Bakı Dövlət Universitetinin (BDU) Tələbə Gənclər Təşkilatı və “Qeyd-Sosial Maarifləndirmə” İctimai Birliyinin birgə təşkilatçılığı ilə Ümummilli Lider Heydər Əliyevə həsr olunmuş “Heydər Əliyev -Unudulmaz Lider” adlı fotoxalça sərgisinin təqdimatı keçirilib.
Əvvəlcə iştirakçılar sərgi ilə tanış olublar.
Tədbirdə çıxış edən BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev bildirib ki, müasir Azərbaycan dövlətinin qurucusu, BDU-nun dünyaşöhrətli məzunu, Ümummilli Lider Heydər Əliyev milli dövlətçilik salnaməsində öyrənilməsinə hər zaman ehtiyac duyulan zəngin bir irs yaradıb. Onun tədqiqi və təbliği ölkəmizdə, ölkə hüdudlarından kənarda və ən əsası BDU-da daim davam etdirilir. 2023-cü ildə “Heydər Əliyev İli” çərçivəsində BDU-nun Tədbirlər Planı təsdiqlənib və uğurla icra olunub. BDU tərəfindən ötən il Ulu Öndərə həsr edilmiş 200-dən çox beynəlxalq, elmi, akademik, sosial tədbir və layihə həyata keçirilib, monoqrafiyalar, elmi və elmi-kütləvi məqalələr dərc olunub. Ümummilli Liderin çoxşaxəli fəaliyyətinin öyrənilməsi istiqamətində işlər bu il də davam etdirilir. Ə.Ağamirzəyev keçirilən sərginin Ulu Öndərin zəngin irsinin təbliği baxımından olduqca əhəmiyyətli olduğunu bildirib.
Milli Məclisin deputatları Könül Nurullayeva, Səbinə Xasayeva çıxışlarında sərginin təşkilini yüksək qiymətləndiriblər.
Sonda "Qeyd-Sosial Maarifləndirmə" İctimai Birliyinin sədri Tural Nurməmmədov vurğulayıb ki, sərgidə Ümummilli Liderə məxsus xüsusi fotoların əks olunduğu 44 xalça nümayiş etdirilir.
