Azərbaycan Prezidenti İlham Əliyev YUNESKO-nun Baş direktoru Koişiro Matsuuranı qəbul etmişdir

Azərbaycan Respublikasının Prezidenti İlham Əliyev mayın 14-də Prezident sarayında YUNESKO-nun baş direktoru Koişiro Matsuuranı qəbul etmişdir.

Görüşdə Azərbaycanla YUNESKO arasında əlaqələrin yüksək səviyyədə olduğu, ölkəmizdə bu təşkilatın xətti ilə keçirilən uğurlu tədbirlərin əməkdaşlığın daha da genişlənməsinə töhfə verdiyi bildirildi. Cənab Koişiro Matsuura ilə Azərbaycan Prezidenti arasında keçirilən səmərəli görüşlərin əlaqələrin daha da möhkəmlənməsi baxımından əhəmiyyəti vurğulandı və əməkdaşlığın bundan sonra da dərinləşəcəyinə əminlik ifadə olundu.

AzərTAc

"Avropada subregional çərçivədə savadlılıq problemlərinə baxış: tərəfdaşlıq əlaqələrinin qurulması və innovativ yanaşmaların tətbiqinə dəstək" mövzusunda YUNESKO-nun regional konfransına

Hörmətli konfrans iştirakçıları!

Sizin hamınızı səmimi-qəlbdən salamlayır, hər birinizə uzun ömür, cansağlığı və konfransınızın işinə uğurlar arzu edirəm.

Qloballaşma proseslərinin getdikcə dərinləşdiyi müasir dünyada təhsilin vahid ölkə çərçivəsindən çıxaraq, ümumbəşəri dəyərə çevrildiyi bir şəraitdə sizin savadlılıq problemi ətrafında müzakirələr aparmağınız təqdirəlayiqdir. İnformasiya cəmiyyətinin qurulması yolunda uğurlu addımlar atan Azərbaycan rastlaşdığı yeni tipli problemləri həll etməyə çalışır. Məhz bu baxımdan Bakıda belə bir konfransın keçirilməsi böyük əhəmiyyət kəsb edir və bizə Avropa ölkələrinin müsbət təcrübəsindən bəhrələnmək üçün geniş imkanlar yaradır. Əminəm ki, konfrans YUNESKO ilə əməkdaşlığımızın daha da genişləndirilməsinə öz töhfəsini verəcəkdir.

Bu gün ölkəmizdə savadsızlıq probleminin hələ əlli il bundan əvvəl öz həllini tapdığını düşünənlər əksəriyyət təşkil edir. Sizin konfransınız qloballaşan dünyada savadlılıq anlayışının yeni mənasını açıqlayır və hər bir insanın yaxın gələcəkdə istər əmək bazarında, istərsə də cəmiyyətdə ciddi problemlərlə üzləşə biləcəyindən xəbər verir. Digər tərəfdən, konfransda qoyulan məsələlər vətəndaş cəmiyyətinin bütün strukturları üçün geniş fəaliyyət dairəsi açır və insanların bütün ömür boyu təhsil almalarının zəruriliyini xüsusi vurğulayır.

Sürətli iqtisadi yüksəliş dövrünü yaşayan Azərbaycanda cəmiyyət həyatının strateji sahələrindən olan təhsilə qayğı gündən-günə artırılır. Ermənistan-Azərbaycan, Dağlıq Qarabağ münaqişəsi nəticəsində öz doğma torpaqlarından qovulmuş bir milyondan artıq qaçqın və məcburi köçkünün təhsil problemləri isə daim diqqət mərkəzindədir. ümidvaram ki, onların təhsili ilə bağlı məsələlər də konfransınızın müzakirə obyektinə çevriləcəkdir.

Sözsüz ki, sizin konfrans Avropada savadlılıq səviyyəsinin artırılması istiqamətində atılmış ciddi addım olacaq və YUNESKO-nun təhsillə əlaqədar strateji sənədlərində bəyan etdiyi məqsədlərə çatmaq istiqamətində yeni mərhələ təşkil edəcəkdir.

Dərin hörmətlə,

İlham ƏLİYEV,

Azərbaycan Respublikasının Prezidenti

Bakı şəhəri, 14 may 2008-ci il  

Azərbaycan Respublikasının Prezidenti İlham Əliyev Bakının Binə qəsəbəsində yenidən qurulmuş uşaq bağçasının açılışında iştirak edib

Mayın 9-da Bakının Əzizbəyov rayonunun Binə qəsəbəsində Heydər Əliyev Fondunun dəstəyi ilə yenidən qurulmuş uşaq bağçası istifadəyə verilmişdir.

Mərasimə toplaşanlar Azərbaycan Prezidenti İlham Əliyev və xanımı Mehriban Əliyevanı böyük səmimiyyətlə qarşıladılar.

1970-ci ildə tikilmiş, lakin sonralar yararsız vəziyyətə düşmüş binanın təmirinə bir il bundan əvvəl baslanmışdı. 300 uşaq üçün nəzərdə tutulmuş bağçada məktəbəqədər hazırlıq qrupları da fəaliyyət göstərəcəkdir. Geniş və işıqlı məşğələ otaqları intellektual inkişafa kömək edən müxtəlif əyani vəsait, kitab və plakatlarla, yataq otaqları, mətbəx və yeməkxana müasir avadanlıqla təmin olunmuşdur.

Balacalar bağçanın musiqi zalında Heydər Əliyev Fondunun xüsusi olaraq hazırladığı uşaq musiqilərindən, nağıllardan ibarət disklərə qulaq asa biləcəklər. Burada böyük ekranlı televizor, musiqi mərkəzi, piano və digər avadanlıq var.

Bağçanın hovuzu, eləcə də sağlamlığa xidmət edən bütün idman qurğuları ilə təmin olunmuş idman salonu da vardır. Binada yeni istilik, yanğın təhlükəsizliyi sistemləri də quraşdırılmışdır. Bütün ərazini əhatə edən videosistem nəzarəti balacaların təhlükəsizliyini təmin edəcəkdir. Həyətdə müasir əyləncə kompleksi yaradılmış, attraksion və yelləncəklər quraşdırılmışdır. Uşaq avto-nəqliyyat meydançasında balacalar avtomobil idarə etməklə yanaşı, yol-hərəkət qaydalarını da öyrənə biləcəklər.

Ulu öndər Heydər Əliyevin uşaqlara qayğısını, Prezident İlham Əliyev və Heydər Əliyev Fondunun prezidenti Mehriban xanım Əliyevanın uşaqlarla görüşlərini əks etdirən fotoşəkillər, "Bağçamızın dünəni və bu günü" adlı guşə diqqəti cəlb edir.

Prezident İlham Əliyev və Mehriban xanım Əliyeva bağçanın rəmzi açılışını bildirən lenti kəsdilər.

Uşaq bağçasının otaqları, idman zalı, yemək otağı, musiqi zalı ilə tanış olan dövlətimizin başçısı və xanımı sonra bağçanın həyətində uşaqlarla səmimi söhbət etdilər.

Prezident İlham Əliyev bağçanın müəllim və tərbiyəçilərinə uğurlar arzuladı.

AzərTAc