Naxçıvan Dövlət Universitetində qədim tarixi ənənəsi olan Novruz bayramı tədbirlərinin yekunu olaraq ümumuniversitet Novruz şənliyi keçirilib. Bayram tonqalı yandırıldıqdan sonra İncəsənət fakültəsində təşkil edilən sərgiyə baxış olub.
Universitetin Tədris və tərbiyə işləri üzrə prorektoru, tarix üzrə fəlsəfə doktoru, dosent Rafiq Rəhimov bayram münasibəti ilə universitetin müəllim-tələbə heyətini təbrik edib, xalqımızın milli dəyərlərə önəm verməsi baxımından Novruzun keçirilməsinin əhəmiyyətini vurğulayıb. Qeyd edilib ki, xalqımızın günümüzə qədər yaşatdığı, qoruyub gələcək nəsillərə ötürdüyü, müqəddəsləşdirdiyi Novruz bayramı özündə dünyanın yaranma və yaşam sirlərindən tutmuş, gələcəyə, xoşbəxtliyə, bolluğa ümidini əks etdirir.
“Jurnalistika və kitabxanaçılıq” kafedrasının dosenti, filologiya üzrə fəlsəfə doktoru Sədaqət Nemət “Naxçıvanda Novruz adət-ənənələri” adlı çıxışında qədim Novruz bayramı münasibətilə xalq arasında yayılmış adət-ənənələrdən bəhs edib.
Tədbir İncəsənət fakültəsi tələbələrinin hazırladığı bayram konserti ilə davam edib.
