Ən yaxşı məktəblərimiz, ən yaxşı müəllimlərimiz

"Arzumuz müəssisəmizi ölkənin 50 ən yaxşı məktəbi sırasında görmək idi"

ölkəmizdə təhsilin daha da inkişaf etdirilməsi üçün Prezident İlham Əliyevin 4 sentyabr 2007-ci il tarixli sərəncamına əsasən, respublikada ilk dəfə olaraq "Ən yaxşı ümumtəhsil məktəbi" və "Ən yaxşı müəllim" müsabiqələri keçirilmişdir. Müsabiqə qabaqcıl məktəblərin üzə çıxarılmasında, işinin öhdəsindən layiqincə gələn savadlı müəllimlərin tanınmasında mühüm rol oynamış, məktəb rəhbərləri və pedaqoji kadrları daha yaxşı işləməyə sövq etmişdir.

 Uğurlarımız kifayət qədərdir. Yeri gəlmişkən qeyd edim ki, məktəbimiz 1998-ci və 2003-cü illərdə Bakı Şəhəri üzrə Təhsil İdarəsinin keçirdiyi "İlin ən yaxşı məktəbi" müsabiqələrində iştirak etmiş və qalib gəlmişdir. 2003-cü ildə isə məktəb rəhbəri kimi "İlin ən yaxşı məktəb direktoru" müsabiqəsinin qalibi olmuşam. 

Prezidentin sərəncamı ilə ölkə miqyasında keçirilən "Ən yaxşı ümumtəhsil məktəbi" müsabiqəsinin şərtlərinə görə, ən yaxşı məktəbin əlverişli iş şəraiti olmalı, təlimin müasir texnologiyalarından, fəal təlim üsullarından məqsədyönlü istifadə edilməli, məktəb rəhbərlik tərəfindən elmi şəkildə idarə olunmalı, məzunlarının bir çox parametrlərə görə göstəriciləri yüksək olmalıdır.

Rəhbərlik etdiyim təhsil ocağının göstəriciləri müsabiqənin şərtləri ilə üst-üstə düşdüyü üçün məktəbimizin pedaqoji şurasının qərarı ilə bu yarışda iştirak etməyi qarşıya məqsəd qoyduq. Müsabiqənin mərhələlərini uğurla başa vurduq. üçüncü mərhələdə məktəb direktoru kimi 10 dəqiqəlik çıxışım Təşkilat Komitəsi tərəfindən layiqincə qiymətləndirildi.

Müsabiqənin obyektiv keçirilməsindən razı qalmışıq. Arzumuz müəssisəmizi respublikanın 50 ən yaxşı məktəbi sırasında görmək idi. Bu günlər respublika Prezidentinin imzaladığı sərəncam ilə bu arzuya qovuşduq. Məktəbimiz "Ən yaxşı ümumtəhsil məktəbi" müsabiqəsinin qalibi oldu.

Aldığımız mükafatı fənn kabinetləri və laboratoriyalarımızın zənginləşdirilməsinə sərf edəcəyik.

Təhsilə göstərdiyi böyük qayğıya görə ölkə başçısı cənab İlham Əliyevə dərin minnətdarlığımızı bildirir və müsabiqənin şəffaf keçirilməsində əməyi olanlara təşəkkür edirik.

Nazim QASIMOV,

fizika-riyaziyyat elmləri namizədi, 70 nömrəli

pilot məktəb-liseyin direktoru

"Mükafatdan dərs vəsaitlərimin nəşrinə də sərf edəcəyəm"

Məlum həqiqətdir ki, Azərbaycan təhsil sistemi dünya təhsil sisteminə inteqrasiya edir. Bu da mövcud ictimai şəraitdən irəli gəlir. Azərbaycan müstəqillik qazandığı gündən digər sahələrdə olduğu kimi, təhsil sahəsində də böyük sıçrayışlı dəyişikliklər baş vermişdir. çünki müstəqil Azərbaycan dövləti öz gələcək qurucularını yetişdirməli idi.

Hələ ulu öndər Heydər Əliyev Azərbaycan təhsilinin gələcəyini əvvəlcədən görərək demişdir: "Təhsil millətin gələcəyidir". Bu baxımdan Heydər Əliyev siyasi kursunun davamçısı olan möhtərəm  Prezidentimiz İlham Əliyev Azərbaycan təhsilinin inkişafına yönələn xüsusi sərəncamlar vermiş və Azərbaycan tələbələrinin xarici ölkələrdə oxuması üçün dövlət təminatı yaratmışdır. Eyni zamanda Prezidentimiz Azərbaycanda xüsusi istedadı olan uşaqların üzə çıxarılması və inkişaf etdirilməsi üçün Təhsil Nazirliyi qarşısında, məktəblər qarşısında böyük vəzifələr qoymuşdur.

Məlum həqiqətdir ki, biliklər müəllim tərəfindən gənc nəslə aşılanır. Azərbaycanda təhsili inkişaf etdirmək, novator (yenilikçi) dünya təcrübəsinə əsaslanan, interaktiv təlim metodları ilə işləyən müasir test üsulu metodunu iş təcrübəsində tətbiq edən istedadlı, yaradıcı müəllimləri və məktəbləri üzə çıxarmaq məqsədi ilə dövlətimizin başçısı "Ən yaxşı ümumtəhsil məktəbi" və "Ən yaxşı müəllim" müsabiqələrinin keçirilməsi haqqında sərəncam imzalamışdır. Digər müəllimlər kimi mən də 33 illik pedaqoji sahədə gördüyüm işlərə, əldə etdiyim nailiyyətlərə, yetirmələrimə, mətbuatdakı çıxışlarıma, yazdığım çoxlu sayda dərs vəsaitlərinə, olimpiadalarda, respublika və beynəlxalq müsabiqələrdə əldə etdiklərimə əsaslanaraq  müsabiqədə iştirak etdim. Təşkilat Komitəsi üç mərhələdə yekunlaşan müsabiqənin şəffaf keçirilməsi üçün şərait yaratdı. Nəticədə yüksək göstəricilər əldə etdim.

Bu günlərdə müsabiqənin nəticələri açıqlandı.  Qaliblərin sırasında mənim də adım var. Sadə kənd müəlliminə möhtərəm Prezidentimizin qayğı göstərməsi və mənim əməyimi yüksək qiymətləndirməsi məni hədsiz dərəcədə sevindirdi. ölkə başçısı İlham Əliyevin Azərbaycan müəllimlərinə, Azərbaycan təhsilinə son dərəcə diqqət və qayğı göstərməsi hər birimizin məsuliyyətini, Vətənə, gələcəyin qurucularına sədaqətlə xidmət etmək bacarığını daha da artırır.

Mənə verilən 5000 manat mükafat xüsusən qarşıya qoyduğum pedaqoji problemlərlə bağlı müəllim və şagirdlər üçün yazdığım dərs vəsaitlərinin və didaktik materialların buraxılmasına kömək edəcək. Mən bundan böyük qayğı və ehtiram görmürəm. Buna görə də möhtərəm Prezidentimiz cənab İlham Əliyevə öz təşəkkürümü bildirirəm.

Heybət QƏDİROV,

Yardımlı rayonu, Alçabulaq kənd orta məktəbinin

müəllimi, respublikanın əməkdar müəllimi

Dövlət başçısının müəllim əməyinə verdiyi qiymətin daha bir təzahürü

Azərbaycan Respublikasının Prezidenti İlham Əliyevin 4 sentyabr 2007-ci il tarixli sərəncamına əsasən keçirilən "Ən yaxşı ümumtəhsil məktəbi" və "Ən yaxşı müəllim" müsabiqələrinin nəticəsi bu günlərdə açıqlandı. Müsabiqədə iştirak edərək qaliblər sırasına çıxmış Bakının 190 nömrəli orta məktəbinin Azərbaycan dili və ədəbiyyat müəllimi Qənirə Əmircanova da dövlətimizin başçısı tərəfindən mükafatlandırılmışdır. Redaksiyamızın qonağı Qənirə Əmircanovaya ilk sualımız belə oldu.

- Necə olub ki, müəllim ixtisasını seçmisiniz?

- Doğrusu, atam ixtisasca hüquqşünas olduğundan mən də  bu sənəti seçmək istəyirdim, ancaq o, buna razı olmadı.Bildirdi ki, müəllim olmalısan. Belə də oldu.

Orta məktəbi əla qiymətlərlə bitirərək ADPU-nun Azərbaycan dili və ədəbiyyat fakültəsinə daxil oldum və universiteti fərqlənmə  diplomu ilə bitirdim. 

- Qənirə xanım, bildiyimizə görə, orta məktəblər üzrə dərslik müəllifisiniz və həm də elmi işlə  məşğul olursunuz. Bütün bunlar sizin yaxşı müəllim olmağınıza mane olmurmu?

- Xeyr. Mən öz sənətimi çox sevirəm. İşlədikcə də işimdən həzz alıram. İşlədiyim məktəbin hər bir uğuruna da ürəkdən sevinirəm. çünki bu uğurlardan mənə də pay düşür. Elə bu il 107 məzunumuzdan 71-i  müxtəlif ali məktəblərə  qəbul olmuşdur ki, onlardan 9-u  600-dən yuxarı bal toplayıb.

Bəli, deməliyəm ki, V, VI, VII siniflər üçün "Azərbaycan dili" dərsliklərinin müəlliflərindən biriyəm. Həm də Təhsil Problemləri İnstitutunun  dissertantıyam.

- Müsabiqənin nəticəsinin açıqlanmasını necə qarşıladınız?

- Mən möhtərəm Prezidentimizin "Ən yaxşı ümumtəhsil məktəbi" və "Ən yaxşı müəllim" müsabiqələrinin keçirilməsi haqqında keçən il verdiyi sərəncamı eşidəndə çox sevindim. Fikirləşdim ki, özümü bu müsabiqədə sınaya bilərəm. Bu sınaq mübarizə meydanıdır. çünki mən özümü yaxşı bir müəllim kimi təsdiq etdirmək istəyirdim. Bu arzu ilə də müsabiqəyə qatıldım. Müsabiqə sox yüksək səviyyədə təşkil olundu. 

Bu günlərdə möhtərəm Prezidentimiz İlham Əliyevin verdiyi sərəncama əsasən, mən də "Ən yaxşı müəllim" adına layiq görülərək  5000 manat pul mükafatı ilə  mükafatlandırılmışam.

Bu, ölkə başçısının müəllim əməyinə verdiyi böyük qiymətin daha bir təzahürüdür. 

Şakir CƏFƏROV

Qazandığımız mükafat doğru yolda olduğumuzu sübut edir

2007-2008-ci tədris ilində keçirilmiş "Ən yaxşı ümumtəhsil məktəbi" müsabiqəsində müvəffəqiyyət qazandığına görə Bakı Avropa Liseyi də möhtərəm Prezidentimiz İlham Əliyev cənablarının 19.08.08 tarixli sərəncamı ilə 10.000 manat məbləğində pulla mükafatlandırılmışdır.

Liseyin mükafat alması, həmçinin 5 nəfər aparıcı müəllimimizin "Ən yaxşı müəllim" adına sahib olaraq hər birinə 5000 manat mükafat verilməsi kollektivimizi çox sevindirdi. Təhsil sistemi və təhsil işçilərinin əməyinə olan bu diqqətinə, qayğısına görə Prezidentimiz İlham Əliyev cənablarına dərin minnətdarlığımızı bildiririk.

Biz həmçinin bu müsabiqəni yüksək səviyyədə keçirən Təhsil Nazirliyinə də öz təşəkkürümüzü bildirmək istərdik. çünki yüzlərlə müəllim və məktəbin içərisindən ən layiqlilərini seçmək üçün komissiya belə məsuliyyətli bir işin öhdəsindən obyektivliyi və şəffaflığı gözləyərək layiqincə gəlmişdir.

Bakı Avropa Liseyi qısa bir müddətdə fəaliyyət göstərən, özünəməxsus təlim modeli və tədris üsulu, yaradıcı, demokratik mühiti, yüksək intellektə malik, bacarıqlı müəllim heyəti və məhz bunun nəticəsində məzunlarının hər il yüksək göstəricilər əldə etməsi ilə ictimaiyyətin diqqətini cəlb edən bir tədris ocağıdır. Bir çox məzunlarımız isə dünyanın Harvard, Prinston və s. kimi tanınmış universitetlərinə daxil olmaqla, nəinki öz məktəblərinin, bütövlükdə Azərbaycan təhsil sisteminin keyfiyyətini sübut etmişlər.

Əldə etdiyimiz nailiyyətlərlə yanaşı, qazandığımız son mükafat liseyin təhsil sistemində doğru yolda olduğunu bir daha sübut etdi.

 Biz əminik ki, bu mükafat liseyin müəllimlərini yeni nailiyyətlər axtarışında olmağa, təhsilin keyfiyyətini yüksəltməyə ruhlandıracaq.

Biz ümid edirik ki, bu müsabiqədə iştirak etmək istəyən məktəb və müəllimlərin sayı ildən-ilə artacaq və layiqlilər yüksək adlara sahib olacaqlar.

Zülfiyyə VEYSOVA,

Bakı Avropa Liseyinin

direktoru