Norveç krallığının xarici işlər naziri ADU-da

Aprelin 29-da Norveç Krallığının xarici işlər naziri cənab Yunas Qar Störe "Norveç və Azərbaycan-Avropa əməkdaşlığı" mövzusunda Azərbaycan Dillər Universitetində professor-müəllim heyəti və tələbələrlə görüş keçirdi.

Mərasimdə Azərbaycan Diplomatiya Akademiyasının professor-müəllim heyəti və tələbələri də iştirak edirdi. Görüşdən öncə nazir ADU-nun rektoru, millət vəkili, AŞPA-nın sədr müavini Səməd Seyidovla fikir mübadiləsi apardı. Sonra universitetin nəzdindəki Skandinaviyaşünaslıq mərkəzinə baş çəkən Yunas Qar Störe burada həmin ixtisas üzrə təhsil alan 1 və 2-ci kurs tələbələri ilə söhbət etdi. Görüşdə Norveç Krallığının Azərbaycandakı fövqəladə və səlahiyyətli səfiri Yon Ramberqlə yanaşı, bir  sıra  rəsmi  nümayəndələr  iştirak edirdi.

Tədbiri professor S.Seyidov açdı. O, çıxışında Azərbaycan-Norveç əlaqələrindən, bu əlaqələrin daha da inkişaf etdirilməsi zəruriliyindən bəhs etdi. Cənab Yunas Qar Störenin Azərbaycana gəlişi və tələbələrlə görüşməsinin tarixi əhəmiyyət kəsb etdiyini bildirən S.Seyidov həmçinin bu görüşün təşkilinə görə Azərbaycan Diplomatiya Akademiyasının rektoru Hafiz Paşayevə də öz minnətdarlığını bildirdi. Daha sonra professor S.Seyidov çıxış üçün sözü cənab nazirə verdi.

Yunas Qar Störe çıxışını vikinqlərin Qafqaza və Xəzər sahillərinə gəlib çıxması və norveçli səyyah Tur Heyerdalın Azərbaycana səfəri haqqında qeydləri ilə başladı. Bununla nazir Azərbaycan-Norveç əlaqələrinin qədim tarixə malik olduğunu vurğuladı. "Mənimlə Norveç dilində danışan tələbələrlə görüşərkən özümü vətənimdə hiss etdim", - deyən nazir bu dilin Norveçdən kənarda hələ o qədər də geniş yayılmadığını qeyd etdi. Azərbaycan-Norveç əlaqələrindən danışarkən nazir bu əlaqələrin inkişafında Prezident İlham Əliyevin rolunu xüsusilə qeyd etdi.

Görüşdə nazir ADU-nun və Azərbaycan Diplomatiya Akademiyasının tələbələrini maraqlandıran suallara cavab verdi.

Fazil İDRİSOĞLU

Şeir müsabiqəsinin qalibləri mükafatlandırıldı

Masallı Rayon Təhsil Şöbəsi ulu öndərimiz Heydər Əliyevin anadan olmasının 85 illiyi münasibətilə bir sıra maraqlı tədbirlər həyata keçirmişdir. Belə tədbirlərdən biri ümummilli liderimizə həsr olunmuş şeir müsabiqəsindən ibarət oldu.

"Heydər Əliyev - ən böyük Azərbaycanlıdır" devizi altında rayon məktəblilərinin zona mərhələsinin qalibləri aprelin 21-də  Nizami adına mədəniyyət sarayına toplaşmışdılar.

Tədbiri giriş sözü ilə RTŞ müdiri Nurəddin Məlikov açaraq müasir Azərbaycanın memarı  kimi ulu öndərin respublikamızın çiçəklənməsi, elm, təhsil, mədəniyyət və incəsənətin inkişafındakı nəhəng xidmətlərindən geniş bəhs etdi. Şeir müsabiqəsinin final mərhələsinə vəsiqə qazanmış 20 nəfər müsabiqə iştirakçılarını tamaşaçılara təqdim etdi.

Final mərhələsinin iştirakçılarının bir-birindən maraqlı və rəngarəng ifaları alqışlarla qarşılandı.

Rayonun Binə Xocavar orta məktəbinin şagirdi Fidan Dadaşovanın, Digah məktəblisi Gülxar Yasərlinin, Köçəkli kənd orta məktəbinin XI sinif şagirdi ülkər Cabbarovanın, Təzə Alvadı 2 nömrəli orta məktəbin yetirməsi Şəhla Adıgözəlovanın ifaları xüsusilə yaddaqalan oldu.

Mollaoba məktəblisi Nigar Əliyevanın ulu öndərə həsr etdiyi şeiri  tədbir iştirakçılarının və münsiflər heyətinin böyük marağına səbəb oldu.

"Heydər Əliyev - ən böyük Azərbaycanlıdır" şeir müsabiqəsinin qaliblərinə  rayon təhsil şöbəsinin xüsusi fərmanları və qiymətli hədiyyələr təqdim olundu.

Tədbirin sonunda təhsil şöbəsinin müdiri N.Məlikov  qalibləri və onların müəllimlərini təbrik edərək, məktəbliləri apreldə keçiriləcək "Heydər Əliyev azad Azərbaycanın qurucusu və memarıdır" inşa müsabiqəsinə dəvət etdi.

Əhməd SƏMƏDOV,

Masallı rayonundakı Böyük Kolatan kənd

orta məktəbinin müəllimi,

Bəhram YAQUBOV,

Qodman kənd orta məktəbinin müəllimi

"Gənc istedadlar" liseyində elmi-praktik konfrans

Bu günlərdə Bakı Dövlət Universiteti nəzdindəki "Gənc istedadlar" liseyində  görkəmli  yazıçı,  publisist, nasir, tənqidçi  Mir  Cəlal  Paşayevin  100  illik yubileyi ilə əlaqədar  elmi-praktik konfrans  keçirilmişdir. Tədbiri  giriş  sözü  ilə  açan liseyin direktoru,  professor Qasım Hüseynov  gələn  qonaqları  və  tədbir  iştirakçılarını salamladıqdan  sonra  yazıçı Mir Cəlal  Paşayevin çoxşaxəli yaradıcılığından və yüksək insani keyfiyyətlərindən söz açdi.

Sonra  liseyin  Azərbaycan  dili və ədəbiyyat  müəllimi  Afət Abuşova sənətkarın  həyat  və yaradıcılığı  barədə  məlumat verərək "Sağlam  yollarda" ilk kitabının 1932-ci  ildə  çap edilməsindən, Azərbaycan  ədəbiyyatı  üçün  örnək əsərlər  olan "Bir  gəncin   manifesti", "Boy", "Dostumun qonaqlığı", "Həkim", "Yaşıdlar", "Yolumuz hayanadır", "Açıq kitab", "Dirilən  adam", "Təzə  şəhər" və s. hekayə , povest  və  romanlarındakı  ideya- bədii  xüsusiyyətlərindən danışdı. Həmçinin  sənətkarın   1940-cı  ildə  namizədlik dissertasiyası  kimi  müdafiə  etdiyi "Füzuli  şeirinin  poetik  xüsusiyyətləri" adlı  əsərini  dönə-dönə  təkmilləşdirməyi, "Füzuli  sənətkarlığı" adı  ilə ədəbiyyatşünaslığımıza təqdim  etməsi, 1947-ci  ildən  isə  doktorluq dissertasiyasına  mövzu  olaraq XX  əsrdə  Azərbaycan  ədəbiyyatında  "Ədəbi  məktəblər" adlı  yenə  də  çətin  bir mövzuya diqqət yetirməsi vurğulanmışdır. Haqlı  olaraq  qeyd  edilmişdir ki,  Mir  Cəlal  ədəbiyyatşünaslıq  mühiti, ədəbi ictimaiyyət üçün  maraqlı  frazaların  müəllifi  olmuşdur. Onun  S.Vurğun  yaradıcılığının  ilkin  dövründə "Kağız  korlamamışdır", Biz hamımız Mirzə  Cəlilin "Poçt  qutusu"ndan çıxmışıq (Dostoyevskinin "Biz hamımız Qoqolun "Şinel"indən" çıxmışıq fikrinə  əsaslanaraq), "İtə ataram, yada satmaram" ("Bir gəncin manifesti" adlı əsərindən) fikirlərinin  hər kəs üçün  maraq doğuran,  əsərlərinin  əxlaqi-didaktik  cəhətdən  gənc nəslin  tərbiyəsi  üçün  əvəzolunmaz olması diqqətə çatdırılmışdır. O da  qeyd  olunmuşdur ki,  Mir Cəlal 1933-cü  ildən  1978-ci  ilə qədər Azərbaycan  Dövlət   Universitetində  müəllim, professor  və kafedra  müdiri  vəzifələrinə qədər  yüksəlmişdir.

BDU-nun professoru  İfrat  Əliyeva müəllimi  ilə  bağlı  maraqlı  xatirələrini  şagird və müəllim  kollektivi  ilə bölüşmüşdür. Professor Tofiq Hüseynoğlu  da  xatirələrini  varaqlayarkən  onun  elmi işlər seçimində  Mir Cəlal  Paşayevin  yüksək  qayğısından  bəhs  etmişdir.

Tədbir  liseyin  ədəbiyyat müəllimi Yaqut  Hüseynovanın  VII "A"  sinif  şagirdləri ilə birlikdə hazırladığı  "Həsrət" hekayəsi  əsasında  səhnəciklə  tamamlanmışdır.

Xavər ƏLƏKBƏROVA,

Leyla AĞAYEVA,

BDU-nun jurnalistika fakültəsinin

IV kurs tələbələri

 Məktəb kitabxanalarına diqqət artırılmalıdır

Məktəb kitabxanalarında olan dərsliklərin vəziyyəti ilə tanış olmaq üçün Bakının Nərimanov rayonundakı 45 və Yasamal rayonundakı 175 nömrəli orta məktəblərdə olduq.

45 nömrəli orta məktəbin direktoru Nazilə Məmmədova ilə birlikdə kitabxananın işi ilə tanış olanda məlum oldu ki, ixtisasca ingilis dili müəllimi olan Təranə Ələsgərova 19 ildir ki, kitabxananın müdiri vəzifəsində çalışır. Burada saxlanılan dərsliklərin sayı 27.861 ədəddir. 2007-2008-ci tədris ilində isə kitabxanaya şagirdlər üçün 4.407 ədəd təzə dərslik verilmişdir. Məktəb tərəfindən alınmış dərsliklərin qorunub saxlanması üçün xeyli iş görülsə də, kitablar rəflərə səliqəsiz yığılmış, onların hansı siniflərə aid olması ilə əlaqədar lazımi qeydlər aparılmamışdır.

Yasamal rayonundakı 175 nömrəli orta məktəbdə dərsliklərin saxlanılması ilə tanış olduqda isə başqa bir mənzərə ilə qarşılaşdıq. Tədris işləri üzrə direktor müavini Tünzalə Həsənova ilə birlikdə kitabxanaya daxil olduq. Kitabxana ilk anda zirzəmiyə oxşayırdı. Kitabxananın müdiri Xumar Səfərova şəraitsizlikdən gileyləndi. Bildirdi ki, bu darısqal otaqda 30 min dərslik yerləşdirilib. 2007-2008-ci tədris ilində I-XI siniflərə aid Azərbaycan-rus bölməsi üzrə 5825 ədəd kitab almışıq və bu kitabları şagirdlərə paylamışıq.

Şagirdlərə paylanmayan kitablar isə şəraitsiz otaqda şkaflara pərakəndə halda yığılmışdır.

Deməliyik ki, hər il Təhsil Nazirliyi tərəfindən şagirdlərə pulsuz paylanan bu dərsliklərə biganəlik isə yolverilməzdir. Məktəb kitabxanalarında saxlanılan dərsliklər həmişə diqqət mərkəzində olmalı və daim qorunmalıdır.

Şakir CƏFƏROV

 Xalq üçün yaşanmış ömür

Mayın 1-də Bakı şəhərinin Xətai rayonunda fəaliyyət göstərən 287 nömrəli "Zəkalar" liseyinin akt zalında ümummilli lider Heydər Əliyevin 85 illik yubileyinə həsr edilmiş "Biz azərbaycanlıyıq" adlı tədbir keçirildi.

Mərasim başlamazdan qabaq tədbirə qatılan qonaqlar akt zalında şagirdlərin ulu öndər Heydər Əliyevin 85 illik yubileyi münasibətilə hazırladıqları fotostendlərə, albomlara, əl işlərinə maraqla baxdılar.

İştirakçılar zalda yerlərini tutduqdan sonra səhnəyə məktəbin şagirdləri gəldi və ümummilli lider Heydər Əliyevin xatirəsi bir dəqiqəlik sükutla yad edildi.

Danışmaq üçün liseyin direktoru, respublikanın əməkdar müəllimi, biologiya elmləri namizədi Aygün Əhmədliyə söz verildi. Aygün müəllim ulu öndərin keçdiyi mənalı ömür yolundan söz açaraq Heydər Əliyevin SSRİ Nazirlər Sovetinin I müavini vəzifəsinə qədər yüksəldiyini və ittifaq dağılandan sonra Vətənə qayıdaraq müstəqil Azərbaycan Respublikasının memarı və qurucusu olduğunu, bir sözlə, vətən üçün, xalq üçün misilsiz işlər görərək tarixə dönüb bu gün qəlblərdə yaşadığını qeyd etdi.

Mərasimdə çıxış edən Xətai RİH-nin nümayəndəsi Qafur Rəhmanov ümummilli lider Heydər Əliyevin tanınmış dünya siyasətçiləri arasında xüsusi dəst-xətti olduğunu, müdrik siyasətçinin həyatını vətəninin çiçəklənməsinə, xalqının tərəqqisinə sərf etdiyini, digər sahələr kimi təhsilin inkişafına böyük önəm verdiyini, yeniyetmələrin və gənclərin gələcəkdə xoşbəxt yaşamaları üçün əlindən gələni əsirgəmədiyini söylədi. Onun arzu və istəklərinin bu gün layiqli davamçısı Prezident İlham Əliyev tərəfindən inamla davam etdirilməsini diqqətə çatdıran natiq həmçinin adıçəkilən liseyin uğurlarından söz açaraq təhsil ocağının bu gün nailiyyətləri ilə birincilər sırasında olduğunu qeyd etdi.

Yığıncaqda çıxış edən liseyin ədəbiyyat müəllimi, şairə Dilbər Şahbuzun ulu öndər Heydər Əliyevə həsr etdiyi şeiri iştirakçılar tərəfindən alqışlarla qarşılandı.

Tədbir boyunca şagirdlərin ifa etdikləri kompozisiyalar iştirakçılar tərəfindən maraqla dinlənildi.

Sonda məktəbin direktoru Aygün müəllim mərasim iştirakçılarına, qonaqlara, liseyin müəllim və şagird kollektivinə öz dərin təşəkkürünü bildirdi.

Bununla yığıncaq işinə yekun vurdu.

Nizami MİRZƏ