İsraildə Azərbaycan mədəniyyəti guşəsi açılmışdır

Dünya Azərbaycanlılarının Həmrəyliyi Günü münasibətilə İsraildə Azərbaycan mədəniyyəti guşəsi açılmışdır.

Guşə əslən Azərbaycandan olan İsrail vətəndaşlarının yaratdığı Azərbaycan-İsrail (AZİZ) Beynəlxalq Assosiasiyası yanında Azərbaycanın tarixi və mədəni irsinin qorunması komitəsinin rəhbəri Yeganə Salmanın evində fəaliyyət göstərir. Y.Salman bildirmişdir ki, guşədə Azərbaycan müəlliflərinin kitabları, azərbaycanlıların qədim və müasir məişət əşyaları toplanmışdır. üzeyir Hacıbəyovun "Leyli və Məcnun" operasının partiturası, 40 il ərzində toplanmış döş nişanlarından ibarət kolleksiya da guşəyə hədiyyə edilmişdir.

Evdə etnik Azərbaycan otağı da vardır. Əl ilə toxunmuş xalçaların döşəndiyi otaqda milli döşəkələr, mütəkkələr, nərd, samovar, armudu stəkanlar buraya gələnlərə Azərbaycanı xatırladır.

Azərbaycan mədəniyyəti guşəsinin ayrıca binada yerləşdirilməsi və onun nəzdində Azərbaycan dili, milli rəqsləri və peşələri dərnəklərinin yaradılması istiqamətində iş aparılır.

Guşənin açılış mərasimində çıxış edən AZİZ-in prezidenti, İsrail Knessetinin deputatı İosif Şaqal bildirmişdir ki, bakılıları bir yerə toplayan belə bir dostluq mərkəzində qoyulan ənənələr tarixi Vətənlərini unutmamaları üçün gənclərə də aşılanmalıdır. AZİZ-in üzvü professor Fel və başqaları çıxışlarında gənclərin də diaspor işinə fəal cəlb olunmasının və Azərbaycan ilə əlaqələrin qorunub saxlamalarının vacibliyini vurğulamışlar.