Bakı Mühəndislik Universitetində (BMU) BMU-İNHA ikili diplom proqramı çərçivəsində Rəhbər Komitənin iclası keçirilib. Bu məqsədlə Azərbaycana səfər edən İNHA Universitetinin nümayəndə heyəti BMU-da olub.
BMU-nun rektoru, professor Havar Məmmədov “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”ndan bəhs edib. Bildirib ki, artıq 2 ildir BMU ilə Cənubi Koreyanın İNHA Universiteti arasında ikili diplom proqramı çərçivəsində İnformasiya texnologiyaları, İnşaat mühəndisliyi, Elektronika mühəndisliyi və Elektrik mühəndisliyi ixtisasları üzrə keyfiyyətli kadr hazırlığı həyata keçirilir.
Proqramın dövlət tərəfindən maliyyələşdiyini söyləyən H.Məmmədov Təhsil Nazirliyi tərəfindən bu proqramın icra olunmasına xüsusi diqqət göstərildiyini deyib. Rektor ikitərəfli müqaviləyə uyğun olaraq bütün məsələlərin operativ həllini tapdığını, təşkilati məsələlərin yüksək səviyyədə gerçəkləşdiyini diqqətə çatdırıb.
BMU-nun professor-müəllim heyəti üçün İNHA Universitetində bu ilin yay aylarında keçirilməsi planlaşdırılan təlimə toxunan ali təhsil müəssisəsinin rəhbəri Koreyanın iqtisadi cəhətdən inkişaf etdiyini, onun təhsil sisteminin müsbət tərəflərini təbliğ etməyin vacibliyini önə çəkib.
Çıxışının sonunda ikili diplom proqramının üstünlüklərindən danışan H. Məmmədov görüşün faydalı olacağına əminliyini ifadə edib.
Sonra təhsil nazirinin müşaviri Nicat Məmmədli ölkəmizdə hazırda icra olunan ikili diplom proqramlarının tətbiqinin universitetlərin ikitərəfli əlaqələrinin yaxşılaşdırılmasına, tədqiqat imkanlarının genişləndirilməsinə, onların dünya standartlarına uyğunlaşmasına, beynəlxalq reytinqlərdə daha yüksək yerlərə qalxmasına yaxşı imkan və şərait yaratdığını bildirib. BMU ilə İNHA Universitetinin ikitərəfli əməkdaşlığının çox uğurlu olduğunu vurğulayan nazirlik rəsmisi hər iki ali təhsil ocağının icra olunan ikili proqramdan müəyyən faydalar əldə edəcəyini dilə gətirib. N.Məmmədli bu əməkdaşlığın gələcəkdə daha da inkişaf edəcəyinə ümidvar olduğunu deyib.
İNHA Universitetinin Tədqiqat və xarici əlaqələr üzrə vitse-prezidenti Hye Wook Won təmsil etdiyi ali təhsil ocağının bu proqramda maraqlı olduğunu bildirib. İDP tələbələrinin İNHA Universitetində yay məktəbində iştirakından söz açan Hye Wook Won koreyalı professorların da BMU-ya səfərindən danışıb. Rəhbər Komitənin iclasının hər semestr bir dəfə olmaqla, ildə 2 dəfə keçirildiyini bildirən universitet təmsilçisi payız semestri üzrə iclasın Koreyada baş tutacağını söyləyib.
Daha sonra BMU-İNHA ikili diplom proqramının direktoru Humay Cəfərli geniş təqdimatla çıxış edib. Proqram direktorunun 2021-ci ilin maliyyə hesabatı və payız semestrinin tədris nəticələri ilə bağlı məruzəsi dinlənilib.
İclasda gündəlikdə duran məsələlər ətrafında geniş müzakirələr aparılıb və səs çoxluğu ilə təsdiq olunub.
