Misir Mərdanov türkiyəli qonaqları qəbul etdi

Yanvarın 25-də təhsil naziri Misir Mərdanov Türkiyə Respublikası şəhərsalma və abadlaşdırma nazirinin müavini cənab Arif Korkmaz, Türkiyə Mühəndislər Birliyinin rəhbəri cənab İlyas Dəmirçi və bu birliyin digər üzvləri ilə görüşüb.

Nazir qonaqları səmimi salamlayaraq onları Təhsil Nazirliyində görməkdən məmnun olduğunu qeyd edib.

Görüşdə cənab Arif Korkmaz cari ildə Bakıda Türk Dünyası Memarlıq və Şəhərsalma üzrə II Qurultayın keçirilməsinin nəzərdə tutulduğunu bildirib. Qeyd edilib ki, müvafiq sahə üzrə I qurultay  2007-ci ilin aprelində Ankara şəhərində keçirilib. Eyni zamanda  qonaqlar ölkəmizdə olduqları müddətdə bir sıra dövlət qurumlarında görüşlər keçirəcəkləri barədə də məlumat veriblər.

Nazir də öz növbəsində bu təşəbbüsü alqışlayıb və qurultayın keçirilməsinə lazımi dəstək göstərməyə hazır olduğunu açıqlayıb. Nazir bildirib ki, tədbirin keçirilməsi ilə bağlı hər iki ölkə öz üzərinə düşən vəzifələri müəyyənləşdirməli, müvafiq iş aparılmalıdır.

Görüşdə qurultayın cari ilin iyununda 3 gün ərzində keçirilməsi, dəvət olunacaq qonaqlar və bu kimi məsələlər barədə söhbət aparılıb.

Azərbaycan Memarlıq və İnşaat Universitetinin rektoru Gülçöhrə Məmmədova görüşdə iştirak edib.

İordaniyalı qonaqlar Təhsil Nazirliyində

Yanvarın 29-da təhsil naziri Misir Mərdanov İordaniya Krallığı Təhsildə Texnologiyalar Mərkəzinin baş meneceri cənab Məhəmməd Daud Əl-Macali, İordaniya Təhsil Nazirliyi Təhsilin planlaşdırılması departamentinin direktoru xanım Muna Mutaman və "Təhsildə təşəbbüs" qeyri-hökumət təşkilatının rəhbəri xanım Luma Atalla ilə görüşüb.

öncə nazir qonaqları səmimi salamlayıb və onları Təhsil Nazirliyində görməkdən məmnunluq duyduğunu bildirib. İordaniya-Azərbaycan əlaqələrinin yaranmasından danışan nazir tarixi və milli dəyərlər baxımından yaxınlığın mövcudluğunu qeyd edib. Nazir İordaniyanı son illər dinamik inkişaf edən ölkə kimi dəyərləndirərək burada İKT sahəsində ciddi irəliləyişlərin olduğunu diqqətə çatdırıb.

Misir Mərdanov qonağa son illər ölkəmizin yüksək sürətlə inkişaf etməsi, müstəqil dövlətimizin qurucusu Heydər Əliyevin xidmətləri, hazırda bu siyasətin ölkə Prezidenti cənab İlham Əliyev tərəfindən uğurla davam etdirilməsi və müvafiq sahəyə göstərilən diqqət barədə qonağa məlumat verib. Eyni zamanda nazir Dağlıq Qarabağ münaqişəsi zamanı torpaqlarından didərgin düşən soydaşlarımız, dağıdılan təhsil müəssisələri və digər mövcud problemlərdən danışıb.

Azərbaycanda təhsil sisteminin strukturu, təhsildə aparılan yeniliklər, yeni məktəb tikintisi, həyata keçirilən proqramlar, şagirdlərin dərsliklərlə pulsuz təminatı, yeni Milli Kurrikulum sənədinin hazırlanmasından söz açan nazir, eyni zamanda Dünya Bankı ilə birgə aparılan islahatlar, orta məktəblərin kompüterlərlə təminatı, İnternet şəbəkəsinə qoşulması, bir sıra beynəlxalq təşkilatlarla əməkdaşlıq edildiyini də xüsusi vurğulayıb.

Təhsil naziri Misir Mərdanov görüşdə İordaniya-Azərbaycan arasında təhsil sahəsi üzrə gələcək əlaqələrin qurulması istiqamətində bir sıra təkliflər irəli sürüb. Nazir bu məqsədlə İordaniya məktəblərində İKT-nin tətbiqi üzrə təcrübənin öyrənilməsi, "Qardaşlaşmış məktəblər" layihəsi çərçivəsində müvafiq işlərin həyata keçirilməsi, müəllim, tələbə, şagird mübadiləsinin aparılması, müəyyən yarış, simpozium və olimpiadaların təşkili, habelə Bakıdakı orta məktəblərin birində ərəb dili tədrisi məsələsini qeyd edib.

Nazir qonaqların bu səfərinin hər iki ölkənin təhsil sahəsi arasında əməkdaşlığın daha səmərəli qurulmasına şərait yaradacağını vurğulayıb.

Cənab Məhəmməd Daud Əl-Macali səmimi qəbul üçün təşəkkür edib və öz ölkəsinin təhsil sistemi, "Biliklərə əsaslanan iqtisadiyyat", məktəblərin kompüterlərlə təminatı, elektron dərsliklərin hazırlanması, kurrikulum və İKT-nin məzmunu, təhsil sahəsi üzrə islahatların aparılması, bu sahə ilə bağlı problemlərin həllinə dair görülən işlər haqda nazirə məlumat verib.

Sonra "Təhsildə təşəbbüs" qeyri-hökumət təşkilatının rəhbəri xanım Luma Atalla rəhbərlik etdiyi təşkilatın məramı və fəaliyyətindən danışıb, bu təşkilatın öz ölkəsinin Təhsil Nazirliyinin həyata keçirdiyi tədbirlərdə yaxından iştirak etdiyini bildirib.

Səmimi və qarşılıqlı anlaşma şəraitində keçən görüşdə elmi tədqiqatların aparılması üzrə mübadilə, ali və peşə təhsili, habelə bu kimi məsələlər müzakirə olunub.