ADPU-nun Tələbə Gənclər Təşkilatının dəstəyi ilə icra olunan layihədə məqsəd tələbələrdə mütaliəyə marağı artırmaqdır
Azərbaycan Respublikasının Prezidenti yanında Gənclər Fondunun (AzGF) maliyyə dəstəyi və Azərbaycan Dövlət Pedaqoji Universitetinin (ADPU) Tələbə Gənclər Təşkilatının dəstəyi ilə ADPU-da icra olunan "Sabaha baxış" layihəsinin ikinci mərhələsi və finalı keçirilmişdir. Layihə tələbələr arasında kitab mütaliəsinə marağın artırılması və esse yazma, tənqidi təfəkkür bacarıqlarını stimullaşdırmaq məqsədi daşıyır.
Layihənin martın 11-də keçirilən ikinci mərhələsində Tələbə Gənclər Təşkilatının (TGT) sədri Taleh Budaqov ADPU-da tələbələrin asudə vaxtlarını dəyərləndirmələri üçün yaradılan imkanlar, bu yöndə təşkilatın fəaliyyəti və onun dəstəyi ilə universitet tələbələrinin icra etdikləri qrant layihələri haqqında danışaraq "Sabaha baxış"ın da bu layihələrdən biri olduğunu vurğulayıb.
Layihə rəhbəri, Filologiya fakültəsinin III tədris ili tələbəsi Lamiyə Rzayeva ikinci mərhələyə seçilən 30 tələbəyə uğurlar arzulayıb və onlara növbəti seçim mərhələsinin şərtləri barədə ətraflı məlumat verib.
Bu mərhələdə iştirakçılar öncə mütaliə etdikləri 3 bədii əsərin qısa məzmunu haqqında esselər yazıblar. Esselər münsiflər heyəti tərəfindən çevik şəkildə qiymətləndirilərək finala vəsiqə qazanan 10 iştirakçı müəyyən olunub.
Martın 12-də isə müsabiqənin final mərhələsi keçirilib. Finala vəsiqə qazanan iştirakçılar 10 dəqiqə ərzində mütaliə etdikləri əsər haqqında təhlillərini verib, şifahi nitq və nəticəçıxarma qabiliyyətlərini nümayiş etdiriblər. Münsiflər heyətinin qiymətləndirməsinə əsasən ilk üç yerin sahibi bəlli olub. Birinci yerin sahibi Filologiya fakültəsinin tələbəsi Səma Məmmədsalahova, ikinci yerin sahibi Filologiya fakültəsinin tələbəsi Həbib Yolçiyev, üçüncü yerin sahibi isə İbtidai təhsil fakültəsinin tələbəsi Aysel Əsgərova olub. Qaliblər diplom və qiymətli hədiyyələrlə mükafatlandırılıb, eyni zamanda fərqlənən 20 iştirakçı sertikifatla təltif edilib.
Mükafatlandırma mərasimində Sosial və humanitar məsələlər üzrə prorektor, professor Fikrət Rzayev, professor Yaqub Babayev, TGT sədri Taleh Budaqov və layihə rəhbəri Lamiyə Rzayeva iştirak ediblər.
Sosial və humanitar məsələlər üzrə prorektor, professor F.Rzayev qalibləri təbrik edib, bütün iştirakçılara uğurlar arzulayaraq hər bir gəncin qalibiyyətə müvəffəq olmaq gücündə olduğunu vurğulayıb. Professor Y.Babayev gənclərin bədii ədəbiyyata, tənqidi təfəkkürə müsbət münasibətin təzahürü olan bu müsabiqəyə qatılmalarının özünün bir cəsarət nümunəsi olduğunu qeyd edib.
Sonda müsabiqənin təşkilində, seçimlərdə və nəhayət, qaliblərin müəyyən olunmasında əməkləri olan münsiflər heyətinin üzvlərinə təşəkkürnamələr təqdim edilib.
Tədbir iştirakçılarına kitab mütaliəsi ilə bağlı maarifləndirici bukletlər paylanılıb.
