Bilik yarışında 13 məktəbli fərqlənib

Mayın 5-də Sumqayıt Dövlət Universiteti və Sumqayıt Şəhər Təhsil Şöbəsinin təşkilatçılığı ilə ümummilli lider Heydər Əliyevin anadan olmasının 95-ci ildönümünə və Azərbaycan Xalq Cümhuriyyətinin 100 illiyinə həsr olunmuş Sumqayıt şəhər məktəblərinin  IX-XI sinif şagirdləri üçün  ilk dəfə olaraq  ingilis, rus, alman dili fənni üzrə  keçirilən “Xarici dil – karyeraya aparan yol” adlı olimpiadanın qaliblərinin  mükafatlandırılma mərasimi olub.

Universitetin rektoru, professor Elxan Hüseynov  olimpiadada qalib olmuş şagirdləri, onların müəllimlərini və valideyinlərini  təbrik edib.

Olimpiadanın qalibləri  Sumqayıt Dövlət Universiteti və Sumqayıt Şəhər Təhsil Şöbəsinin Fəxri fərmanları və qiymətli hədiyyələri ilə mükafatlandırılıblar.

Qeyd edək ki, universitetdə ilk dəfə olaraq xarici dildən keçirilən fənn olimpiadası  2 mərhələdən ibarət olub. Bilik yarışında Azərbaycan və rus bölmələrindən 240 şagird arasında  57 nəfər ikinci tura vəsiqə qazanıb. 13 şagird olimpiadanın  qalibi olub.

Sonda filologiya fakültəsinin dekanı, dosent Sevinc Həmzəyeva, “Xarici dillər” kafedrasının müdiri, professor Nigar İsgəndərova və valideynlər olimpiadanın təşkilində yaradılan şəraitə görə universitetin rektoru, professor Elxan Hüseynova təşəkkürlərini bildiriblər.