2023-2024-cü tədris ilinin yekunu olaraq peşə təhsil müəssisələrində buraxılış qruplarında müxtəlif ixtisaslar üzrə ixtisas (sınaq) istehsalat işlərinin qiymətləndirilməsi aparılır.
Bu barədə "Azərbaycan müəllimi"nə Peşə Təhsili üzrə Dövlət Agentliyindən məlumat verilib. Bildirilib ki, proses peşə təhsili pilləsində təhsilalanların attestasiyasının aparılması qaydalarına uyğub olaraq həyata keçirilir.
Qeyd edək ki, peşə təhsili pilləsində təhsilalanların attestasiyasının aparılması qaydalarına əsasən, buraxılış qruplarında (sonuncu kurs) təhsil alan tələbələrin ixtisas (sınaq) istehsalat işləri təhsil proqramına (kurikuluma) uyğun olaraq istehsalat təcrübəsinin son ayı ərzində yerinə yetirilir. Bir tələbənin ixtisas sınaq işi ən çox 8 saat ərzində qiymətləndirilir. İxtisas (sınaq) istehsalat işlərinin siyahısı və məzmunu işəgötürənlərlə razılaşdırılmaqla peşə təhsili müəssisəsinin rəhbəri tərəfindən təsdiq olunur.
