ADPU-da məzun günü

ADPU-da məzun gününə həsr  olunmuş təntənəli tədbirdə  təhsil nazirinin müavini Elmar Qasımov, akademik  Budaq Budaqov, millət vəkili Fəzail Ağamalı, əmək  veteranı ömər Ağayev,  ali məktəbin müəllimləri, tələbələr  və digər dəvət olunmuş qonaqlar iştirak edirdilər.

ADPU-nun rektoru, AMEA-nın müxbir üzvü, professor Yusif Məmmədov bu il universiteti bitirən   məzun-gəncləri təbrik edərək bildirdi ki, müəllimlik peşəsi cəmiyyətdə mövcud olan peşə və  ixtisasların arasında xüsusi yer tutur. Bu gün cəmiyyət həyatının  bütün sahələrində müəllim  əməyini, müəllim zəhmətini görmək mümkündür.

Müstəqil Azərbaycan dövlətinin banisi və  qurucusu, ümummilli liderimiz Heydər Əliyev müəllim adını, müəllim əməyini  hər bir  zaman yüksək  qiymətləndirərək demişdir: Mən yer üzündə  müəllimdən yüksək ad tanımıram.

Diqqətinizə bir faktı çatdırmağı da  lazım bilirəm ki, bu il universiteti 10 fakültə üzrə əyani şöbədə  1102, qiyabi şöbədə isə 8 fakültə üzrə 539  tələbə və 35 ixtisas üzrə 150 magistrant bitirib. Həm də  müxtəlif ixtisaslar üzrə 126 türkiyəli  gənc də məzun kimi öz ölkələrinə qayıdır.

Unutmamalısınız ki, bu təhsil ocağını Ə.Seyidov, M.Mehdizadə, H.Araslı, F.Qasımzadə, M.Rəfili, N.Hüseynov və adlarını çəkmədiyim neçə-neçə  böyük elm və  təhsil xadimləri bitirmişlər. İnanıram ki, gələcəkdə siz də onların yolunu layiqincə  davam etdirəcəksiniz.

Tədbirdə təhsil nazirinin müavini Elmar Qasımov məzunları təbrik edərək  bildirdi ki, tarixən ölkəmizdə ali  elmi-pedaqoji fikrin beşiyi və mərkəzi hesab edilən, hazırda isə respublikamızın qabaqcıl və nüfuzlu ali məktəblərindən biri olan  ADPU-nun həyatında çox xoş və əlamətdar bir gündür. Deməliyəm ki, bu il  universitetin  əyani şöbəsini bitirən məzunlar  "2005-2009-cu illər üçün Azərbaycan Respublikasının ümumtəhsil məktəbləri şəbəkəsində pedaqoji  kadr təminatı üzrə İnkişaf Proqramı"na əsasən respublikamızın 50-dən  çox rayonuna ixtisasları  üzrə  işləməyə göndərilirlər. Bu da rayonlarda pedaqoji kadrlara  olan tələbatın ödənilməsində mühüm rol oynayacaqdır.

Belə  bir xoş gündə  universitetin  riyaziyyat fakültəsinin 401-ci qrupunda oxumuş iki məzunla - Jalə Orucova və Münəvvər Hüseynova ilə də tanışlığımız maraqlı oldu. Məlum oldu ki, Münəvvər ailə vəziyyətilə əlaqədar azad təyinat alıb, Jalə isə Bakıda yaşasa da, işləmək üçün təyinatla Dəvəçi rayonuna göndərilir. Hər ikisinin  arzusu gələcəkdə magistr təhsili almaqdır.

Tədbirdə universiteti fərqlənmə diplomu ilə bitirmiş bir qrup məzuna diplomlar  təqdim olundu.

Unudulmaz  xatirəyə çevrilən tədbirin sonunda böyük konsert oldu.    

Şakir CƏFƏROV