Zəngin bilik, yüksək pedaqoji ustalıq onu fəxri ad sahibi etdi

Artıq tələbəlik illərinin sonu yaxınlaşırdı. Qış imtahan sessiyasının həyəcanlarını təyinat bölgüsünün həyəcanları əvəz etmişdi. Hər bir son kurs tələbəsi öz ürəyində özünə "iş yeri" gözaltı etsə də, universitetdə təyinat bölgüsünün necə aparılacağını səbirsizliklə gözləyirdi. Respublikanın əksər orta təhsil ocaqlarında fizika müəllimlərinə ehtiyac çox olduğundan, həmin ünvanlarda işləmək üçün gənc mütəxəssislərin göndərilməsi təyinat bölgüsünün əsasını təşkil edirdi.

Əslən zaqatalalı olan gənc mütəxəssis Firəngizin ürəyi sakit idi. özü demişkən, hara göndərsələr, gedib işləyəcəyəm. Elə ürəyimcə idi ki, kənd müəllimi olum. Düzü, bilmirdim ki, bu arzu gənclik romantikasından irəli gəlirdi, yoxsa əsl kənd həyatı ilə dolu mənalı bir ömrə müəlliflik etmək istəyindən qaynaqlanırdı.

Firəngiz xanım Əsədova 1958-ci ildə Bakı Dövlət Universitetinin fzika-riyaziyyat fakültəsini bitirmişdir. Təyinatla Balakən rayonunda müəllimlik fəaliyyətinə başlamışdır. O, bir il sonra Zaqatala şəhəri 3 nömrəli orta məktəbdə pedaqoji fəaliyyətini davam etdirmişdir. 1996-cı ildə isə Firəngiz xanım ailəliklə Bakıya köçmüşdür. Onun Səbail rayonundakı 160 nömrəli klassik gimnaziyada fizika müəllimi işləmək üçün etdiyi müraciətinə müsbət cavab alındı.

Firəngiz xanımla müdiri olduğu və özünün yaratdığı "Fizika" kabinetində söhbətləşdik. Deyir ki, zəngin kabineti yaratmağa elə bu gimnaziyada pedaqoji fəaliyyətə başladığım il nail ola bildim. Burada müxtəlif növ naqillərin lampalarının qarışıq birləşmələri, laboratoriya işi üçün kompleks dəstlər var. Bu da hər bir şagird üçün müstəqil işləməyə şərait yaradır. Nümayiş üçün cihazlardan istifadə olunur, fizika sahəsində tanınmış Azərbaycan alimlərinin həyat və elmi yaradıcılığından geniş məlumatlar verilir. Hər bir sinif üçün laboratoriya işləri, ayrıca referatlar yazılır, öyrənilir. Dərsin keçirilməsi prosesi belə həyata keçirilir. Əvvəlcə iş dəftərləri yoxlanılır, çətin suallar izah olunur. Dərsin mövzusuna uyğun kartoçka üsulundan istifadə edilir. Şagirdlər həftədə bir dəfə müstəqil işləri yerinə yetirirlər. Məqsədimiz şagirdlərə təkcə bilik öyrətmək deyil, həmçinin onları əsl vətəndaş yetişdirməkdir. Bunun üçün düzgün təlim-tərbiyəyə xüsusi diqqət yetirilir.

Firəngiz xanım dərs deməklə kifayətlənmir. O, rayon, şəhər və respublika müsabiqələrində fəal iştirak edir. "Müasir təlim metodların təbliğinə dair ən yaxşı metodik tövsiyə", "İlin ən yaxşı fənn kabineti" və digər müsabiqələrdə yüksək yaradıcılıq nümayiş etdirərək birinci yeri tutmuş, fəxri fərman və diplomlarla təltif olunmuşdur.

Əsl müəllim adını ucaldan, onu şərəfləndirən Firəngiz xanım geniş metodiki-pedaqoji fəaliyyət sahibidir. O, Azərbaycan dilində şagirdlər və müəllimlər üçün 12 tövsiyə, metodik və tədris vəsaitlərinin müəllifidir. Fizikadan hazır qrafiklər üzrə şagirdlərlə iş metodikası, düşündürücü və aktivləşdirici didaktik materiallar, məlumat kitabı, təcrübə və məsələlər, şəkillər üzrə şagirdlərin müstəqil işi və digər məsələlər Firəngiz xanımın elmi yaradıcılığında öz əksini tapmışdır.

Bir sözlə, F.Əsədovanın yazdığı elmi-metodiki ədəbiyyatlar həm fizika müəllimləri, həm şagirdlər, həm də abituriyentlər üçün əsl stolüstü kitablara çevrilmişdir.

Zəngin pedaqoji təcrübəyə malik Firəngiz xanımı təkcə şagirdləri deyil, gənc fiziklər də fəxrlə öz müəllimi hesab edirlər. Onun dərin biliyindən, həyat təcrübəsindən, məsləhət və tövsiyələrindən bəhrələnirlər. Yaşlı nəsil həmkarları da onun dəyərli məsləhətlərini dinləməkdən çəkinmirlər. Firəngiz xanımın özü də fizika elminə aid baş verən yenilikləri daim izləyir, yeni dərs vəsaitləri, metodik tövsiyələri oxuyur, öyrənir, öz zəngin pedaqoji təcrübəsinin süzgəcindən keçirib, şagirdlərinə çatdırır. O, xoşbəxt ailə sahibidir. Bir oğul, bir qız anasıdır. Hər ikisi həkimdir. Nənə olduğu üçün özünü heç də az xoşbəxt sanmır. 5 nəvəsi var.

Firəngiz xanım üçün 2007-ci il oktyabrın 3-ü daha çox sevindirici, daha çox yaddaqalandır. O, Beynəlxalq Müəllim Günü münasibətilə ölkə Prezidentinin sərəncamı ilə "Əməkdar müəllim" adına layiq görülüb. Prezident təqaüdçüsüdür. Bu yüksək qiymətin əsas meyarı isə zəngin, dərin bilik sahibi olması və pedaqoji ustalığı ilə seçilməsidir.

Qismət ALIŞOĞLU