Peşə məktəbi və peşə liseylərinin 5 günlük iş həftəsinə keçməsi, imtahanların təşkili və keçirilməsi qaydaları haqqında təlimatın və nümunəvi tədris planlarının təsdiq edilməsi barədə

"Azərbaycan Respublikasında "Bilik günü"nün təsis edilməsi və təhsil müəssisələrində iş rejiminin tənzimlənməsi haqqında" Azərbaycan Respublikası Prezidentinin 2004-cü il 21 avqust tarixli fərmanının icrasını peşə məktəbi və peşə liseylərində təmin etmək məqsədi ilə

ƏMR EDİRƏM:

1. 2008-2009-cu dərs ilindən başlayaraq respublikanın peşə məktəbi və peşə liseyləri beşgünlük tədris həftəsinə keçsin.

2. Peşə məktəbi və peşə liseylərinin 5 günlük iş həftəsi üzrə iş rejimi, nümunəvi tədris planları və "Texniki peşə təhsili müəssisələrində imtahanların aparılması, şagirdlərin kursdan-kursa keçirilməsi və buraxılışı haqqında təlimat" təsdiq edilsin.

3. Texniki peşə təhsili şöbəsi (N.Məmmədov) və Təhsil Problemləri İnstitutu (A.Mehrabov):

3.1.Nümunəvi tədris planları əsasında peşələr üzrə tədris planlarının hazırlanmasını təmin etsinlər.

3.2.Tədris planları, imtahanlar haqqında təlimat və iş rejiminin tətbiqi ilə əlaqədar peşə təhsili müəssisələrinə əməli kömək göstərsinlər.

4. Respublikanın peşə məktəbi və peşə liseylərinin direktorları:

4.1.Əmrin icrası ilə əlaqədar rəhbərlik etdikləri təhsil müəssisələrində işçilər, şagirdlər və valideynlər arasında izahat işlərinin aparılmasını təmin etsinlər.

4.2.Beşgünlük iş həftəsinə keçilməsi ilə əlaqədar dərs cədvəllərinin pedaqoji prinsiplərə uyğun tərtib edilməsinə nail olsunlar.

4.3.Peşə məktəbləri və peşə liseylərində şagirdlərin təlim və asudə vaxtlarının səmərəli təşkil olunmasını təmin etsinlər.

5. İqtisadiyyat şöbəsi (H.Zeynalov) və Texniki peşə təhsili şöbəsi (N.Məmmədov) əmrdə göstərilən sənədlərin nəşr edilməsi, yerlərə çatdırılması və digər məsələləri həll etsinlər.

6. Bütün peşə liseylərində 2-ci və 3-cü kurslarda ümumtəhsil fənlərindən imtahanlar üçün ayrılmış vaxt məsləhət saatları kimi istifadə olunsun.

7. İctimaiyyətlə əlaqə şöbəsi (B.Hüseynzadə) əmrin, iş rejiminin və imtahanlar haqqında təlimatın "Azərbaycan müəllimi" qəzetində, "Sənətkar" jurnalında və "Təhsil xəbərləri" məcmuəsində dərc olunmasını təmin etsin.

8. ümumi şöbə (İ.Mirzəyev) əmrin çoxaldılıb peşə təhsili müəssisələrinə çatdırılmasını təmin etsin.

9. Təhsil Nazirliyinin 15.03.2000-ci il tarixli 250 nömrəli əmri ilə təsdiq edilmiş "Peşə məktəbi və peşə liseyində imtahanların aparılması və şagirdlərin kursdan kursa keçirilməsi haqqında təlimat" və "Peşə məktəbi və peşə liseyində dövlət buraxılış imtahanlarının keçirilməsi qaydası haqqında təlimat" qüvvədən düşmüş hesab edilsin.

10. Əmrin icrasına nəzarət nazir müavini İ.İsgəndərova həvalə edilsin.

Misir MƏRDANOV,

Azərbaycan Respublikasının təhsil naziri

1 iyul 2008-ci il

 Tədris planlarına dair qeydlərə əlavə barədə

Təhsil Nazirliyinin "2008-2009-cu dərs ili üçün ümumtəhsil məktəblərinin tədris planlarının təsdiqi haqqında" 09 iyun 2008-ci il tarixli, 720 nömrəli əmri ilə təsdiq olunmuş "2008-2009-cu dərs ili üçün tədris planlarına dair Qeydlər"in 8.3-cü yarımbəndinin II abzasından sonra aşağıdakı redaksiyada abzas əlavə edilsin:

"Praktik məşğələlər zamanı 2 qrupa bölünən X-XI siniflərdə seçmə fənlər üçün nəzərdə tutulmuş saatlardan 1 saatı dərs cədvəlinə salınmaqla informatikanın tədrisinə verilir".

Misir MƏRDANOV,

Azərbaycan Respublikasının təhsil naziri

1 iyul 2008-ci il