Naxçıvan Müəllimlər İnstitutunun Təbiət və İncəsənət  fakültəsinin “Təsviri incəsənət müəllimliyi” ixtisası üzrə IV kurs tələbəsi Rəcəbov Mikayıl və III kurs tələbəsi Allahverdiyev Fərhadın fərdi sərgisi açılıb.

Sərgidə təbiət mənzərələri, portretlər,  kompozisiyalardan ibarət 30-dan çox əl işi nümayiş olunub. Əsərlər rəngkarlıq və qrafika janrlarında işlənilib.

Müəllimlər İntitutunun rektoru, dosent Elbrus İsayev ali təhsil müəssisəsində yaradılan yuksək şəraitin tələbələrin təhsillinə və fərdi fəaliyyətlərinə öz müsbət təsirini göstərməklə bərabər, istedadlı gənc rəssamların fərdi sərgilərinin keçirilməsinin artıq bir ənənə halını almasına təkan verdiyini  qeyd edib.

İncəsənət kafedrasının müdiri, Naxçıvan Muxtar Respublikasının  əməkdar rəssamı Cavid İsmayılov bildirib ki,  hər iki tələbənin sərgidə nümayiş olunan əsərlərində rəngkarlıq və qrafika janrı yüksık səviyyədə işlənib. Bundan əvvəl də hər iki tələbə  Rəssamlar Birliyinin təşkil etdiyi sərgilərdə yaxından iştirak edərək bir neçə dəfə I və II dərəcəli diplomlarla təltif olunublar.

Gənc rəssamlar isə çıxışlarında gələcək fəaliyyətlərində bu sərginin daha stimulverici olacağını qeyd ediblər.

Tədbirdə iştirak edən müəllim və tələbələr gənc rəssamların əl işlərini yüksək qiymətləndirib, onlara yaradıcılıq uğurları arzulayıblar.

Hər iki tələbə institutun rektoru tərəfindən diplomla təltif ediliblər.