Təhsil ocağında valideyn-müəllim münasibətləri müzakirə edildi

Martın 3-də T.İsmayılov adına "İntellekt" liseyində valideyn-müəllim münasibətlərinə həsr olunmuş "dəyirmi masa" keçirildi.

Tədbirdə təhsil naziri Misir Mərdanov, Bakı Şəhəri üzrə Təhsil İdarəsinin müdiri Nailə Rzaquliyeva, Təhsil Nazirliyinin şöbə müdiri Arif Muradov, Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva, Azərbaycan Milli Valideyn-Müəllim Assosiasiyasının icraçı direktoru Təranə Şərifova və paytaxtın bir sıra məktəblərinin direktorları iştirak edirdilər.

öncə "dəyirmi masa" iştirakçıları təhsil müəssisəsini gəzərək burada şagird və müəllimlər üçün yaradılmış şəraitlə tanış oldular. İKT avadanlıqları ilə təmin olunmuş fənn kabinetlərinə, laboratoriyalara baş çəkən qonaqlar burada aparılan tədris prosesini izlədilər.

Sonra müəllimlərin, şagird və valideynlərin iştirakı ilə "dəyirmi masa" öz işinə başladı. "İntellekt" liseyinin direktoru Ceyran Kuliyeva  rəhbərlik etdiyi liseydə "Valideyn-müəllim münasibətlərinin təşkili" mövzusunda təqdimat etdi. Təqdimatda  liseydə valideyn-müəllim münasibətlərinin qurulması mexanizmindən, məktəb büdcəsinin formalaşdırılması və şəffaflığı ilə bağlı görülən işlərdən, liseyin rəhbərliyi ilə şagird, valideyn arasında bağlanılan müqavilədən, bu müqavilədə liseyin rəhbərliyinin, həmçinin valideynlərin hansı funksiyaların icrasını öhdələrinə götürmələrindən, liseyə qəbul üzrə müsabiqələrdə valideynlərin iştirakının təmin olunmasından, sinif rəhbərləri, fənn müəllimlərinin təyinatı zamanı valideyn və yuxarı sinif şagirdləri arasında keçirilən rəy sorğusunun nəticələrinin nəzərə alınmasından, hər ayın sonunda şagirdlərin ay ərzində müxtəlif fənlər üzrə nailiyyətlərinin yazılı şəkildə valideynlərə çatdırılmasından, liseyin gələcək perspektivlərində valideynlərin rəy və təkliflərinin nəzərə alınmasından, onların sinifdənxaric və məktəbdənkənar tədbirlərə yaxından cəlb olunmasından və digər məsələlərdən söz açıldı,təhsilin keyfiyyəti ilə bağlı valideynlər arasında  keçirilən rəy sorğusunun nəticələri  açıqlandı. Ceyran xanım bildirdi ki, liseyin müəllimləri valideynlərlə  daim əlaqə saxlayır, valideynlər  təhsil müəssisəsində aparılan təlim və tərbiyə prosesində yaxından iştirak edirlər. Valideyn-muəllim əməkdaşlığını daha da genişləndirmək, fəallığını artırmaq məqsədilə liseydə Valideyn-Müəllim Assosiasiyasının təşkil olunması qərara alınıb.

Azərbaycan Milli Valideyn-Müəllim Assosiasiyasının icraçı direktoru Təranə Şərifova rəhbərlik etdiyi qurumun məqsəd və məramından söz açdı. Qeyd etdi ki, valideynlər uşaqlarının təlim- tərbiyə prosesində , qərarların qəbulunda, məktəbin ictimai həyatında fəal iştirak etməlidirlər.Məktəblər  də artıq ailə ilə birgə əməkdaşlıq etmək məqsədilə  əhəmiyyətli  işlər həyata keçirir, bir çox təhsil müəssisələrində Valideyn-Müəllim Assosiasiyası yaranıb.

Təhsil naziri Misir Mərdanov çıxış edərək son illər  ölkəmizin  bütün sahələrində olduğu kimi, təhsildə də mühüm işlərin aparıldığını, yeniliklərin tətbiq edildiyini söylədi. Nazir qeyd etdi ki, ölkə başçısı cənab İlham Əliyevin  diqqət və qayğısı nəticəsində Azərbaycan təhsili inkişaf edir. Bu gün təhsil müəssisələrimizdə əlverişli təlim mühiti yaranıb. Təlim-tərbiyə prosesində valideynlərin rolundan söz açan təhsil naziri, onların övladlarının oxuduqları təhsil müəssisələri ilə əlaqələrinin vacibliyini "dəyirmi masa" iştirakçılarının nəzərinə çatdırdı. Nazir bildirdi ki, bu gün valideyn öz övladının daha yüksək bilik almasını istəyirsə, onunla evdə məşğul  olmaqla yanaşı, təhsil aldığı məktəbin  rəhbərliyi, müəllimləri ilə əlaqə  saxlamalıdır. İmkan tapdıqca uşaqlarının dərslərində iştirak etməli, onların hazırlıq səviyyələri ilə mütəmadi olaraq maraqlanmalıdır.

Dünyanın  bir çox ölkələrində məktəb-valideyn əməkdaşlığının mövcudluğundan danışan  nazir Misir Mərdanov bunun əhəmiyyətli bir iş olduğunu dedi. Nazir valideynlərin məktəblə əlaqələrinin səmərəliliyinin artırılmasında direktor və müəllimlərin rolunu xüsusi qeyd edərək, bununla bağlı tədbir iştirakçılarına öz tövsiyələrini verdi. Təhsil naziri məktəb-valideyn-şagird münasibətlərinin tənzimlənməsində bir sıra məqamlara aydınlıq gətirərək fikir və mülahizələrini söylədi.

Geniş fikir mübadiləsi şəraitində keçən tədbirdə həmçinin liseyin valideynləri  və müəllimləri də çıxış etdilər.

"Dəyirmi masa"dan sonra iştirakçılar idman zalında liseyin  beşinci sinifləri  arasında keçirilən "Şən startlar" yarışına baxdılar. Yarışın qaliblərinə təhsil naziri Misir Mərdanov, gənclər və idman nazirinin müavini İntiqam Babayev və Pekin Yay Olimpiya Oyunlarının qızıl medalçısı Elnur Məmmədli  kubok və medalları təqdim etdilər.

Samirə HüSEYNQIZI