ümummilli lider Heydər Əliyevin anadan olmasının 86-cı ildönümü münasibətilə silsilə tədbirlər keçirilib

Xalqımızın böyük oğlu, müstəqil Azərbaycanın memarı, bütün həyatını vətəninin çiçəklənməsinə həsr etmiş ulu öndər Heydər Əliyevin anadan olmasının 86-cı ildönümü münasibəti ilə təhsil ocaqlarında ümummilli liderin əziz xatirəsinə həsr olunmuş maraqlı və məzmunlu anım mərasimləri keçirildi. Yaddaqalan tədbirlərdən birini Bakıdakı 204 nömrəli məktəbin kollektivi mayın 8-də təşkil etmişdi.

Toplantını məktəbin direktoru Ziba Rzayeva açaraq son günlər ölkəmizin hər yerində keçirilən anım tədbirlərini böyük öndərə ümumxalq məhəbbətinin təzahürü kimi dəyərləndirdi. Z.Rzayeva azərbaycanlı olması ilə həmişə fəxr edən ulu öndər Heydər Əliyevin hakimiyyətdə olduğu bütün dövrlərdə Azərbaycanın inkişafı, onun qüdrətinin artması, dövlətçiliyimizin möhkəmlənməsi və s. istiqamətlərdəki titanik fəaliyyətindən, hər cür inkişafın təməlində dayanan təhsilə diqqət və qayğısından, hələ sovet dönəmində yüksək ixtisaslı milli kadrların yetişdirilməsi sahəsindəki xidmətlərindən söz açdı, onun müdrik siyasi kursunun, vətənimizin daha da möhkəmlənməsi və inkişaf etməsinə hesablanmış fəaliyyətinin hazırda Azərbaycan Prezidenti cənab İlham Əliyev tərəfindən uğurla davam etdirildiyini diqqətə çatdırdı.

Sonra məktəbin tarix müəllimi Sevil Əhmədova ulu öndər Heydər Əliyevin həyat yolundan, çoxistiqamətli siyasi və dövlətçilik fəaliyyətindən xronoloji ardıcıllıqla söz açdı, bu böyük insanı dahi rəhbər, fenomenal şəxsiyyət kimi səciyyələndirdi.

Məktəblilərin ulu öndər haqqında söylədikləri səmimi sözlər, ümummilli liderin elmə, təhsilə, müəllimə verdiyi yüksək qiyməti ifadə edən fikirlərindən gətirdikləri nümunələr, istedadlı şagirdlərin ifa etdikləri şeirlər toplantı iştirakçıları tərəfindən maraqla dinlənildi. Məktəbin X "Q" sinif şagirdi Yusif Şahbazovun Heydər Əliyevə həsr etdiyi "Milli liderimiz" şeirini isə onlar alqışlarla qarşıladılar.

Xətai Rayon İcra Hakimiyyətinin təhsil, səhiyyə, mədəniyyət şöbəsinin müdiri Qafur Rəhmanov toplantıda çıxış edərək şagirdlər tərəfindən ümummilli liderin şəxsiyyətinə və irsinə göstərilən marağı xüsusi qeyd etdi. Böyük öndərin həyat və fəaliyyətinin, əməllərinin, uca şəxsiyyətinin gənclərə əsl örnək olduğunu vurğuladı, onları bu örnəkdən nümunə götürməyə çağırdı.

Toplantıda böyük öndərin anadan olmasının 86-cı ildönümü münasibəti ilə məktəbdə keçirilən inşa, rəsm, divar qəzetləri, əl işləri müsabiqələrinin və idman yarışlarının qaliblərinə diplomlar təqdim olundu.

***

 Mayın 8-də Bakı şəhəri  Nəsimi rayonundakı 9 nömrəli orta məktəbdə ulu öndər Heydər Əliyevin anadan olmasının 86-cı ildönümünə həsr olunmuş tədbir keçirilib. Dövlət himni səsləndikdən sonra şagirdlərin əl ilə gülün çiçəklərindən hazırladıqları üçrəngli bayraq, ölkəmizin xəritəsi səhnəyə gətirildi.

Təhsil ocağının rəhbəri Zinyət Əhmədova çıxış edərək qeyd etdi ki, anım günü respublikamızın bütün təhsil ocaqlarında yüksək səviyyədə böyük rəğbətlə, məhəbbətlə qeyd olunur.  ölkəmizin inkişafında, müstəqilliyimizin qorunub saxlanılmasında ümummilli liderimiz Heydər Əliyevin misilsiz xidmətləri olmuşdur.  Ulu öndər Heydər  Əliyev təhsilə həmişə başqa sahələrdən daha artıq diqqət və qayğı göstərmişdir.

Tədbirin sonunda ulu öndər Heydər Əliyevlə bağlı film nümayiş olunub.

***

Həmin gün Bakının 5, 157 və 267 nömrəli orta məktəblərində də ümummilli  lider Heydər Əliyevin anadan olmasının 86-cı ildönümü təntənə ilə qeyd edilib.  Şagirdlərin ifasında böyük tarixi şəxsiyyət Heydər Əliyevə həsr olunmuş şeirlər və mahnılar səsləndirilib.  Onlar ulu öndərə olan sonsuz və tükənməz sevgilərini çəkdikləri rəsmlərlə də  nümayiş etdiriblər.

***

Bakıdakı 28 nömrəli orta məktəbin pedaqoji kollektivi ulu öndər Heydər Əliyevin anadan  olmasının 86-cı ildönümü  münasibətilə əqli cəhətdən qüsurlu olan uşaqların oxuduqları 11 nömrəli xüsusi təhsil məktəbində xeyriyyə tədbiri keçirib. Tədbirin təşkilatçısı məktəbin direktoru Gülarə Vəliyeva ölkəmizdə   əqli və fiziki cəhətdən qüsurlu olan uşaqların oxumaları üçün yaradılan şəraitdən  və göstərilən dövlət qayğısından söhbət açıb.

Məktəbin  şagirdləri üçün şirniyyat süfrəsi açılıb və konsert verilib. Tədbirin sonunda 11 nömrəli xüsusi təhsil məktəbinin direktoru Sezar Qocayev və   burada təhsil alan şagirdlərin valideynləri belə bir  xeyirxah tədbir üçün minnətdarlıqlarını bildiriblər.

"Azərbaycan müəllimi"