Azərbaycan Musiqi Mədəniyyəti Dövlət Muzeyində  Klassik musiqi həvəskarları klubunun 10 illiyinə həsr  olunmuş konsert-tamaşa  nümayiş olunub. Muzeyin direktoru, Əməkdar mədəniyyət işçisi Alla Bayramova  yubiley mərasimində   Azərbaycan Bəstəkarlar İttifaqı ilə sıx əməkdaşlıq etdiklərini, onlarla birgə  müxtəlif layihələr həyata keçirdiklərini  söyləyib. Qeyd edib ki,  muzey və yaradıcı təşkilatın həyata keçirdiyi “Azərbaycan bəstəkarlarının musiqisi gənc ifaçıların təqdimatında” layihəsi də  birgə  əməkdaşlığın bariz nümunəsidir. A.Bayramova deyib ki,   klubun bugünkü yubiley tədbirində  muzeyin klassik musiqi həvəskarlarının ifasında   Əməkdar incəsənət xadimi, bəstəkar Cəlal Abbasovun “Şən bahar” uşaq operası və “Düzgülər” kantatası təqdim ediləcək. Konsert-tamaşa sözügedən birgə layihə çərçivəsində Bakı şəhəri Tofiq Quliyev adına 12 nömrəli onbirillik musiqi məktəbi şagirdlərinin iştirakı ilə hazırlanıb.

Sonra konsert-tamaşa nümayiş olunub. Əlvan rəngli milli geyimlər, milli bayram atributları, şən zarafatlar, gənc ifaçıların milli mədəniyyət və ənənələrimizin zənginliyindən doğan əhval-ruhiyyəsi izləyicilərə xoş ovqat bəxş edib.

Sifai  SƏFƏROVA