Azərbaycan Dövlət Neft və Sənaye Universitetində (ADNSU) fəlsəfə doktoru və elmlər doktoru proqramı üzrə xarici dil imtahanını müvəffəqiyyətlə vermiş iddiaçılar üçün qəbul imtahanı keçirilib.

Fəlsəfə fənni üzrə keçirilən imtahanda ADNSU-dan 50 nəfər namizəd iştirak edib. Ali məktəbin rektoru, professor Mustafa Babanlı namizədlərə koronavirus pandemiyası ilə mübarizədə diqqətli və məsuliyyətli olmağı tövsiyə edərək, imtahanda müvəffəqiyyətlər arzulayıb.

Qeyd edək ki, 3 gün davam edəcək fəlsəfə imtahanında Təhsil Nazirliyinin müvafiq əmrinə əsasən, ADNSU ilə yanaşı, 5 ali təhsil müəssisəsindən - Azərbaycan Texniki,   Azərbaycan Memarlıq və İnşaat, Azərbaycan Dövlət İqtisad, Sumqayıt Dövlət və Bakı Mühəndislik universitetlərindən namizədlər iştirak edəcəklər. İxtisas üzrə imtahanlar isə 9-10 sentyabr tarixlərində olacaq.

Koronavirus pandemiyası ilə əlaqədar karantin rejiminin tələblərinə uyğun,  eyni zamanda şəffaf şəraitdə keçirilən imtahan 8 nəfərdən ibarət komissiya tərəfindən qiymətləndirilib.

Qeyd edək ki, Fəlsəfə fənnindən doktoranturaya qəbul imtahanı növbəti günlərdə- sentyabrın 2-də və 3-də də keçiriləcək. Təhsil Nazirliyinin müvafiq əmrinə uyğun olaraq bu dəfə Azərbaycan Dövlət İqtisad, Sumqayıt Dövlət və Bakı Mühəndislik universitetlərindən qeydə alınmış, doktoranturaya qəbul imtahanında birinci mərhələdən uğurla keçmiş (xarici dildən 25-dən yuxarı bal toplayan) 68 namizəd imtahan verəcək.