11 Sentyabr 2024
160

Bu gün tikinti-təmir işləri qısa müddət əvvəl bitən Masallı rayonu Qəzvinoba kənd ümumi orta məktəbinin təntənəli açılış mərasimi keçirilib.
 
"Azərbaycan müəllimi" xəbər verir ki, açılışda Masallı Rayon İcra Hakimiyyətinin başçısı Araz Əhmədov, Elm və Təhsil Nazirliyinin İnsan Resursları şöbəsinin müdiri Çapay Məmmədov, Lənkəran-Astara Regional Təhsil İdarəsinin müdiri Bəhruz Mehdiyev, Masallı Təhsil sektorunun müdiri Qoşqar Hətəmov və digər rəsmilər iştirak ediblər. 180 yerlik və 3 mərtəbəli bu təhsil müəssisəsi, yeni nəsil texnoloji avadanlıqlarla təchiz edilərək şagirdlərə keyfiyyətli təhsil üçün ən müasir şərait yaradıb.
 
Məktəbin açılışında çıxış edən məktəb direktoru Sevda Nuriyeva, kənd sakinləri Cabir Hüseynov,  Afərin Əliyev və başqaları Prezident İlham Əliyevə və Birinci vitse-prezident Mehriban xanım Əliyevaya məktəbin tikintisinə göstərdikləri dəstəyə görə dərin minnətdarlıqlarını bildiriblər. Onlar təhsilə göstərilən qayğını yüksək qiymətləndirərək, bu kimi layihələrin Azərbaycanın hər bir bölgəsində gənclərin təhsil almaq imkanlarını genişləndirdiyini və ölkənin ümumi inkişafına böyük töhfə verdiyini vurğulayıblar.
 
Qeyd edək ki, qəzalı vəziyyətdə olan Masallı rayonu Qəzvinoba kənd ümumi orta məktəbinin yenidən tikilməsi ilə bağlı sərəncam Azərbaycan Respublikasının Prezidenti tərəfindən 2021-ci ildə imzalanıb.
 
Masallı rayonu Ərkivan qəsəbə 5 saylı ümumi orta məktəbdə gedən təmir işlərinə də yerində baxış keçirilib. 
 
Masallı Rayon İcra hakimiyyəti başçısı Araz Əhmədov, Elm və Təhsil Nazirliyinin insan resursları şöbəsinin müdiri Çapay Məmmədov, Lənkəran-Astara Regional Təhsil İdarəsinin müdiri Bəhruz Mehdiyev, Masallı Təhsil sektorunun müdiri Qoşqar Hətəmov və digər rəsmilər təhsil müəssisəsini ziyarət edərək görülən işlərlə yerində tanış olublar.
 
Tədbirdə görülən işlərlə bağlı məlumat verən qəsəbə sakini, xeyriyyəçiləri təmsil edən Cəfər Cəfərov qeyd edib ki, Masallı rayonunun Ərkivan qəsəbə  5 saylı ümumi orta məktəb 1928-ci ildə inşa edilib. Məktəb binası üç korpusdan ibarət olub, zamanla müəyyən dərəcədə köhnəlib. Hazırda Ərkivan qəsəbəsinin xeyriyyəçiləri tərəfindən yeni tədris ilinin başlanması ərəfəsində şagirdlərin daha səliqəli, təmirli tədris ocağında təhsil almaları üçün məktəbin 10 sinif otağında əsaslı təmir tikinti işləri aparılır.
 
Nilufər HACILI
Lənkəran-Astara üzrə regional təmsilçi