Məktəblilərin şahmat üzrə respublika çempionatı

Təhsil Nazirliyinin 2 mart 2009-cu il tarixli 239 nömrəli əmrinə müvafiq olaraq aprelin 4-dən 10-dək Bakıda məktəblilərin şahmat üzrə respublika çempionatı keçirilib. IX-X əsrlərdə yaşamış görkəmli Azərbaycan şahmatçısı Cəlaləddin Naxçıvaninin xatirəsinə həsr olunmuş çempionatda ölkənin müxtəlif şəhər və rayonlarını təmsil edən 46 komanda tərkibində 110 oğlan və 44 qız şahmatçı iştirak edib.

"Təhsil" Respublika  İdman Mərkəzinin İxtisaslaşdırılmış Olimpiya Ehtiyatları Uşaq-Gənclər Şahmat Məktəbində təşkil olunmuş turnir oğlan və qızlar arasında üç yaş qrupu üzrə ayrılıqda "İsveçrə" sistemi ilə keçirilib və 9 turdan ibarət olub. Gərgin və maraqlı idman mübarizəsi şəraitində keçən çempionata aprelin 10-da yekun vurulub. 10 yaşadək oğlanların mübarizəsində "Təhsil" RİM Respublika İxtisaslaşmış Olimpiya Ehtiyatları UGİŞM-nin yetirmələri çingiz Qasımov I, Vüqar Əsədli II, Sumqayıt məktəblisi Məhərrəm Cəfərov III, Qaxdan olan Paşazadə Qax isə IV yeri tutub. Həmin yaş qrupunda qızlar arasında Aytən Səfərova (I yer, Neftçala), Vüsalə Quliyeva (II yer, Dəvəçi), Xalidə Abdullayeva (III yer, RİOEUGŞM) və Zeynəb İsmayılzadə (IV yer, Mingəçevir) fərqlənib.

13 yaşadək oğlanların yarışında Cavidan Babazadə (Lənkəran), Teymur Sultanov (2 N-li UGİŞM), Elvin Bayramov (Quba) və Kənan Mahmudzadə (Sumqayıt) müvafiq olaraq I, II, III və IV yerlərə çıxıblar. Bu yaşdan olan qızlar arasında isə yerlər belə bölünüb: I yer - Məryəm Eyyubzadə (2 N-li UGİŞM); II yer - Sevinc Mirzəyeva  (1 N-li UGİŞM); III yer - Zeynəb Ramazanova (Gəncə); IV yer - Nəcabət Süleymanova (Xaçmaz).

16 yaşlı oğlanların mübarizəsində Anar Ələkbərov (RİOEUGŞM) I, Xəyalə Abdulla (1 N-li UGİŞM) II, Nərmin Kazımova (1 N-li UGİŞM) III, Şücaət Orucov (Masallı) IV olublar. Qızlardan isə Nigar Novruzova (RİOEUGŞM) I, Xədicə Xəlilova (Zaqatala) II, Gülmirə Qocayeva (Gəncə) III, Cəmilə Musayeva (Balakən) IV yeri tutublar. ümumi komanda hesabında 1 N-li UGŞDM I, RİOEUGŞM II, Gəncə III yerə layiq görülüblər.

Bunlarla yanaşı, oğlanlar və qızlar arasında da qalib komandalar müəyyənləşib. 1 nömrəli İGŞDM-nin oğlanlardan ibarət komandası I, RİOEUGŞM-nin komandası II, Gəncə şəhərinin məktəbli oğlanlardan ibarət komandası isə III yeri tutub.

Qızlardan ibarət aşağıdakı komandalar mükafata layiq yerlərə çıxıblar. RİOEUGŞM - I yer, Gəncə - II yer, Neftçala - III yer.

Elə həmin gün yarışların təşkil olunduğu "Təhsil" RİM Respublika İxtisaslaşdırılmış Olimpiya Ehtiyatları Uşaq-Gənclər Şahmat Məktəbində çempionatın bağlanışı və qaliblərin mükafatlandırılması mərasimi keçirilib. Mərasimdə iştirak edən təhsil nazirinin müavini Elmar Qasımov qalibləri təbrik edib, onlara daha böyük idman uğurları arzulayıb. Nazir müavini ölkəmizdə idmana göstərilən qayğıdan, şahmatın inkişafı üçün atılan addımlardan danışıb,  Azərbaycan  idmançılarının  son  illər  mötəbər  idman  turnirlərində  uğurlu  çıxışlarını  bu  qayğıya  layiqli  cavab  kimi  qiymətləndirib,  yeniyetmə  idmançıları  yaradılmış  şəraitdən  istifadə  edərək  öz  ustalıqlarını  daim  artırmağa çağırıb.

Mərasimdə çempionatda I, II və III yerləri tutan gənc şahmatçılara və komandalara Təhsil Nazirliyi tərəfindən diplomlar və qiymətli hədiyyələr təqdim olunub.

Yusif ƏLİYEV