YUNİSEF-in Azərbaycan nümayəndəliyi rəhbərinin missiyası başa çatdı

Son 4 ildə YUNİSEF-in ölkəmizdəki nümayəndəliyinə rəhbərlik etmiş xanım Hanaa Singer öz missiyasını başa vurub. Bu münasibətlə iyulun 1-də Təhsil Nazirliyində ölkəmizi tərk etməyə hazırlaşan xanım Hanaa Singerin yola salınması mərasimi keçirilib.

Mərasimi giriş sözü ilə açan təhsil naziri Misir Mərdanov YUNİSEF təşkilatının ötən müddətdə ölkəmizdəki missiyasını uğurla yerinə yetirdiyini, uşaqların sağlamlığı və inkişafı, hüquqlarının qorunması, təhsili sahəsində bir sıra layihələr reallaşdırdığını bildirdi. Nazir həmin layihələrdən bəzisinin respublikamız üçün əhəmiyyətini xüsusi olaraq qeyd edərək bütün bu işlərin görülməsində, bütövlükdə Təhsil Nazirliyi ilə YUNİSEF arasında əlaqələrin inkişafında xanım Hanaa Singerin xidmətlərini yüksək qiymətləndirdi, ölkəmizdə aparılan təhsil islahatlarına göstərdiyi dəstəyə görə ona təşəkkür etdi.

Nazir habelə H.Singerlə birlikdə nümayəndəlikdə missiyasını başa vuran proqram rəhbəri, Azərbaycan məktəbinin yetirməsi Gülanə Hüseynova haqqında da xoş sözlər dedi, onların hər ikisini Azərbaycan Respublikası Təhsil Nazirliyinin Fəxri fərmanı ilə təltif etdi.

Xanım Hanaa Singerə və Gülanə Hüseynovaya gələcək fəaliyyətlərində uğurlar arzulayan Misir Mərdanov uşaqların hüquqlarını qoruyan beynəlxalq təşkilatla mövcud əməkdaşlığın davamlı olacağına əminliyini vurğuladı.

Tədbirdə Təhsil Nazirliyinin Strateji təhlil, planlaşdırma və kadrların idarəolunması şöbəsinin müdiri Fərzəli Qədirov "Təhsil Nazirliyi və YUNİSEF: birgə uğurlu əməkdaşlıq" mövzusunda təqdimat etdi. F.Qədirov təqdimatında YUNİSEF-lə birgə həyata keçirilən layihələrin məqsədini açıqlayaraq qeyd etdi ki, bu layihələr ümumilikdə 200-dən çox məktəbəqədər tərbiyə, ümumtəhsil, ilkin müəllim hazırlığı, ixtisasartırma və yenidənhazırlanma müəssisəsini, 20000-ə yaxın uşaq və şagirdi, 5000-ə qədər valideyni, 2500-dək müəllim və tərbiyəçini, 1000-dək mütəxəssisi əhatə edib.

F.Qədirov həmçinin birgə reallaşdırılan "Erkən yaş dövründə uşaqların inkişafı", "Fəal təlim siyasəti", "Məktəb uşağın dostudur", "Valideyn-Müəllim Assosiasiyalarının yaradılması" və s. layihələr, eləcə də qarşıda duran perspektivlər barədə iştirakçılara geniş məlumat verdi.

YUNİSEF-in ölkəmizdəki nümayəndəliyinin rəhbəri xanım Hanaa Singer ona göstərilən yüksək diqqətə görə təşəkkürünü bildirdi, Azərbaycanda çalışmaqdan məmnunluq duyduğunu, həyata keçirilən layihələrə göstərilən dəstəkdən razı qaldığını ifadə etdi.

Mərasimdə Təhsil Nazirliyi aparatının əməkdaşları, millət vəkilləri, bir sıra dövlət qurumlarının, qeyri-hökumət və beynəlxalq təşkilatların nümayəndələri, YUNİSEF-lə birgə layihələrdə iştirak edən müəssisələrin rəhbərləri iştirak edirdilər.

Yusif ƏLİYEV