibdir. Bunun üçünsə, ilk növbədə, bizim tələbələrimiz həmin universitetlərlə əlaqə yaratmalıdırlar. Kompleks bu işdə onlara geniş imkanlar açır.

İnformasiya resurs kompleksi habelə həyata keçirilməsi bilavasitə İKT-nin tətbiqindən asılı olan distant təhsilin reallaşdırılmasına da əlverişli şərait yaradır. Mərkəz, eyni zamanda Azərbaycan Dillər Universitetində təhsil alan 400-dən çox əcnəbi tələbənin öz ölkələri, ailələri ilə tez-tez əlaqə yaratması üçün də çox yaxşı vasitədir.

E.Qasımov qeyd etdi ki, İnformasiya resurs kompleksi təkcə informasiya mübadiləsi mərkəzi olmayıb, həm də maarifləndirici, təhsilverici bir mərkəzdir. Burada toplanmış zəngin kitab fondu və elektron resurslar mərkəzə bu funksiyasını da yüksək səviyyədə yerinə yetirməyə imkan verəcək.

Elmar Qasımov çıxışında Boloniya prosesinə ilkin qoşulmuş ali məktəblərdən olan ADU-da bu sahədə toplanmış təcrübədən, treninqlərin təşkili zamanı həmin təcrübədən istifadə edildiyindən, gələcəkdə belə kursların mərkəzdə təşkilinin məqsədəuyğunluğundan, son 4 ildə ölkəmizin təhsil sisteminə İKT-nin tətbiqi yönündə görülmüş işlər və onların uğurlu nəticələrindən də söz açdı.

Tədbirdə Britaniya Şurasının ölkə üzrə direktoru xanım Nikol lə Os de Lalüvye çıxış edib təmsil etdiyi qurum və onun fəaliyyəti, gələn ildən fəaliyyət istiqamətlərini dəyişəcəkləri barədə məlumat verdi, təbriklərə qoşulduğunu bildirdi.

Sonra İnformasiya resurs kompleksi haqqında təqdimatla onun direktoru Şəhla Xudiyeva çıxış etdi. Məlumatdan aydın oldu ki, İnformasiya resurs kompleksi Azərbaycan Respublikası ali təhsil müəssisələrinin Avropa təhsil sisteminə inteqrasiyasına yardım etmək, öz imkanları vasitəsi ilə Azərbaycan təhsil sistemini inkişaf etdirmək məqsədi ilə yaradılıb. Buradan irəli gələn strateji vəzifələrə milli səviyyədə qlobal informasiya cəmiyyəti quruculuğuna  yardımçı olan elm və mədəniyyətin informasiyalaşdırılması proseslərini himayə etmək və bu sahədə maarifləndirici fəaliyyət göstərmək, elm, təhsil və mədəniyyətin informasiyalaşdırılması, Azərbaycanın gələcəyi üçün yüksək səviyyəli mütəxəssis korpusunun yetişdirilməsinə kömək, Azərbaycanın ali məktəblərinin müəllim və tələbələrinin elmi tədqiqat işlərini himayə edən tədbirlər həyata keçirmək, Azərbaycanın elm, təhsil və mədəniyyətinin təbliği, mədəniyyətlərarası dialoq, mədəni irsin mühafizəsi, informasiya mədəniyyətinin inkişafı və fasiləsiz təhsil və s. daxildir. İki mərtəbədən ibarət böyük kompleksin tərkibinə 120-dən artıq İnternet şəbəkəli kompüter, geniş çeşidli kitabxana, 10 resurs mərkəzi daxildir. Burada habelə Britaniya Şurasının 3000-ə  qədər məlumat kolleksiyası, Amerikaya dair 4000 nəşr, amerikaşünaslığa dair 7500 adda və başqa elm sahələrinə dair tam mətnli elektron bazalar var. Kompleksin elektron kitabxanasında dünyanın nüfuzlu elmi jurnallarının tam mətnli bazası ilə tanış olmaq və istifadə etmək mümkündür. Kompleksdə müasir avadanlıq və yeni texnologiyalar vasitəsi ilə video-konfranslar keçirmək üçün imkan yaradılıb.

Şəhla Xudiyeva kompleksə daxil olan Amerika mərkəzi, innovasiya mərkəzi, iki folklor mərkəzi, elektron resurs mərkəzi, məlumat-sorğu mərkəzi, informasiya və kommunikasiya texnologiyaları mərkəzi, onların fəaliyyət istiqamətləri haqqında da qısa məlumat verdi.

Açılış mərasimi başa çatdıqdan sonra tədbir iştirakçıları kompleksi gəzib onun mərkəzlərinə baxdılar, deyilənlərlə əyani surətdə tanış oldular.

Sonda ABŞ-ın İndiana Universiteti ilə elektron bağlantı oldu.

Yusif ƏLİYEV,

foto Fazil

İDRİSOĞLUNUNDUR