Fransız dilinin tədrisinə dair elmi-praktik konfrans

Martın 17-də Bakı Pedaqoji Kadrların İxtisasartırma və Yenidənhazırlanma İnstitutunun akt zalında "Orta ümumtəhsil məktəblərində fransız dilinin tədrisi: problemlər və perspektivlər" mövzusunda elmi-praktik konfrans keçirildi. İştirakçıları salamlayan BPKİYİ-nin rektoru, professor Asəf Zamanov öncə Novruz bayramı münasibətilə hamını təbrik etdi. Sonra Fransanın tarixi və elmi haqqında qısa məlumat verdi. Hər iki ölkəni birləşdirən bir çox amillərin olduğunu qeyd edən rektor Fransanın elm və təhsilini yüksək qiymətləndirdi. Azərbaycan və Fransa ədəbiyyatlarının qarşılıqlı olaraq tərcümə edilməsi, fransız dilinin öyrənilməsi müstəqillik dövründə xüsusilə vacibdir. Bizim institutun əməkdaşları orta məktəb müəllimlərinin formalaşmasında, problemlərin həll olunmasında, yeni təlim texnologiyalarının tətbiqində, yeni dərsliklərin istifadə olunmasında onlara yaxından kömək edirlər. Bir çox həlli vacib olan məsələlərə diqqətçəkən rektor bu işdə göstərilən qayğıya görə, Təhsil Nazirliyinə minnətdarlığını bildirdi.

Sonra konfransda çıxış edən təhsil nazirinin müavini Elmar Qasımov öncə nazir Misir Mərdanovun adından iştirakçılara uğurlar arzuladı. Bildirdi ki, respublikamız müstəqillik əldə etdikdən sonra xarici ölkələrlə iqtisadi, siyasi, elmi və mədəni əlaqələrimizin genişləndirilməsinin nəticəsidir ki, xarici dillərin öyrənilməsi diqqət mərkəzindədir. İngilis dili ilə  yanaşı fransız dilinin də öyrənilməsini vacib hesab edən E.Qasımov əvvəlcə müəllimlərin yüksək səviyyədə hazırlanmasının vacibliyinə toxundu.

Fransız dilində olan dərsliklərə diqqətçəkən nazir müavini keyfiyyət məsələsindən danışdı. Azərbaycan gənclərinin xaricdə təhsil almaq üçün təsdiqlənmiş proqramını iştirakçıların nəzərinə çatdıran E.Qasımov dövlət hesabına 2015-ci ilə qədər ölkəmizdən 5000-ə qədər gəncin müxtəlif ölkələrə təhsil almaq üçün göndəriləcəyini qeyd etdi. Proqramda Fransa və Almaniya öndə gedir. Bu istiqamətdə müəyyən işlər görülmüşdür.

Sonra Fransanın Azərbaycandakı səfirliyinin mədəniyyət attaşesi cənab Luk Obri keçirilən elmi-praktik konfransın əhəmiyyətinə toxundu, iki ölkə arasında yaradılmış dostluq əlaqələrindən məmnun qaldığını bildirdi. Fransada təhsil alan azərbaycanlı tələbələrin problemləri ilə maraqlandığını dedi. Fransız dilinin başqa ölkələrdə də geniş yayıldığını qeyd edən Luk Obri tədbirin təşkilatçılarına və Azərbaycandakı "Fransız dili" dərsliklərinin müəlliflərinə minnətdarlığını bildirdi. Sonra elmi-praktik konfransda "Fransız dilinin tədrisi problemləri", "Fransız dilinin dünya dilləri sırasında mövqeyi", "Fransız dilinin tədrisində perspektivlər və nailiyyətlər" və digər mövzularda məruzələr dinlənildi. Məruzələr ətrafında müzakirələrdən sonra BPKİYİ-nin rektoru, professor Asəf Zamanov elmi-praktik konfransı yekunlaşdırdı.

Fazil İDRİSOĞLU