Məktəblərin kompüterləşdirilməsini valideynlər də yüksək qiymətləndirdilər  

"Azərbaycan Respublikasının ümumtəhsil məktəblərinin informasiya və kommunikasiya texnologiyaları ilə təminatı Proqramı (2005-2007-ci illər)"nın yerinə yetirilməsi nəticəsində əldə olunan nailiyyətlər  müəllim və şagirdlərin həyatında bir dönüş oldu. 

2007-ci ildən Bakı və Sumqayıt məktəblərinə  verilən noutbuklar  və proyektorlar  vasitəsilə elektron dərslər keçilir. Azərbaycan tarixi, kimya, biologiya, fizika fənləri üzrə elektron audiovizual dərs vəsaitləri müəllim və şagirdlərin istifadəsindədir. Təhsil Nazirliyi İKT savadı olan müəllimlərin hazırlanması və  onların elektron dərsliklərdən istifadə bacarığını artıqmaq məqsədilə treninqlər keçirir.  

İndi orta məktəblərin əksər siniflərində informatika fənni tədris olunur. Artıq V və VI siniflər yeni işıq üzü görmüş informatika dərsliklərindən istifadə edirlər.

Sevindirici haldır ki, bu istiqamətdə işlər davam edir.   "Təhsil sisteminin informasiyalaşdırılması üzrə Dövlət Proqramı (2008-2012-ci illər)" hazırlanaraq təsdiq üçün Nazirlər Kabinetinə təqdim olunub. Məqsəd təhsil müəssisələrinin elmi-texniki bazasını daha da gücləndirmək, şagirdlərimizin bilik və intellektual səviyyəsini artırmaq üçün imkanları genişləndirməkdir.

Bəs görəsən, təhsil müəssisələrində kompüterləşmə ilə bağlı hazırkı vəziyyət necə qiymətləndirilir? Dövlət Proqramı nəticəsində kompüterlə  təchiz olunan təhsil müəssisələrində şagirdlər üçün lazımi şərait yaradılıbmı? Bu barədə həm müəllimlərin, həm şagirdlərin, həm də valideynlərin fikirlərini bölüşmək istədik.

Suallarımıza  20 nömrəli məktəb-liseyin kimya müəllimi Fatma Mustafazadənin keçdiyi  dərs zamanı cavab aldıq.  Qeyri-üzvi kimya   şagirdlərə  elektron dərslik vasitəsilə izah edilirdi. Uşaqlar bütün reaksiyaları  vizual  şəkildə görə bilirdilər. Təbii ki, ekranda aydın şəkildə görünən bu təsvirlər uşaqlara nəyinsə  qaranlıq qalmasını istisna edir. Elektron dərslik qısa vaxt ərzində mövzunun təfsilatı ilə göstərilməsini, dərsin interaktivliyini və inteqrativliyini təmin edir. Məktəbdə 4 kompüter otağı fəaliyyət göstərir. Hər gün bu kompüterlərdən təxminən 500-ə qədər şagird istifadə edə bilir.

Məktəb-liseyin direktoru, eləcə də "Azərbaycan tarixi" elektron dərs vəsaitinin  müəllifi Əkbər Qocayev  həyata keçirilən Dövlət   Proqramını  şagird və müəllimlərin  bilik dairələrinin genişləndirilməsində  əhəmiyyətli addım adlandırdı: "Xüsusilə, audiovizual vəsaitindən dərs prosesində istifadə edilməsi şagirdlərin nəzəri təhliletmə  və məntiqi qiymətləndirmə  bacarıqlarının formalaşdırılmasına, təlim informasiyasının  təhlili prosesinin mahiyyətinin dərk olunmasına , şagirdin mühakimə yürütməsinə, öz fikrini yazılı və şifahi ifadə etmək bacarığının təkmilləşməsinə kömək edir".

İlyas Əfəndiyev adına Elitar Gimnaziyanın  VII sinfində oxuyan  Əli Hadıyev də  öz həyatını kompütersiz təsəvvür etmir. Gerçəklik ondadır ki, bu texnoloji proses  onlara dünyanı, dünyanı isə  onlara bağışladı.

 Valideyn Rəna Süleymanova da övladının təhsil aldığı gimnaziyada  informatika dərslərinin keçilməsindən,  kompüter bilgilərinin geniş şəkildə təbliğ olunması və elektron dərsliklərdən istifadə edilməsindən çox məmnundur. ölkə Prezidentinə gələcəyimiz olan uşaqların təhsilinə göstərdiyi diqqətə görə minnətdarlığını bildirən valideyn qeyd etdi ki, bu günün məktəblisi sabah Azərbaycanı zirvələrə qaldıra biləcək  işgüzar, peşəkar mütəxəssis deməkdir. 

Gümnaziyanın  müəllim kollektivi də çalışdıqları təhsil ocağının kompüterləşməsinin dərslərin keyfiyyətinə müsbət təsir göstərdiyini və  uşaqlarda  informatika dərslərinə marağın artmasını təqdirəlayiq hesab edir. 

S.C.Pişəvəri adına humanitar gimnaziyanın VI "V" sinif şagirdləri Zeynəb Məmmədova  və Sevinc Zeynalova deyirlər ki, kompüter hər yerdə lazımdır. Bütün işlərin həllində kompüter xüsusi rol oynayır. Kompüterdə bizə lazım olan materialları yazırıq, çap edirik. Siyahıların yazılmasında, cədvəllərin çəkilməsində kompüterdən istifadə edirik.

Gimnaziyanın informatika müəllimi Gülnarə  Şahmərdanovanın sözlərinə görə, gimnaziyada  hər birində 11 kompüter olmaqla,   3 otaq təşkil olunub. Otaqlarda skanerlər və printerlər də var. Müəllim  uşaqların bilik səviyyəsindən razılıq edir və əminliklə bildirir ki, məktəbin məzunlarının əldə etdikdəri biliklər onların gələcəkdə kompüter mütəxəssisi olacaqlarına şübhə yeri qoymur.

Gimnaziyanın direktoru Novruz Dəmirov bildirir ki, müəllimlər , əsasən, tətillərdə,  yaxud boş vaxtlarında  kompüter öyrənməyə gəlirlər.  Eyni zamanda müəllimlər yay tətilində onlar üçün  məktəbdə təşkil olunacaq kompüter kurslarına cəlb olunacaqlar.  Qısa bir müddət ərzində həyata keçirilən Dövlət Proqramı ilə bağlı ölkə Prezidenti və təhsil nazirinə minnətdarlığını bildirən gimnaziyanın direktoru tezliklə bu uğurlarına görə Azərbaycanın ABŞ, Avropa ölkələri ilə müqayisə olunacağını istisna etmir.

Bakı Avropa Liseyinin direktoru Zülfiyyə Veysova  rəhbərlik etdiyi təhsil ocağında artıq uşaqların I sinifdən kompüter  biliklərinə yiyələndiyini  deyir. O,  ilk illərdə aşağı siniflərdə kompüter dərslərinin keçilməsini  ictimaiyyət arasında birmənalı qarşılanmadığı halda, indiki dövrdə bu addımın bəyənilməsinə diqqət çəkdi: Məhz ona görə liseyimizin şagirdləri informatika sahəsində keçirilən olimpiadaların qalibləri olur və onların uğurları ilbəil artır. Liseyimizdə "Elektron məktəb" layihəsi ilə əlaqədar 7 otaqda  multimedia proyektorları quraşdırılıb. Rus və Azərbaycan bölmələrində yüksək  səviyyədə elektron dərslər keçilir.

Liseyin VIII sinif şagirdləri Ləman Hüseynova və Nərmin Məmmədova "Azərbaycanın Gənc Kompüter İstedadları  - 2007"   müsabiqəsində II yeri qazanıblar: İnformatika dərslərinə böyük marağımız var. Kompüterdə müəllimlərimizin köməyi ilə müxtəlif mövzularda təqdimatlar hazırlamaqdan zövq alırıq.

"İntellekt" liseyi də şabirdlərinin və müəllimlərinin kompüter   biliklərinə yiyələnməsi sahəsində böyük uğurlar əldə etmiş təhsil müəssisələrindəndir. Liseydə şagirdlərə I sinifdən informatika dərsi keçilir. Liseyin şagirdləri informatika sahəsində  olimpiada və müsabiqələrin qalibləridirlər.

Liseyin direktoru Ceyran Kuliyevanın sözlərinə görə, şagirdlər artıq II sinifdən kompüterdə sərbəst işləyə bilirlər. Təhsil ocağında  4 kompüter otağı fəaliyyət göstərir. Liseydə  inzibati şöbələr, zəng  sistemi, mühasibatlıq, dərs cədvəlləri, sənədləşdirmə mexanizmi kompüterləşdirilib.

Şagirdlərlə söhbət zamanı məlum oldu ki, onların kompüter dərslərinə, İnternetə, elektron dərslərə maraqları hədsizdir. Dövlət Proqramından xəbərdar olan şagirdlər öz təhsilləri ilə onlara göstərilən bu qayğını doğruldacaqlarına  söz verdilər.

Aynur GüLüSTAN,

Fazil İDRİSOĞLU