Yeni idman kompleksi istifadəyə verildi

Dekabrın 23-də   paytaxtın Binəqədi rayonunda "Vətən" Respublika İxtisaslaşdırılmış Olimpiya Ehtiyatları Uşaq-Gənclər  Futbol Məktəbi üçün yeni tikilmiş idman kompleksinin açılışı  oldu.

Məktəbin həyətinə toplaşmış uşaqları, onların məşqçi-müəllimlərini, qonaqları səmimi salamlayan təhsil naziri Misir Mərdanov, AFFA-nın prezidenti Rövnəq Abdullayev, Binəqədi Rayon İcra Hakimiyyətinin başçısı Alı Qocayev  idman kompleksində  yaradılmış şəraitlə tanış oldular. Məşqçi-müəllim, uşaqların geyinib-soyunma otaqlarında, habelə trenojor zalında yaradılmış şərait  müasir standartlara  tam cavab verirdi. "Vətən" Respublika İxtisaslaşdırılmış Olimpiya Ehtiyatları Uşaq-Gənclər Futbol Məktəbinin direktoru Fazil Eyyubovun verdiyi məlumatdan aydın oldu ki, burada 1500 uşaq və gənclə 40 məşqçi-müəllim məşğul olur. Məktəbin istilik sistemi ilə maraqlanan təhsil naziri Misir Mərdanov yeni idman kompleksinin tikintisinin  keyfiyyətindən, eləcə də maddi-texniki bazasının lazımi səviyyədə olmasından, idman avadanlıqları ilə təchizatından razı qaldığını dedi. Sonra təhsil naziri, AFFA-nın prezidenti və digər qonaqlar  idman kompleksinin  yeni istifadəyə verilmiş futbol meydançasına baş çəkdilər.

Uşaqlar və gənclər qarşısında çıxış edən təhsil naziri Misir Mərdanov hamını qarşıdan gələn 31 Dekabr Dünya Azərbaycanlılarının Həmrəylik Günü və Yeni il münasibətilə təbrik edərək  onlara gələcək işlərində uğurlar arzuladı. Nazir son illər yeniyetmə  və  gənclərimizin idmana daha çox meyil və maraq göstərdiyini qeyd etdi. ölkə başçısı cənab İlham Əliyevin respublikamızda bədən tərbiyəsi və idmanın inkişafına xüsusi diqqət, qayğı göstərdiyini deyən təhsil naziri Azərbaycan idmançılarının beynəlxalq yarışlarda qazandıqları uğurların sayının getdikcə artdığını söylədi. Təhsil Nazirliyi ilə AFFA-nın futbolun inkişafı istiqamətində bir sıra mühüm tədbirlər həyata keçirildiyini qeyd edən nazir Misir Mərdanov birgə fəaliyyət nəticəsində görülən işləri yüksək qiymətləndirdi. Nazir işgüzar əməkdaşlığın bundan sonra da davam etdiriləcəyini  qeyd edərək  bunun üçün AFFA-nın prezidenti Rövnəq Abdullayevə öz təşəkkürünü bildirdi.

çıxış üçün söz alan AFFA-nın prezidenti Rövnəq Abdullayev dövlət başçısı cənab İlham Əliyevin 10 oktyabr 2005-ci il tarixli sərəncamı ilə təsdiq olunmuş "Azərbaycan Respublikasında Futbolun inkişafına dair Dövlət Proqramı (2005-2015-ci illər)"na uyğun olaraq AFFA ilə Təhsil Nazirliyinin həyata keçirdiyi işlərdən danışdı.Rövnəq Abdullayev bildirdi ki, son illər ölkədə futbolun inkişafında, onun kütləviləşməsində Təhsil Nazirliyi Azərbaycan Futbol  Federasiyası Assosiasiyası ilə birgə yaxından iştirak edir. Onu da qeyd etdi ki, "Vətən" Respublika İxtisaslaşdırılmış Olimpiya Ehtiyatları Uşaq-Gənclər Futbol Məktəbi üçün yeni tikilmiş idman kompleksinin açılışı Təhsil Nazirliyinin  uşaq və yeniyetmələr arasında idmanın bu növünə marağın artırılmasına göstərdiyi dəstəyin bariz nümunəsidir. Belə analoji tədbirlərin gələcəkdə də gerçəkləşdiriləcəyinə ümidvar olduğunu dedi. Dövlət Proqramından irəli gələn vəzifələrə toxunan çıxışçı bu istiqamətdə görülməsi  nəzərdə tutulan tədbirlərdən də söz açdı. AFFA ilə yaxından əməkdaşlıq etdiklərinə görə təhsil naziri Misir Mərdanova minnətdarlıq etdi.

Binəqədi Rayon İcra Hakimiyyətinin başçısı Alı Qocayev mərasimdə iştirak edən bütün qonaqları bu əlamətdar hadisə münasibətilə təbrik edərək, uşaq və gənclərə idmanın ən maraqlı növü  olan futbolda müvəffəqiyyətlər qazanmağı arzuladı.

Mərasimin sonunda təhsil naziri və qonaqlar uşaqlarla xatirə şəkli çəkdirdilər.                                                           

Samirə KƏRİMOVA