Polşa Prezidenti Lex Kaçinskiyə Bakı Slavyan Universitetinin fəxri doktoru diplomu təqdim edilib

İyulun 3-də Bakı Slavyan Universitetində Polşa Respublikasının Prezidenti Lex Kaçinskiyə BSU-nun fəxri doktoru diplomunun təqdim edilməsi mərasimi keçirilmişdir.

Universitetdə Polşa Prezidentini səmimiyyətlə qarşılamışlar. Tələbələr ali qonağa gül-çiçək dəstələri təqdim etmişlər.

Polşa dövlətinin başçısı və nümayəndə heyətinin üzvləri BSU-da fəaliyyət göstərən Polyak dili və Mədəniyyəti Mərkəzinin işi ilə tanış olmuşlar. Bu ali məktəbdə "Polşaşünaslıq" ixtisası üzrə təhsil alan tələbələr Polşa Prezidentini onun ana dilində səmimi salamlamışlar. Lex Kaçinski mərkəzin "Fəxri Qonaqlar Kitabı"na ürək sözlərini yazmışdır.

Sonra universitetin akt salonunda təntənəli mərasim keçirilmişdir. Tələbələr xorunun ifasında "Haudeamus" tələbə himni səslənmişdir.

Mərasimi universitetin rektoru, professor Kamal Abdullayev açmışdır.

BSU-nun rektoru universitetin professor-müəllim heyəti və tələbələri adından ali qonağı salamlayaraq bildirmişdir ki, 2009-cu il iyunun 30-da ali məktəbin Elmi Şurası Prezident Lex Kaçinskinin Polşa ilə Azərbaycan arasında əməkdaşlığın inkişaf etdirilməsində, Azərbaycan və polyak xalqları arasında dostluq əlaqələrinin möhkəmlənməsində, ölkələrimiz arasında elm, təhsil və mədəniyyət sahələrində münasibətlərin genişləndirilməsində və dərinləşdirilməsində xidmətlərinə görə ona Bakı Slavyan Universitetinin fəxri doktoru diplomu verilməsi haqqında yekdilliklə qərar qəbul etmişdir.

Rektor qeyd etmişdir ki, ümummilli lider Heydər Əliyevin fərmanı ilə yaradılmış Bakı Slavyan Universiteti Azərbaycan xalqı ilə polyak xalqı, habelə digər slavyan xalqları arasında mənəvi, elmi, mədəni əlaqələrin inkişafında xüsusi rol oynayır. K.Abdullayev vurğulamışdır ki, BSU-nun kollektivi prezidentlər İlham Əliyevin və Lex Kaçinskinin həyata keçirdikləri siyasətə müvafiq olaraq Polşa-Azərbaycan dostluğunun daha da möhkəmləndirilməsi üçün hər cür səy göstərir.

Kamal Abdullayev universitetdə polyak dili və ədəbiyyatının tədrisindən bəhs edərək vurğulamışdır ki, bu istiqamətdə genişmiqyaslı elmi tədqiqatlar aparılır. Ali məktəbin tələbələri polyak dilini və mədəniyyətini, Polşa tarixini, Azərbaycan-Polşa münasibətlərini böyük maraqla öyrənirlər. Universitetdə yaradılmış Polyak dili və Mədəniyyəti Mərkəzi uğurla fəaliyyət göstərir. Bu mərkəz həm tələbə və müəllimlərin, həm də Azərbaycanda yaşayan və işləyən polyakların ünsiyyət yerinə çevrilmişdir. Rektor bu mərkəzin açılmasına fəal kömək göstərmiş Polşanın Azərbaycandakı səfirinə və Azərbaycanın Polşadakı səfirinə təşəkkürünü bildirmişdir.

BSU Polşanın ali məktəbləri ilə, o cümlədən Varşava Universiteti və Adam Mitskeviç adına Poznan Universiteti ilə sıx əlaqə saxlayır. Artıq bir neçə ildir ki, Poznan Universitetinin gənc müəllimləri BSU-da mühazirələr oxuyur, BSU-nun tələbələri isə Polşa ali məktəblərində təcrübə keçirlər. Azərbaycanda polonistikanın və Polşada azərbaycanşünaslığın təbliğ edilməsi məqsədi ilə Varşava Universiteti nəzdində fəaliyyət göstərən Şərqi Avropa Tədqiqatları İnstitutunda çalışan alimlər üçün Heydər Əliyev və marşal Pilsudski adına təqaüdlər təsis edilmişdir.

Sonra professor K.Abdullayev Polşa dövlətinin başçısına Bakı Slavyan Universitetinin fəxri doktoru diplomunu və doktor mantiyasını təqdim etmişdir.

Mərasimdə çıxış edən Polşa Prezidenti Lex Kaçinski qeyd etmişdir ki, Bakı Slavyan Universitetinin fəxri doktoru adına layiq görülməsini özü üçün böyük şərəf hesab edir. Qədim və gözəl Azərbaycan torpağında, müstəqil Azərbaycanda bu cür hörmətli auditoriya qarşısında çıxış etməyə şad olduğunu bildirən Polşa dövlətinin başçısı xüsusi vurğulamışdır ki, Polşa ilə Azərbaycan arasında sıx dostluq münasibətləri vardır, bu iki ölkəni bağlayan cəhətlər çoxdur, belə amillərdən biri də hər iki dövlətin müstəqil siyasət yeritməsidir.

Prezident Lex Kaçinski Polyak dili və Mədəniyyəti Mərkəzinin yaradılmasına görə təşəkkürünü bildirərək vurğulamışdır ki, BSU-nun tələbələri onu polyak dilində salamlayanda, sözün yaxşı mənasında, təəccüblənmişdir. O, mərasim iştirakçılarını əmin etmişdir ki, Polşada Azərbaycan dilinin geniş təbliğ və təşviq edilməsi üçün hər cür səy göstərəcək, elə edəcəkdir ki, Azərbaycan Prezidenti İlham Əliyevin Varşavaya növbəti səfəri zamanı yerli sakinlər onu Azərbaycan dilində salamlasınlar.

Polşa dövlətinin başçısı ümidvar olduğunu bildirmişdir ki, xalqlarımız arasında münasibətlər də dövlətlərarası münasibətlər kimi yüksək səviyyədə olacaqdır.

Sonra ali məktəbin tələbələri Frederik Şopenin əsərlərini fortepianoda ifa etmişlər.

Polşa Prezidenti BSU-nun rektoru Kamal Abdullayevə onun "Yarımçıq əlyazma" kitabının polyak dilində nəşr edilmiş nüsxəsini təqdim etmişdir.

AzərTAc