Bakıdakı Azər Məmmədov adına  115  nömrəli  tam orta məktəbdə  Azərbaycan Yazıçılar Birliyinin üzvi,  şair Vahid Əzizlə “ Vahid Əziz dünyasının möcüzəsi “ adlı görüş keçirilib.  Şairin şeirlərinə bəstələnmiş mahnıların sədaları altında akt zalına daxil olan müəllim, şagird və qonaqları məktəbin direktoru Məsud Babayev salamlayaraq, tanınmış şairin  yaradıcılığı haqqında geniş məlumat verib. Direktor qeyd edib ki, Vahid Əzizlə  görüş müəllim və şagirdlərin çoxdankı  arzusu idi  və nəhayət, bu gün reallaşdı.

Gecənin aparıcısı, məktəbin 10 ^B sinif şagirdi Lalə Şirinzadə Vahid Əzizin həyat və yaradıcılığı haqqında  məlumat verib. Sonra məktəb şagirdlərinin  ifasında Vahid  Əzizin   məktəbə  və  müəllimlərə olan sonsuz məhəbbətini əks etdirən şeirləri səslənib.

Çıxışında görüş  iştirakçılarını maraqlandıran sualları  cavablandıran  şair onunla belə bir görüşün təşkil edildiyinə və  yaradıcılığına diqqət göstərildiyinə görə məktəb rəhbərliyinə,  poeziya gecəsinin təşkilatçısı, məktəbin Azərbaycan dili  və ədəbiyyat fənn metodbirləşməsinin sədri Nəzakət Cəfərovaya  və tədbirin ərsəyə gəlməsində əməyi olan hər bir kəsə   minnətdarlığını bildirib.

Görüş şair Vahid Əziz və poeziya vurğunları tərəfindən böyük maraq və rəğbətlə qarşılanıb.

Sifai SƏFƏROVA