Lənkəran Dövlət Universitetində (LDU)  bu gündən ənənəvi təhsilə start verilib.Yeni tədris ilinin ilk dərsləri  Anım Gününə həsr edilib. Bütün fakültələrdə ilk dərslərdə Vətən müharibəsində qəhrəmancasına döyüşmüş, bayrağımızı işğaldan azad edilən torpaqlarda dalğalandırmış, ölkənin ərazi bütövlüyü yolunda canlarını fəda etmiş  şəhidlərdən, Azərbaycan  Ordusunun Ali Baş Komandanı İlham Əliyevin rəhbərliyi altında qazanılan döyüş uğurlarından söz açılıb. Ölkə başçısının 2020-ci il dekabrın 2-də imzaladığı sərəncamla sentyabrın 27-si tarixinin Azərbaycanda Anım Günü elan edildiyi , 44 günlük  hərbi əməliyyatların Azərbaycan tarixinə Vətən müharibəsi, İkinci Qarabağ savaşı, “Dəmir yumruq” əməliyyatı  kimi düşdüyü, ölkəmizin suverenliyi və ərazi bütövlüyü uğrunda müharibədə əsgər və zabitlərimizin əsl qəhrəmanlıq nümunələri göstərdiyi barədə tələbələrə ətraflı məlumat verilib, LDU-nun şəhid tələbə və məzunlarının xatirəsi ehtiramla  anılıb.

Qeyd edək ki, LDU-da ənənəvi tədris zamanı mövcud pandemiya şərtlərinə tam şəkildə əməl edilir. COVID-19 pandemiyasına görə vaksinasiya olunmuş müəllim və tələbələr yoxlanışdan sonra universitetə buraxılır. Universitet ərazisində, həmçinin auditoriyalarda fiziki məsafə gözlənilir, şəxsi gigiyena qaydalarına  nəzarət olunur.