Müəllimlər elektron dərslikləri yüksək qiymətləndirdilər

Müasir texnologiyaların sürətli inkişafı insan tərəfindən informasiyanın qavranılmasını tamamilə dəyişmişdir. Əsas informasiya mənbələri radio, televiziya və İnternet olmuşdur. İnformasiyanın rəqəmli-vizual formaları adi hal aldığından onun tədrisdə istifadəsi zərurəti də yaranmışdır.

Azərbaycan Respublikası Təhsil Nazirliyi tərəfindən hazırlanıb ötən il məktəblərə çatdırılmış, müxtəlif fənləri əhatə edən multimedia dərslikləri ən yüksək səviyyədə interaktivliyi ilə fərqlənən müasir tədris vəsaiti kimi artıq istifadəyə verilmişdir. Təqdim olunan elektron disklər öz təlim, informasiya və əyləncə səciyyələrinə görə yüksək səviyyələrdə müsbət ekspert rəyləri qazanmışdır. Bununla da Azərbaycan Respublikasının Prezidenti cənab İlham Əliyevin imzaladığı müvafiq sərəncamında İKT ilə bağlı nəzərdə tutulan işlərin birinci mərhələsi başa çatmışdır. Respublikamızın ümumtəhsil məktəbləri üçün hazırlanan Azərbaycan tarixi, biologiya, kimya, fizika fənləri üzrə audiovizual kompüter texnologiyalarının xüsusi imkanlarından istifadə edilməsi məktəb kursunun daha da zənginləşməsinə imkan verir, fənni şagirdlər üçün daha da maraqlı və cəlbedici edir. Görəsən bu dərs vəsaitini müəllimlər necə qiymətləndirir?

Paytaxtın 258 nömrəli məktəbinin informatika müəllimi Səmihə Rüstəmova dedi ki, elektron tədris vəsaitinin əsas məziyyəti müasir kompüter texnologiyaları ilə məktəb tədris ənənələrini və onun perspektiv istiqamətlərini tam uyğunlaşdırmasıdır. Elektron tədris vəsaiti müxtəlif multimedia imkanlarına malik olub, böyük miqdarda videosüjetlər, animasiya çarxları, qrafik və keyfiyyətli şəkillər, izahlı diktor səsi və interaktiv laboratoriya işlərini özündə birləşdirir.

Elektron tədris vəsaitinin lokal versiyası əsasən şagirdlərin fərdi istifadəsi üçün nəzərdə tutulmuşdur. Əgər sinifdə heç olmasa bir kompüter varsa belə, müəllim monitor və yaxud multiproyektor vasitəsilə bu materiallardan əyani vəsait kimi istifadə etməklə dərs prosesinin effektivliyini xeyli artıra bilər.

Elektron dərsliklər çox asan və başa düşülən formada tərtib olunmuşdur. Bütün hissələr interaktiv olaraq əlaqələndirildiyi üçün istənilən zaman hər hansı bir bölməyə daxil olmaqla informasiya almaq mümkündür.

Elektron dərslik vizual olaraq doqquz hissəyə bölünmüşdür: mündəricat, tarixi şəxsiyyətlər, lüğət, test, arxiv, axtarış, slaydlar, fon musiqisi, yaradıcı heyət. İstənilən funksiyanı yerinə yetirmək üçün idarəetmə sistemi çox asan və eyni zamanda interaktivdir.

Sistemdə olan testlər vasitəsilə şagirdlər multimedia proqramlarından əldə etdikləri biliklərin səviyyəsini yoxlamaq imkanı qazanacaqlar. Disklərdə Azərbaycan tarixi üzrə 1000, kimyadan 700, biologiyadan 600-dən çox yoxlama testi var. Lüğət pəncərəsində Azərbaycan tarixi fənnindən 300, kimya fənnindən 200, biologiya fənnindən isə 600-dən artıq termin və anlayışların izahı verilmişdir. Bütün fənlər üzrə verilmiş məlumatlar müəllimə mövzunu əyani şəkildə izah etməyə yardımçı olur.

Bakının 157 nömrəli məktəbinin informatika müəllimi  Gülşən Məmmədova da elektron dərsliklər barədə müsbət fikirlər dedi. Onun sözlərinə görə, məktəbə təqdim olunan elektron audiovizual dərs vəsaiti müəllim və şagirdlərin böyük marağına səbəb olmuşdur: "Dərslərin təcrübələrlə, şəkillərlə əyani olaraq təqdimatı şagirdlərin dərsi daha yaxşı qavramalarına kömək edir. Elektron dərs vəsaitləri ilə Azərbaycan tarixi, kimya, zoologiya, botanika, orta əsrlər tarixi fənlərini kompüter otağında şagirdlərə nümayiş etdiririk. Bu da onların elmin sirlərinə yiyələnməsində böyük rol oynayır.  Biz elektron dərs vəsaitlərinin hazırlanması üçün tapşırıq verən möhtərəm Prezidentimiz İlham Əliyevə və Təhsil Nazirliyinə minnətdarlığımızı bildiririk".

Məktəbin biologiya müəllimi Cəmalə Nəbiyeva bu dərs vəsaitinin uşaqlar tərəfindən çox sevildiyini dedi: "Elektron dərsliklərdən istifadə edəndə uşaqlar dərsləri daha yaxşı qavrayır. Onların intellektual səviyyəsi artır. Uşaqlara bu dərsliklər digərləri ilə müqayisədə daha maraqlı olur. Elektron dərsliklərlə işləmək uşaqların da ürəyincədir. Onlar cavablarına görə müəllimlər tərəfindən verilən qiymətlərdən də razı qalırlar. Bu dərsliklərlə tədris zamanı müəllimin də işi asanlaşır. Azərbaycan tarixi, kimya, biologiya, fizika fənlərində əyani vəsaitlərin olmaması müəllimlər üçün çətinliklər yaradırdı". 

Rəşad ZİYADOV