NDU-nun müəllim və tələbələri Təbrizdə olublar

Naxçıvan Dövlət Universitetinin memarlıq və mühəndislik fakültəsinin 30 nəfərlik tələbə-müəllim heyəti İran İslam Respublikasının Təbriz şəhərində birgünlük səfərdə olmuşdur.

İstehsalat təcrübəsi xarakterli bu səfərin əsas məqsədi iki qonşu region arasında traktor istehsalı və maşınqayırma sahəsindəki əməkdaşlığı inkişaf etdirmək, İran mütəxəssislərinin bu sahədəki zəngin təcrübələrini öyrənmək, tələbələrin gələcəyin mütəxəssisləri kimi formalaşmasını təmin etməkdən ibarət olmuşdur.

Səfər çərçivəsində heyətin üz tutduğu ünvanlardan birincisi İran Traktor İstehsalı zavodu olmuşdur. İlk öncə zavodun ümumi görünüşünü əks etdirən maketə baxış olmuş, qonaqlara zavod haqqında ətraflı məlumat verilmişdir.

Sonra zavodda iş prosesi ilə əyani tanışlıq olmuşdur. 10 000 nəfər işçi qüvvəsini özündə cəmləşdirən zavodda yüksək keyfiyyətli müasir avadanlıqlar vasitəsilə ildə 30 000- 40 000 arası 6 növdə traktor istehsal olunur.

Daha sonra nümayəndə heyəti zavodun nəzdində fəaliyyət göstərən universitetə gəlmiş, bu sahə üzrə kadr  hazırlanması, tədris prosesi ilə tanış olmuş, bu təhsil ocağına Naxçıvan Dövlət Universitetinin rəhbərliyi adından doğma diyarımızın mənzərələrini, təbiətini əks etdirən tablolar və fotoşəkillər hədiyyə edilmişdir.

Səfər çərçivəsində tələbə və müəllimlər həmçinin daha çox Şəhriyar təxəllüsü ilə tanınan böyük Azərbaycan-İran şairi Seyid Məhəmməd Hüseyn Təbrizinin məzarını ziyarət etmişlər. Ecazkar memarlıq üslubu ilə diqqəti cəlb edən bu abidə kompleksində şairin həyat və yaradıcılığını əks etdirən kitablar, fotoşəkillər buraya gələn qonaqların böyük marağına səbəb olmuşdur. 

Nərmin CƏFƏROVA,

NDU-nun mətbuat

xidmətinin əməkdaşı

Şair məktəblilərin qonağı oldu

Bakının Binəqədi rayonundakı 314 nömrəli orta məktəbdə Azərbaycanın xalq şairi Nəriman Həsənzadənin 77 illik yubileyi ilə əlaqədar görüş keçirildi. Tədbirdə Bakı Şəhəri üzrə Təhsil İdarəsinin nümayəndələri, yazıçı və şairlər, məktəb direktorları, mətbuat işçiləri və digər qonaqlar iştiak edirdilər.

Məktəbin direktoru Vidadi Daşdəmirov  qonaqları salamlayaraq Nəriman Həsənzadənin yaradıcılığı barədə tədbir iştirakçılarına məlumat verdi.

Tədbirdə şairin həyat və yaradıcılığından danışıldı.

Məktəbin müəllimləri və istedadlı şagirdlər şairin bir neçə şeirini məharətlə ifa etdilər, onunla  bağlı xatirələr söylədilər.

Sonda Nəriman Həsənzadə şagirdlərin verdiyi müxtəlif sualları cavablandırdı və görüşdən çox razı qaldığını bildirdi.

Rəşad ZİYADOV