Azərbaycan Memarlıq və İnşaat Universiteti (AzMİU) memarlıq konstruksiyaları və abidələrin bərpası kafedrasının professoru olmuş, Azərbaycanın əməkdar memarı Tofiq Abdullayevin xatirəsi anılıb.
Anım tədbirində AzMİU-nun rektoru professor Gülçöhrə Məmmədova, universitetin, o cümlədən memarlıq fakültəsinin professor-müəllim heyəti və Tofiq Abdullayevi tanıyanlar iştirak ediblər.
Rektor G.Məmmədova görkəmli memarın zəngin fəaliyyətindən, Azərbaycanın milli memarlıq sənətinə verdiyi töhfələrdən danışıb. Bildirib ki, uzun müddət memarlıq konstruksiyaları və abidələrin bərpası kafedrasının professoru olmuş Tofiq Abdullayev Azərbaycanın milli memarlıq ənənələrini öz yeni axtarışları ilə daim zənginləşdirib, memarlığın elm kimi təşəkkülündə, ölkə üçün yüksək ixtisaslı kadrların hazırlanmasında müstəsna xidmətlər göstərib.
Professor G.Məmmədova görkəmli memarın layihəsi əsasında AzMİU-da tədris laboratoriyası, İdman Kompleksinin tikilməsi, eləcə də çalışdığı kafedranın memar alimləri ilə birgə həyata keçirdiyi Şəkinin Kiş, Qəbələnin Nic kəndində məbədlərin bərpası, Qaxda Qum məbədinin konservasiya işlərini xatırladıb.
Alimin 40-dan çox elmi əsərin müəllifi, 3 kitabın həmmüəllifi olduğunu deyən rektor qeyd edib ki, T.Abdullayev ömrünü sevdiyi sənətə həsr edən görkəmli memar, pedaqoq, vətənini, millətini böyük məhəbbətlə sevən ziyalı olub.
Azərbaycan Memarlar İttifaqı İdarə heyətinin sədri professor Elbay Qasımzadə görkəmli memar haqqında fikirlərini bölüşüb. Qeyd edib ki, Bakı şəhərinin hazırkı memarlıq simasında T.Abdullayevin layihəsi əsasında inşa edilən tikililər xüsusi əhəmiyyətə malikdir.
Xatirə tədbirində görkəmli memar və pedaqoq T.Abdullayev ilə birgə çalışan AzMİU-nun müəllimləri, T.Abdullayevin yaxınları da xatirələrində onu gözəl alim, cəfakeş müəllim, ləyaqətli ziyalı kimi xarakterizə ediblər.
