Mərhum tələbə Leyla Babayevanın sərgisi açılıb
Azərbaycan Memarlıq və İnşaat Universitetinin (AzMİU) memarlıq fakültəsinin mərhum tələbəsi Leyla Babayevanın xatirə sərgisi açılıb. Sərgidə L.Babayevanın qısa ömür kəsiyində ərsəyə gətirdiyi çox sayda və müxtəlif mövzuda əsərləri nümayiş olunub.
Xatirə sərgisində AzMİU-nun rəhbərliyi, mərhum tələbənin valideynləri, müəllimləri və tələbə yoldaşları iştirak ediblər.
Memarlıq fakültəsinin dekanı professor Zahidə Məmmədova çıxış edərək Leylanın bir ildən də qısa tələbəliyini xatırlayaraq onun yaradıcı ruhu, potensialı və istedadı haqqında danışıb: “Leyla Babayevanın əsərlərinin zənginliyi və say çoxluğu, onun özünə qarşı müstəsna tələbkarlığı sanki tələsdiyini göstərir. Bəlkə də o bilirdi ki, ömür vəfa etməyəcək, buna görə də sürətlə işləyir, yaradırdı”.
Memarlıq layihələndirilməsi və şəhərsalma kafedrasının müdiri, Memarlar İttifaqının İdarə Heyətinin sədri professor Elbay Qasımzadə mərhum tələbənin əsərlərinə diqqət çəkərək onun gənc yaşında püxtələşdiyini, peşəkar yaradıcılıq mərhələsinə qədəm qoyduğunu qeyd edib.
Mexanika və informasiya texnologiyaları fakültəsinin dekanı, Leylanın fənn müəllimi Sabir Məmmədov mərhum tələbənin xarakterik xüsusiyyətlərindən danışıb, onun incə ruha, böyük yaradıcılıq zövqünə və istedada sahib olduğunu vurğulayıb.
Digər müəllimləri də çıxışlarında Leyla ilə bağlı xatirələrindən, mərhum tələbənin yarımçıq qalan, lakin heyranedici yaradıcılığından danışıblar.
Leyla Babayevanın valideynləri sərgiyə görə universitet rəhbərliyinə, memarlıq fakültəsinin müəllim və tələbələrinə təşəkkür ediblər.
Daha sonra sərgiyə baxış keçirilib. Sərgidə Leyla Babayevanın kətan üzərində yağlı boya ilə çəkdiyi 50-dən çox əsəri nümayiş olunub.
Sərgidə xüsusi diqqət çəkən digər məqam isə Leylanın tələbə yoldaşlarının hazırladığı “Venesiya Güşəsi” olub. Belə ki, mərhum tələbə gələcəkdə Venesiyaya getməyi, orada əsərlər çəkməyi arzulayıb. Tələbə yoldaşları şəhəri xatırladan güşə yaradaraq onun portretini həmin güşədə yerləşdirib, Leylanın yarımçıq qalan Venesiya xəyallarını gerçəkləşdirməyə çalışıblar.
