Mingəçevir Dövlət Universitetində (MDU) bir qrup mingəçevirli könüllü gənclər üçün təşkil edilmiş “Şəxsi inkişaf və karyera planlaşdırılması” adlı təlimlər uğurla başa çatıb.

Universitetdən bildirilib ki, proqram çərçivəsində ali məktəbin təcrübəli akademik və inzibati heyət üzvləri tərəfindən “Komanda ilə işləmə bacarıqları”, “Karyera və şəxsi inkişaf”, “Effektiv ünsiyyət”, “MDU-da təhsil almağın üstünlükləri”, “Əmək bazarı”, “Təqdimat bacarıqları” və “Bədən dili” mövzularında təlimlər keçirilib.

Təlimlərdə komandada işin təşkili və bölgüsü, sosial məsuliyyət, hədəflərin düzgün seçilməsi, uğura gedən yol və karyera planlaşdırılmasının mərhələləri, fərdin şəxsi inkişafı üçün zəruri olan meyarlar, yumşaq bacarıqlar, cəmiyyətə faydalılıq və karyera yüksəlişi baxımından diqqət yetirilməli məqamlar, əmək bazarında mövcud vəziyyət və başlıca trendlər, MDU-da təhsilalanların karyera inkişafı imkanları və perspektivləri barədə ətraflı məlumat verilib.

Proqramın sonunda öz təəssüratlarını bölüşən və yüksək məmnunluqlarını ifadə edən təlim iştirakçıları bu tipli tədbirlərin təşkilində əməyi olan universitetin bütün rəhbər, inzibati və akademik heyət üzvlərinə təşəkkürlərini bildiriblər.