ADU-da ulu öndərə həsr olunmuş yubiley tədbiri

Tədbirin açılış mərasimində Dövlət himni səsləndi. Daha  sonra müasir Azərbaycan dövlətinin qurucusu, ulu öndər Heydər Əliyevin  xatirəsi bir dəqiqəlik sükutla yad edildi.

Tədbirdə çıxış edən ADU-nun  rektoru Səməd Seyidov  ümummilli lider Heydər Əliyevin keçdiyi mənalı və mübarizələrlə dolu ömür yolundan danışaraq bildirdi ki, dahi şəxsiyyət təhsilimizin, iqtisadiyyatımızın, Azərbaycanın beynəlxalq səviyyəyə yüksəlməsi istiqamətində apardığı böyük tarixi siyasət daim öyrənilməli, araşdırılmalı və  təbliğ edilməlidir.  

Universitetin rektoru rəhbərlik etdiyi təhsil ocağının müstəqil fəaliyyət göstərməsində, inkişafında   ümummilli liderin əvəzsiz xidmətlərini xüsusilə önə çəkdi. Qeyd edək ki, ADU məhz  Heydər Əliyevin göstərişi əsasında 1973-cü ildən  ölkə üçün xarici dilləri tədris edən kadrların yetişdirilməsi istiqamətində ayrıca  bir təhsil müəssisəsi kimi fəaliyyət göstərir.

Səməd Seyidov bildirdi ki, Heydər Əliyev ikinci dəfə hakimiyyətə gəldikdən sonra minlərlə  azərbaycanlı gənc xarici  ölkələrdə təhsil almağa göndərildi.  Yeni özəl ali təhsil müəssisələri açıldı.  Azərbaycanın saysız- hesabsız ziyalıları, alimləri, müəllimləri müxtəlif fəxri mükafatlara layiq görüldülər.

Tədbirdə ümummilli liderin Azərbaycanın siyasi təlatümlər keçirdiyi ən böhranlı dövrdə hakimiyyətə gələrək ölkəni parçalanmaqdan xilas etməsi ilə bağlı  çıxışlar və  şərhli slaydlar təqdim olundu.  Ulu öndərin ölkənin inkişafını təmin edəcək neft strategiyasının  memarı olması və bu sahədəki böyük qətiyyəti, dünya azərbaycanlılarının birləşməsi istiqamətindəki əvəzsiz xidmətləri  barədə fikirlər səsləndi.

AYNUR

"Gənc istedadlar" liseyində

Bakı Dövlət Universitetinin "Gənc istedadlar" liseyində Azərbaycan xalqının ümummilli lideri Heydər Əliyevin 85 illik yubileyinə həsr olunmuş elmi-nəzəri konfrans keçirildi. Tədbirə dəvət olunan qonaqlar öncə liseyin foyesində hazırlanmış Heydər Əliyev guşəsi ilə tanış oldular.

"Gənc istedadlar" liseyinin direktoru, professor Qasım Hüseynov konfrans iştirakçılarını salamlayaraq bildirdi ki, 2007-2008-ci tədris ilində fəaliyyətə başlamış liseydə təhsil alan şagirdlər daim ümummilli lider Heydər Əliyevin tövsiyə və məsləhətlərinə əməl edərək onun ideyalarına sadiq olacaq, ulu öndərin gənclərin qarşısında qoyduğu vəzifələrin həyata keçirilməsində bütün qüvvələrini səfərbər edəcəklər.

BDU-nun elmi işlər üzrə prorektoru, kimya elmləri doktoru, professor İsmayıl Əliyev ümummilli lider Heydər Əliyevin Azərbaycan xalqının rifahının yüksəlməsi və dövlətçiliyin inkişafı üçün müstəsna xidmətlərini bir daha xatırlatdı.

Sonra tarix elmləri doktoru, professor İbrahim Zeynalov "Heydər Əliyevin rəhbərliyi dövründə Azərbaycanın sosial-iqtisadi inkişafı", dosent Nuru Məmmədov "Heydər Əliyev və müstəqil Azərbaycan dövlətçiliyinin möhkəmləndirilməsi", liseyin tarix müəllimi Gülşən Talıbova "Heydər Əliyev və Azərbaycan təhsili", IX sinif şagirdi Elvin Eyvazlı "Heydər Əliyev və müstəqil Azərbaycan gəncliyi" və VIII sinif şagirdi Zeynəb Sabirli "Heydər Əliyev və ana dilimiz" mövzularında məruzələrlə çıxış etdilər.

Tədbirdə çıxış edən BDU-nun biologiya fakültəsinin dekanı, biologiya elmləri  doktoru, professor Ağavəli İbrahimov ulu öndərlə bağlı unudulmaz xatirələrini danışdı, onun yüksək insani keyfiyyətlərindən söz açdı.

BDU-nun "Gənc istedadlar" liseyində təşkil edilən elmi-nəzəri konfransın sonunda təhsil ocağının şagirdləri ədəbi-bədii nümunələrdən ibarət proqramla çıxış etdilər. Tədbir iştirakçıları şagirdlərin ifasında səslənən "Bir millət, iki dövlət", "Millət atası", "Tanrı sənə tapşırıb" və s. şeirləri maraqla dinlədilər.

Hicran ƏKBƏROVA

Mir Cəlal Paşayevin 100 illiyi qeyd olundu

Mayın 6-da Bakı Pedaqoji Kadrların İxtisasartırma və Yenidənhazırlanma İnstitutunun akt zalında Azərbaycan elminin, təhsilinin və ədəbiyyatının inkişafına əvəzsiz töhfələr vermiş böyük alim və pedaqoq, görkəmli ədib, ictimai xadim, professor Mir Cəlal Paşayevin 100 illik yubileyinə həsr olunmuş elmi konfrans keçirildi.

Məclisə dəvət almış qonaqların və bu təhsil ocağının professor-müəllim heyətinin iştirak etdikləri konfransda institutun rektoru, professor Asəf Zamanov giriş sözü ilə mərasim iştirakçılarını salamladı, M.C.Paşayevin 100 illik yubileyinin, ümumiyyətlə Azərbaycanda görkəmli şəxsiyyətlərin və əlamətdar hadisələrin YUNESKO-nun qərarı ilə 2008-2009-cu illərdə qeyd edilməsi təşəbbüsü bu qurumun Azərbaycan elminə, mədəniyyətinə və incəsənətinə göstərdiyi diqqətdən irəli gəldiyini, belə nailiyyətlərin əldə olunmasında müstəqil Azərbaycan Respublikasının memarı və qurucusu, ümummilli liderimiz Heydər Əliyevin tarixi rolunu, bu gün onun layiqli davamçısı Prezident İlham Əliyevin və Azərbaycanın birinci xanımı, YUNESKO-nun  və  İSESKO-nun  xoşməramlı səfiri, Heydər Əliyev Fondunun prezidenti, millət vəkili Mehriban xanım Əliyevanın gərgin əməyini diqqətə çatdırdı. Asəf müəllim M.C.Paşayevin həyat və fəaliyyətinin bəzi məqamlarına nəzər salmaqla onun ən çox xeyirxahlığı ilə xatirələrdə yaşadığını qeyd etdi.

Konfransda çıxış edən AMEA Ədəbiyyat İnstitutunun direktoru, akademik Bəkir Nəbiyev, AMEA Ədəbiyyat İnstitutunun XX əsr Azərbaycan ədəbiyyatı şöbəsinin müdiri Şirindil Alışanlı, BPKİYİ-nin Azərbaycan dili və ədəbiyyatı kafedrasının metodisti Bəybala Abbaslı, BDU-nun Azərbaycan dili və metodika kafedrasının müdiri, professor Yusif Seyidov, BPKİYİ-nin dosenti Allahverdi Eminov böyük ictimai-siyasi xadim Mir Cəlal Paşavevin fədakar alim və ədəbiyyat tənqidçisi kimi rolundan, sənətkarlığından, elmi-pedaqoji və bədii yaradıcılığından söz açdılar, ədib haqqında unudulmaz xatirələrini yığıncaq iştirakçılarına çatdırdılar.

Nizami MİRZƏ