Yalan ayaq tutar, yeriməz

Salyan təhsil işçilərindən Əlövsət Osmanlıya sərt münasibət

Hörmətli redaksiya!

Artıq 10 ilə yaxın bir müddətdir ki, ölkəmizdə təhsil islahatları geniş vüsət almışdır. ümumi təhsilin məzmununun əsaslı şəkildə dəyişdirilməsi, yeni kurrikulumların meydana gəlməsi, təlim strategiyalarının təkmilləşdirilməsi, müasir qiymətləndirmə mexanizmlərinin yaradılması fikrimizə real sübutdur.

Biz müəllimlər yenilikləri, dəyişiklikləri diqqətlə izləyir və bunların müsbət nəticələr verəcəyinə ürəkdən inanırıq. Uzun illərin təcrübəsinə əsaslanaraq deyə bilərik ki, ümumtəhsil sistemində yaranmaqda olan yeniliklər, ilk növbədə, bu gün haqqında daha çox danışılan hafizə məktəbindən təfəkkür məktəbinə keçid prosesi müasir dövrün tələblərinə uyğun gələn yetkin vətəndaşlar yetişdirilməsində önəmli rol oynayacaqdır.

Bu fikrimizin ilk real nümunələri kimi yeni fənn kurrikulumları əsasında yazılmış və carı dərs ilindən I sinif müəllimlərinin və şagirdlərinin istifadəsinə verilmiş dərslik komplektlərini misal gətirə bilərik. Əvvəla, çox sevindirici haldır ki, həmin komplektdə xeyli müddətdən bəri gözlədiyimiz müəllim üçün vəsaiti görə bildik. Eyni zamanda əvvəlkilərlə müqayisədə yeni dərsliklərin tamamilə başqa quruluşda və üslubda hazırlandığının şahidi olduq. Cəsarətlə deyə bilərik ki, bu dərsliklər biz müəllimləri işə yaradıcı münasibət göstərməyə, tədris prosesində yalnız fəal təlim metodlarından istifadə etməyə, eləcə də daha münasib üsul və vasitələr axtarıb tapmağa sövq edir.

Bu reallıqdan irəli gələn daxili rahatlıq, nikbinlik və məmnunluq hisslərini yaşayarkən "Azadlıq" qəzetinin səhifələrində yer tapmış Əlövsət Osmanlının "Həyat bilgisi" və "Riyaziyyat" dərslikləri haqqında "silsilə" yazılarını oxuyanda, doğrudan da, heyrətə gəldik. Biz Ə.Osmanlını əvvəlki illərdə çap olunmuş ibtidai siniflər üçün "Riyaziyyat" dərsliklərinin müəlliflərindən biri kimi tanıyırdiq, hərçənd ki, bu dərsliklər keyfiyyət və orijinallıq baxımından o qədər də nəzərəçarpacaq cəhətlərə malik deyildi, lakin onun bu qədər iddialı, özündən müştəbeh, ambisiyalı olduğunu təsəvvür etməzdik. Məqalə də yazmaq, fikir söyləmək, tənqid də etmək olar. Cəmiyyətimizdə bu, normal hal sayılır. Ancaq gözünü yumub hər şeyə, "yox" demək, ağ olanı qara kimi qələmə vermək və bu yolda böhtandan, şərdən çəkinməmək bədxah əməl sayılır. Bizi dəhşətə gətirən həm də bu oldu ki, Ə.Osmanlı şəxsi mənafeyi, məqsədi naminə öz müəllimi olan hörmətli nazirimizə qarşı təhqiramiz mövqe tutmaqdan belə ar etmədi.

Cənab Osmanlı, bu gün Sizin kitabınız bəyənilmirsə, səbəbini özünüzdə axtarın. Dahi Nizami demişkən, üzünüzdəki ləkəni görüb, güzgünü sındırmaqdansa, o ləkəni silin.

Ə.Osmanlının Dərslikləri Qiymətləndirmə Şurasının qərarına münasibəti də təəccüb doğurur. Onun tərkibində AMEA-nın müxbir üzvləri, Azərbaycanın görkəmli elm adamları olan çox sanballı bir komissiyanın qərarına hörmətsizliyini heç cür anlamaq olmur. Əlövsət müəllim, siz heç kimnən razılaşmaya, fikrinizdə israrlı ola bilərsiniz. Bu, sizin öz işinizdir. Ancaq pedaqoji ictimaiyyətin diqqətini yayındırmağa çalışmağınız bizi çox narahat edir. Elə bu narahatçılığın nəticəsidir ki, biz pedaqoji ictimaiyyətə müraciət edir və Ə.Osmanlının qərəzli mövqeyinə münasibət bildirilməsini xahiş edirik.

Ələsgər Mehdiyev - Salyan Rayon Təhsil Şöbəsinin müdiri, əməkdar  müəllim

Gülşən Piriyeva - Salyan şəhər 7 nömrəli liseyin müəllimi, əməkdar müəllim

Zabit Orucov - Salyan rayon Yuxarı Xalac kənd orta məktəbinin riyaziyyat müəllimi

Tinatin Həsənova - Salyan Rayon Təhsil Şöbəsinin ibtidai siniflər üzrə metodisti

Fərqanə Əliyeva - Salyan rayon Şəkərli kənd orta məktəbinin ibtidai sinif müəllimi

Səkinə Qasımova - Salyan şəhər 3 nömrəli orta məktəbin ibtidai sinif müəllimi

İradə Piriyeva - Salyan şəhər 7 nömrəli liseyin ibtidai sinif müəllimi