Azərbaycan Dövlət Neft və Sənaye Universitetində (ADNSU) XI Məzun-Karyera Sərgisi keçirilib. Onlayn formatda baş tutan sərgidə 82 dövlət qurumu və özəl şirkət tərəfindən 234 vakant iş yeri, 270 təcrübə yeri təqdim olunub.

ADNSU-nun rektoru, professor Mustafa Babanlı qeyd edib ki, son illər ənənəvi olaraq keçirilən Məzun-Karyera sərgiləri gənc mütəxəssislərin birbaşa şirkət nümayəndələri ilə təmas qurmasında mühüm platformadır. Məzunların işlə təmin olunmasını hər zaman diqqətdə saxladığını deyən rektor mövcud tələblərə uyğun ixtisaslı və savadlı mütəxəssislər hazırlamağın vacibliyini vurğulayıb, bu işdə istehsalat müəssisələri ilə müştərək işləməyin önəmli olduğunu diqqətə çatdırıb.

Sərgidə Dövlət Məşğulluq Agentliyinin İdarə Heyətinin sədri Mustafa Abbasbəyli çıxış edərək Azərbaycanda gənclərə göstərilən diqqət və qayğıdan söz açıb. Qeyd edib ki, belə sərgilərin təşkili önəmlidir, tələbələr və universitetlərlə olan işbirliyi həm də əmək bazarına olan tələbləri ehtiva edir. O əlavə edib ki, hədəf olaraq gənclərin ixtisaslı mütəxəssis kimi yetişməsi ilə yanaşı, əmək bazarına və ixtisasına uyğun işlə təmin olunması daim diqqət mərkəzində saxlanılmalıdır.

Universitetin İctimaiyyətlə Əlaqələr və Marketinq Departamentinin direktoru Bəhruz Nəzərov "career.asoiu.edu.az" saytı haqqında məlumat verib. Bildirib ki, hər kəs sayta daxil olub, özəl və dövlət qurumlarının təqdim etdiyi vakant iş yerləri ilə tanış ola, müvafiq şirkət, daha sonra vəzifəni seçib CV-lərini göndərə bilər.

Digər dövlət və özəl şirkətlərin nümayəndələri də çıxışlarında sərginin əhəmiyyətindən, əməkdaşlıq perspektivlərindən danışıb, həmçinin, vakant iş yeri, təcrübə yerləri haqqında məlumat veriblər.