Kənd müəllimi iki dəfə Prezidentlə görüşüb

Lerikdə bir kənd var. Qışlaq kəndi. Arxası qayalara söykənib, ayağını dağ çayının suları yuyur. İlin yarısı yamacları qarlı olur. Yaz gələndə gül-gülü, çiçək-çiçəyi çağırır. Otları min dərdin dərmanıdır. Beçə balını, ətirli mer-meyvəsini, buz bulaqlarını hələ demirəm.

1938-ci ilin baharında kəndin adlı-sanlı kişilərindən sayılan Yəhya Kazımovun ailəsində bir oğlan uşağı dünyaya gəldi. Qonum-qonşular, qohumlar Yəhya əmiyə gözaydınlıq verdilər. Ağsaqqalların xeyir-duası ilə adını Məhərrəm qoydular.

İllər keçdi. Məhərrəm məktəb yaşına çatdı. Rayonda ilk təhsil ocaqlarından biri olan doğma kəndində oxumağa başladı. Yeddiillik təhsilini burada başa vurdu. Orta məktəbi isə rayon mərkəzində qurtardı.

Məhərrəm Kazımov peşə seçimini onuncuda oxuyanda etmişdi. Müəllim olmaq arzusundaydı. 1956-cı ildə Lənkəran şəhərindəki pedaqoji məktəbə daxil oldu. İki ildən sonra müəllim diplomu ilə rayona döndü. Onu Barzavu kənd yeddiillik məktəbinə təyin etdilər.

Gənc pedaqoqun fəaliyyətinin ilk illərindəki uğurları ona işlədiyi kollektivdə və valideynlər arasında hörmət qazandırdı. Təlim-tərbiyə sahəsində yaradıcı işi, sinif şagirdlərinin maraq və meyillərini öyrənmək istiqamətindəki təcrübəsi rayon müəllimləri arasında yayıldı.

1960-cı ildə Məhərrəm müəllim daha bir arzusuna çatdı. Azərbaycan Dövlət Universitetinin filologiya fakültəsinə daxil oldu. Ali məktəbdə qiyabi təhsil aldığı illərdə iş təcrübəsinə dair pedaqoji mətbuatda çap olunmuş elmi-metodiki məqalələri alimlərin diqqətini cəlb etdi. Onu respublikada keçirilən pedaqoji mühazirələrə, konfranslara çağırdılar.

1961-ci ildə Məhərrəm Kazımov rayonun nümunəvi təhsil müəssisələrindən biri olan internat məktəbində çalışmağa başladı. O, burada zəngin Azərbaycan dili və ədəbiyyat kabineti yaratdı. Kabinetdəki əyani və texniki vasitələrin demək olar ki, hamısını özü əldə etdi. Azərbaycan ədəbiyyatı klassiklərinin əsərlərini topladı. Bu, şagirdlərin mütaliəsinə geniş imkanlar yaratdı. Kabinetdə disputlar, səhnəciklər, yeni nəşrlərin müzakirəsi keçirildi.

Kabinetdə ana dili və ədəbiyyata aid guşələr vardır. Bu guşələrdə lent yazıları, tədris filmləri, şifahi jurnallar, ədiblərin dəyərli fikirləri yazılmış kartoçkalar dərslərin maraqlı və canlı keçməsinə, materialların tez mənimsənilməsinə kömək edir.

Respublikamızın görkəmli elm xadimləri, yazıçı və bəstəkarlar, rəssam və teatrşünaslar kabinetin qonağı olmuş, əsərlərini avtoqrafla bağışlamışlar. Onlar xatirə kitabına ürək sözlərini yazmağı da unutmamışlar.

Azərbaycan Respublikasının Prezidenti cənab İlham Əliyev və Heydər Əliyev Fondunun prezidenti, millət vəkili, YUNESKO-nun xoşməramlı səfiri Mehriban xanım Əliyeva Lerikə ilk səfərləri zamanı internat məktəbindəki Azərbaycan dili və ədəbiyyat kabinetində olmuş, Məhərrəm müəllimin tədris metodikasını bəyənmişlər. Möhtərəm Prezidentimiz xatirə kitabına bu sözləri yazmışdır:

"Azərbaycan dili və ədəbiyyat kabineti uşaqların ana dilini mükəmməl öyrənməsi işində böyük rol oynayır. Bizim ədəbiyyatımız, ana dilimiz müstəqil Azərbaycan Respublikasının inkişafında çox böyük əhəmiyyət kəsb edir. Arzu edirəm ki, uşaqlar ədəbiyyatımızı yaxşı oxusunlar, yaxşı tərbiyə alsınlar, yaxşı vətəndaş olsunlar.

İnternat məktəbinin təmirə böyük ehtiyacı vardır. Yaxın zamanlarda burada əsaslı təmirə başlayacağıq. İnternat məktəbinin kollektivinə və burada oxuyan bütün uşaqlara uğurlar arzulayıram".

İlham ƏLİYEV,

Azərbaycan Respublikasının Prezidenti

8 sentyabr 2005-ci il.

Məktəb cənab Prezidentin göstərişi ilə əsaslı təmir olunmuş, müasir avadanlıqla təchiz edilmişdir. Azərbaycan dili və ədəbiyyat kabinetinə kompüter dəsti bağışlanılmışdır. Dövlət başçısı və onun xanımı 2006-cı ilin oktyabr ayının 23-də ikinci dəfə Lerikdə olarkən məktəbə gəlmiş, Məhərrəm müəllimlə görüşmüş, kabinetə yenidən baxmışlar. O, təhsilə göstərdiyi diqqətə görə möhtərəm Prezidentimizə rayonun bütün ziyalıları adından minnətdarlığını bildirmişdir.

ömrünün 70-ci baharını qarşılayan Məhərrəm müəllimin adı respublikamızın yaradıcı pedaqoqları sırasında çəkilir. Müxtəlif illərdə pedaqoji mühazirələrdə, elmi-təcrübi konfranslarda maraqlı məruzələrlə çıxış etmiş, 1991-ci ildə "İlin ən yaxşı müəllimi" müsabiqəsinin respublika mərhələsində mükafata layiq yer tutmuşdur.

M.Kazımovun fəaliyyəti çoxcəhətlidir. Lerik müəllimləri onu nəinki istedadlı bir pedaqoq, həm də fəal ictimaiyyətçi, el ağsaqqalı kimi tanıyırlar. O, Azərbaycan Pedaqoji Cəmiyyətinin rayon şöbəsinin sədri, respublika yaradıcı müəllimlərinin Mərkəzi Şurasının üzvü, rayon ağsaqqallar şurası sədrinin müavinidir.

Azərbaycan müəllimlərinin VI, VII, VIII qurultaylarının, ümumittifaq müəllimlərinin IV qurultayının nümayəndəsi olan Məhərrəm Kazımovun respublikamızın təhsil müəssisələrində çoxlu dostu vardır. Bu dostluq əlaqələri qabaqcıl pedaqoji təcrübənin öyrənilməsinə və tədrisdə yaradıcılıqla tətbiqinə kömək edir. Kabinetdə bu məqsədlə ayrılmış guşədə bülletenlər, pedaqoji mətbuatda dərc olunmuş əsərlər toplanmışdır. Bu əsərlərdən 15-nin müəllifi  Məhərrəm müəllimin özüdür.

M.Kazımovun yarıməsrlik pedaqoji fəaliyyəti, təhsildəki uğurları dövlət tərəfindən qiymətləndirilmişdir. "Şərəf nişanı" ordeni, "Əmək veteranı" medalı ilə təltif olunmuşdur. "Respublikanın əməkdar müəllimi" fəxri adına, "Qabaqcıl maarif xadimi" döş nişanına layiq görülmüşdür. Şəxsi arxivində nazirliyin fəxri fərmanlarını, təşəkkür məktublarını qiymətli sənədlər kimi saxlayır.

Məhərrəm müəllimin vaxtilə dərs dediyi şagirdlərdən 25 nəfəri rayonun müxtəlif məktəblərində Azərbaycan dili və ədəbiyyatını tədris edirlər. Respublikada keçirilən fənn olimpiadalarında və müsabiqələrdə şagirdləri uğurlar qazanmışlar.

Zəhmətkeş bir ailənin başçısı olan ağsaqqal müəllimin övladları ata ocağının ənənəsinə sadiqdir. Onlar təhsil və mədəniyyət müəssisələrində şərəflə çalışırlar.

Rayon ictimaiyyəti M.Kazımovun 70 illik yubileyini, pedaqoji fəaliyyətinin yarım əsrini qeyd etməyə hazırlaşır. Ona bu hörmət və nüfuzu qazandıran elmə, təhsilə sonsuz məhəbbəti, dövlətimizə və dövlətçiliyimizə sədaqətidir.

...Gecə yarıdan keçmiş, küçələrdə gediş-gəliş azalmışdır. Məhərrəm müəllimin otağında hələ işıq yanır. O, masa arxasındadır. Onbirincilərin "Heydər Əliyev müstəqil Azərbaycanın memarıdır" mövzusunda inşa yazılarını yoxlayır. Vərəqləri çevirdikcə çöhrəsində təbəssüm artır. Şagirdləri xalqımızın unudulmaz oğlu Heydər Əliyevin Azərbaycanın çiçəklənməsi naminə yorulmaz fəaliyyətindən söz açmış, onun ideyalarının əbədi yaşayacağını qələmə almışlar.

H.VƏLİMƏMMƏDOV,

respublikanın əməkdar jurnalisti