Sentyabrın 16-da Şərur rayonunun Təzəkənd tam orta məktəbinin yeni binası əsaslı təmirdən sonra kollektivin istifadəsinə verilib.
"Azərbaycan müəllimi" qəzetinin Naxçıvan bürosunun məlumatına görə, Naxçıvan Muxtar Respublikasının təhsil naziri Elxan Nəcəfov və Şərur Rayon İcra Hakimiyyətinin başçısı Kamal Cəfərov kollektivlə görüşüblər. Görüşdə son dövrlərdə ölkədə təhsilə göstərilən dövlət qayğısından bəhs edilib, Azərbaycan Respublikası Prezidentinin Naxçıvan Muxtar Respublikasında səlahiyyətli nümayəndəsi Fuad Nəcəflinin təbrikləri kollektivə çatdırılıb.
Məktəbdə yaradılan tədris şəraiti ilə tanışlıq zamanı məlumat verilib ki, 110 yerlik məktəb binasında əsaslı təmir işləri aparılmış, binanın dam örtüyü, qapı və pəncərələri dəyişdirilmiş, suvaq və boyama işləri aparılmışdır. Həmçinin STEAM otağında və fizika kimya laborotoriyasında elektron lövhə quraşdırılmış, kompüter otağına yeni kompüter dəstləri qoyulmuş, məktəbə kamera sistemləri quraşdırılmış, kitabxana əlavə ədəbiyyatlarla zənginləşdirilmişdir. Məktəb üçün fərdi qazanxana yaradılmış, binanın həyətində açıq idman qurğuları quraşdırılmış, həyatyanı sahədə abadlıq işləri aparılmış, yaşıllıq sahəsi salınmış, işıqlandırma və suvarma sistemləri yenilənmişdir.
Məktəbin kollektivi onlar üçün yaradılan tədris şəraitinə görə minnətdarlıqlarını bildiriblər.
