ötən dərs ili yeniliklərlə və uğurlarla yaddaqalan oldu

Təhsil işçilərinin sentyabr konfransında

Sonra konfrans Azərbaycan Dövlət Musiqili Komediya Teatrında öz işinə başladı.

 "2007-2008-ci dərs ilinin yekunları və qarşıda duran vəzifələr" mövzusunda çıxış etmək üçün söz Bakı Şəhəri üzrə Təhsil İdarəsinin müdiri Nailə Rzaquliyevaya  verildi. Konfrans iştirakçılarını yeni dərs ili münasibətilə təbrik edən N.Rzaquliyeva çıxışında ilk olaraq ölkə başçısı cənab İlham Əliyevin  təhsilə, təhsil işçilərinə göstərdiyi diqqət və qayğıdan danışdı. Qeyd etdi ki, təhsili millətin gələcəyi adlandıran ümummilli liderimiz Heydər Əliyev Azərbaycan təhsilinin gələcəyini yeni texnologiyaların tətbiqində, onun keyfiyyətinin  yüksəldilməsində və dünya təhsil sisteminə inteqrasiyada görürdü. Bu ideyaların həyata keçirilməsi istiqamətində atılan addımlar indi öz bəhrəsini verir. Ulu öndərin əsasını qoyduğu təhsil siyasəti möhtərəm Prezidentimiz cənab İlham Əliyev tərəfindən uğurla davam etdirilir.

Yeni dərs ili ərəfəsində dövlət başçısı cənab İlham Əliyevin sərəncamı ilə təhsil müəssisələrində çalışan işçilərin əməkhaqlarının  artırılması isə təhsil işçiləri tərəfindən yüksək razılıq hissi ilə qarşılanıb.  Nailə Rzaquliyeva müəllimlərin sosial müdafiəsinin gücləndirilməsi istiqamətində atılan bu addıma görə təhsil işçiləri adından  möhtərəm Prezidentimiz cənab İlham Əliyevə minnətdarlığını bildirdi.

Məruzəçi sonra təhsilin keyfiyyətinin yüksəldilməsi, onun səmərəliliyinin artırılması istiqamətində görülən işlərdən, qazanılan nailiyyətlərdən söz açdı. Bildirdi ki, 2007-2008-ci dərs ilində paytaxtda  1 ibtidai məktəb əsas məktəbə, 9 əsas məktəb isə orta məktəbə çevrilib. Hazırda Bakı Şəhəri üzrə Təhsil İdarəsinin tabeliyində 311 orta, 4 əsas, 5 yardımçı, 1 evdə təhsil, 5 cəzaçəkmə müəssisəsində isə axşam məktəbi fəaliyyət göstərir. ötən tədris ilinin əvvəlində Bakı şəhərində 37000 şagird yerlik 22 yeni məktəb və 28 əlavə tədris korpusu inşa olunaraq istifadəyə verilib. 250 məktəbin istilik sistemi əsaslı təmir edilib.

İnventar və avadanlıqlarla təchizat sahəsində də xeyli işlər görülüb. Təhsilin keyfiyyətinə əsaslı şəkildə təsir göstərən fənn kabinetlərinin və laboratoriyaların yaradılması işi isə davam etdirilir.

Məruzədən aydın oldu ki, hesabat dövrü ərzində "Azərbaycan Respublikasında ümumtəhsil məktəblərinin İKT ilə təminatı Proqramı (2005-2007-ci illər)"nın icrası da uğurla başa çatdırılıb. Hazırda Bakı şəhərinin ümumtəhsil məktəblərində 29 şagirdə bir kompüter düşür. Kompüterlərdən səmərəli istifadə məqsədilə müəllimlərin kurslardan keçməsi, hər bir müəllimin kompüterdə işləmək imkanlarının artırılması işi də təşkil olunub. Elektron dərslik və dərs vəsaitlərinin tətbiqi sahəsində də xeyli işlər görülüb.

Mərkəzləşdirilmiş qaydada keçirilən buraxılış imtahanlarından söz açan məruzəçi onun üstünlüklərini qeyd etdi. Bildirdi ki, yeni qiymətləndirmə sisteminə keçməklə həm təhsilin keyfiyyətinin yüksəldilməsinə, həm də qəbul imtahanlarında yüksək nəticələrə nail olunub. Ali məktəblərə qəbul olanların sayında 2006-cı ilə nisbətən 2007 və 2008-ci illərdə müsbət dinamika vardır.Əgər 2006-cı ildə 8335 məzun tələbə adına layiq görülmüşdüsə, 2008-ci ildə bu göstərici 9228-ə bərabər olub. Statistikaya görə, son 2 ildə  ali məktəblərə daxil olan məzunların sayı 1000 nəfərə yaxın artıb. Məzunların qəbulolma faizi 34,79-dan 39,22-yə yüksəlib. 600-dən yuxarı bal toplayan məzunların sayında da ciddi artım müşahidə olunur. 2006-cı ildə bu rəqəm 452 olduğu halda, 2007-ci ildə 506, 2008-ci ildə isə 702 olmuşdur. Bu il ali məktəblərə qəbul imtahanlarında  Bakı şəhəri üzrə 2 məzunun 700 bal toplaması isə ürəkaçandır.

Məzunların attestat qiymətlərini  doğrultması  məsələsinə toxunan N.Rzaquliyeva bildirdi ki, bu il əlaçı məzunlardan 72 faizi özünü təsdiq edərək 500-700 bal nəticə göstərib. Halbuki, bu rəqəm 2007-ci ildə 50,09 faiz, 2006-cı ildə isə 41,70 faiz olub. Attestat balı (4,0-5,0) olan məzunlardan 500-700 bal nəticə göstərənlərin xüsusi çəkisi 2006-cı illə müqayisədə 10 faiz artaraq 24,75 faiz olub. Son 2 il ərzində Bakı şəhəri məzunlarının orta bal göstəriciləri də xeyli yaxşılaşıb. Bu rəqəm 2006-cı ildə 232, 537;2007-ci ildə 245, 162; 2008-ci ildə isə artaraq 267, 405-dir. Orta balı 300-dən yuxarı olan məktəblərin sayı 2006-cı ildə 17, 2007-ci ildə 25 idisə, bu il 49 olub.

özünün geniş və əhatəli məruzəsində N.Rzaquliyeva daha sonra "Xüsusi istedada malik uşaqların (gənclərin) yaradıcılıq potensialının inkişafı üzrə Dövlət Proqramı (2006-2010-cu illər)"na uyğun olaraq təhsil müəssisələrində istedadlı uşaqların aşkara çıxarılması istiqamətində həyata keçirilən əməli tədbirlərdən söz açdı. Qeyd etdi ki,  ötən dərs ilində fənn olimpiadaları yüksək səviyyədə keçirilib, şagirdlərin əldə etdikləri uğurlarla yaddaqalan olub.  Belə ki, 2006-cı ildə məktəblilərin fənn olimpiadalarının respublika turunun qalibi  olan şagirdlərin sayı 48, 2007-ci ildə 69 nəfər olduğu halda, 2008-ci ildə bu rəqəm 92-yə çatıb. Bu müsbət dinamika aparılan məqsədyönlü və ardıcıl işin nəticəsidir.

Məruzəsində  N.Rzaquliyeva təhsilin bünövrəsi sayılan məktəbəqədər təhsillə bağlı həyata keçirilən tədbirlərdən danışdı. Verilən məlumatdan aydın oldu ki, bu sahəyə diqqət ötən dərs ilində bir qədər də artırılmışdır. "Bakı Şəhəri üzrə Təhsil İdarəsinin tabeliyində 308 məktəbəqədər təhsil müəssisəsi  1372 qrupla fəaliyyət göstərir. Bu qruplarda 26315 uşaq tərbiyə alır. "Bakı şəhərinin qəsəbələrinin 2006-2007-ci illər üzrə sosial-iqtisadi inkişafının sürətləndirilməsinə dair tədbirlər Proqramı"na müvafiq olaraq müasir standartlara cavab verən 11 məktəbəqədər təhsil müəssisəsi tikilib, onlardan 9-u artıq istifadəyə verilib, 2-si isə 2008-ci ilin sonuna qədər hazır olacaq.

Hazırda məktəbəqədər təhsil müəssisələrində 7700 nəfər 5 yaşlı uşaq tərbiyə alır. 2008-2009-cu tədris ilində 7200 uşaq bağçadan məktəbə yola salınacaq.

N.Rzaquliyeva məktəbdənkənar müəssisələrin tərbiyə prosesində, yeniyetmələrin asudə vaxtlarının səmərəli  təşkilində mühüm rol oynadığını deyərək,  həmin sahədə görülən işləri, əldə olunan uğurlu nəticələri konrans iştirakçılarının diqqətinə çatdırdı.

N.Rzaquliyeva daha sonra vahid məktəbli formasının tətbiqinin əhəmiyyətindən, geniş ictimaiyyətin onu  razılıqla qarşılamasından, Bakı Şəhəri üzrə Təhsil İdarəsinin Azərbaycan Təhsil İşçiləri Azad Həmkarlar İttifaqı Respublika Komitəsi ilə birgə həyata keçirdikləri tədbirlərdən və digər məsələlərdən danışdı. Əldə olunan uğurlarla yanaşı, müəyyən nöqsan və çatışmazlıqların da mövcud olduğunu təəssüf hissi ilə bildirən idarə müdiri onların aradan qaldırılması istiqamətində mühüm addımların atıldığını dedi.

çıxışında Azərbaycan təhsilinin inkişafında, maddi-texniki bazasının möhkəmləndirilməsində Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın rolunu xüsusi qeyd edən N.Rzaquliyeva görülən işlərin təhsil işçiləri tərəfindən rəğbətlə qarşılandığını bildirdi. Respublika Prezidenti cənab İlham Əliyevin sərəncamına müvafiq olaraq bu il ölkəmizdə ilk dəfə keçirilən "Ən yaxşı ümumtəhsil məktəbi" və "Ən yaxşı müəllim" müsabiqələrinin əhəmiyyətinə toxunan məruzəçi nəticələrin  ürəkaçan olduğunu söylədi. Qeyd etdi ki,  paytaxtın 14 məktəbi  50 ən yaxşı məktəb sırasına, təhsil müəssisələrində dərs deyən 42 müəllim isə 100 ən yaxşı müəllim sırasına daxil olub. Bu münasibətlə bütün qalib məktəb və müəllimləri təbrik edən N.Rzaquliyeva onlara uğurlar arzuladı. O, çıxışının sonunda Təhsil Nazirliyinin ötən ildə olduğu kimi, yeni dərs ilində də problemlərin birlikdə aradan qaldırılmasında onlara yaxından kömək göstərəcəyinə ümidvar olduğunu bildirdi.  

Sonra konfransda məruzə ətrafında çıxışlar oldu. "Ən yaxşı ümumtəhsil məktəbi" müsabiqəsinin qalibi 46 nömrəli məktəbin direktoru Sevinc Budaqova, 12 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin direktoru Elçin Mehdizadə, "Ən yaxşı müəllim" müsabiqəsinin qalibi 124 nömrəli məktəbin müəllimi İlhamə Abdullayeva, Bakı şəhəri 18 nömrəli orta məktəbin Valideyn-Müəllim Assosiasiyasının prezidenti Azər Hətəmov, qəbul imtahanlarında 700 bal toplamış Rəşad Mirzəyev, Rüfət Babayev, Azərbaycan Təhsil İşçiləri Azad Həmkarlar İttifaqı Respublika Komitəsinin sədr müavini Mirzə Cəfərzadə çıxış edərək məruzəyə münasibət bildirdilər. Bakı Şəhəri üzrə Təhsil İdarəsinin müdiri N.Rzaquliyevanın məruzəsini özünün dolğunluğu, əhatəliliyi, həmçinin burada mövcud problemlərin geniş təhlilinin verilməsi baxımından müsbət qiymətləndirdilər.

çıxış edənlər ötən il ərzində görülmüş işlərdən, həyata keçirilən tədbirlərdən, əldə olunan nailiyyətlərdən, qarşıda duran vəzifələrdən də söz açdılar.

Konfransın işində iştirak edən Nəsimi Rayon İcra Hakimiyyətinin başçısı Nəsib Məhəməliyev son illər ölkəmizdə təhsilin uğurla inkişaf etdiyini, məktəb tikintisinin geniş vüsət aldığını təqdirəlayiq hal kimi qiymətləndirdi. ölkə Prezidenti cənab İlham Əliyev tərəfindən təhsilə göstərilən diqqətdən söz açan icra hakimiyyəti başçısı bu sahədə qazanılan uğurların günbəgün artdığını söylədi.

Sonra Azərbaycan müəllimlərinin XIII qurultayına nümayəndələr seçildi.

Konfransda təhsil naziri Misir Mərdanov çıxış edərək bütün təhsil işçilərini qarşıdan gələn "Bilik günü" münasibətilə təbrik etdi. Nazir ölkədə təhsilin inkişafına göstərilən dövlət qayğısını yüksək dəyərləndirərək, bu sahədə aparılan məqsədyönlü işlərin göz qabağında olduğunu söylədi. Son illər təhsilin keyfiyyətinin yüksəldilməsi istiqamətində bir çox mühüm tədbirlərin həyata keçirildiyini deyən nazir hazırda təhsil müəssisələrində tərbiyə məsələsinə diqqətin artırılmasının zəruriliyini vurğuladı. Bu gün təhsil müəssisə rəhbəri, müəllim, həmçinin şagirdlər istər danışıq, istər geyim, istərsə də davranışı ilə nümunə olmalıdır. Müəllimlik peşəsi şərəflidir. Bu peşənin şərəfini, müqəddəsliyini qoruyub saxlamaq hər bir müəllimin özündən asılıdır. Hər zaman müəllimə hörmətlə yanaşılıb. çalışmalıyıq ki, həmin ənənə bu gün də layiqincə davam etdirilsin. Təbii ki, öz işini bilən, yüksək təşkilatçılıq qabiliyyəti və nümunəvi davranışı ilə seçilən təhsil müəssisələrində təlim-tərbiyə məsələlərinə lazımınca diqqət verildikdə orada bu məsələlər özünün uğurlu həlli ilə hamının diqqətini çəkir. Nazir hazırda  belə təhsil müəssisələrinin olduğunu deyərək onlardan bir neçəsinin adını çəkdi. Belə təlim-tərbiyə müəssisələrinin sayının daha çox olmasını arzuladı.

Məktəb-valideyn-şagird münasibətlərinə toxunan təhsil naziri bu birgə işə münasibətin əsaslı şəkildə dəyişilməsinin labüdlüyünü təhsil işçilərinin diqqətinə çatdırdı. Nazir hər bir valideynin öz övladının oxuduğu məktəblə əlaqəsini artırmasını, təhsil ocağının həyatında baş verən proseslərdə yaxından iştirak etməsinin vacib amillərdən biri olduğunu söylədi.

Daha sonra orta məktəblərdə xarici dillərin intensiv tədrisinə diqqətin artırılmasının vacibliyindən söz açan nazir Misir Mərdanov artıq bu istiqamətdə mühüm yeniliklərin edildiyini bildirdi.

Təhsil naziri ötən dərs ilinin təhsil işçiləri üçün xüsusilə yaddaqalan hadisə və yeniliklərlə zəngin olduğunu deyərək ölkə başçısı cənab İlham Əliyev tərəfindən imzalanmış "Ən yaxşı ümumtəhsil məktəbi" və "Ən yaxşı müəllim" mükafatlarının təsis edilməsi haqqında 4 sentyabr 2007-ci il tarixli sərəncamın geniş pedaqoji ictimaiyyət üçün mühüm əhəmiyyət kəsb etdiyini söylədi.

Fürsətdən istifadə edərək təhsil naziri ölkə başçısı cənab İlham Əliyevin 19 avqust 2008-ci il tarixli sərəncamı ilə "Ən yaxşı ümumtəhsil məktəbi" və "Ən yaxşı müəllim" müsabiqələrində layiqli yer tutaraq mükafatlandırılan bütün təhsil işçilərini təbrik edərək, onlara ən xoş arzularını çatdırdı.

çıxışında digər həlli vacib məsələlərə də toxunan nazir təhsil işçilərinə bir sıra dəyərli tövsiyələr verdi.

Sonda nazir Misir Mərdanov 2007-2008-ci tədris ilində keçirilmiş "Ən yaxşı ümumtəhsil məktəbi", "Ən yaxşı müəllim" müsabiqələrinin qalibləri sırasında olan paytaxtın 14 ümumtəhsil məktəbinin direktoruna və 42 müəllimə sertifikatlar təqdim edərək onlara fəaliyyətlərində uğurlar dilədi.

Sonra konfransın qətnaməsi və iştirakçılar adından ölkə başçısına müraciət qəbul olundu.

Konfrans Bakı Şəhəri üzrə Təhsil İdarəsinin tabeliyində olan məktəbəqədər və məktəbdənkənar müəssisələrin istedadlı uşaq və yeniyetmələrinin ifasında maraqlı konsert proqramı ilə davam etdi.

Samirə KƏRİMOVA

Peşə təhsili işçilərinin konfransı keçirildi

Bu sahədə həyata keçirilən əsaslı islahatların sürətləndirilməsinin zəruriliyi vurğulandı

Sentyabrın 8-də 11 nömrəli Bakı Peşə Liseyində peşə təhsili işçilərinin konfransı keçirildi. Tədbirdə Azərbaycan Respublikasının təhsil naziri Misir Mərdanov, nazir müavini İsgəndər İsgəndərov, Təhsil Nazirliyinin Texniki peşə təhsili şöbəsinin müdiri Namiq Məmmədov, ölkənin peşə təhsili müəssisələrinin rəhbərləri və b. iştirak edirdilər. Konfransı açan təhsil naziri Misir Mərdanov peşə təhsili işçilərini yeni tədris ili münasibətilə təbrik etdi və onlara işlərində uğurlar arzuladı.

Son zamanlar ölkədə aparılan sosial-iqtisadi islahatların peşə təhsilinin də müasirləşməsi, maddi-texniki bazanın güclənməsi və peşə təhsili sisteminin yeniləşməsi zərurəti yaratdığını deyən nazir "Azərbaycan Respublikasında texniki peşə təhsilinin inkişafı üzrə Dövlət Proqramı (2007-2012-ci illər)"nın bu sahənin inkişafında əhəmiyyətli rol oynayacağına əmin olduğunu bildirdi.  Sonra nazir Proqramın icrası istiqamətində görüləcək işlərdən, peşə təhsili sistemi qarşısında duran mühüm vəzifələrdən, peşə məktəbi və peşə liseylərində bazar iqtisadiyyatının tələblərinə uyğun kadr hazırlığının vəziyyəti, onun yaxşılaşdırılması ilə bağlı  həyata keçiriləcək tədbirlərdən, respublikanın ayrı-ayrı bölgələrində yaradılacaq yeni peşə təhsili müəssisələrindən və s. söz açdı.

Konfrans iştirakçılarının diqqətinə çatdırıldı ki, peşə təhsili müəssisələrinin maddi-texniki bazasının gücləndirilməsi  məqsədi ilə 2008-ci ildə 7 peşə təhsili müəssisəsinin əsaslı təmiri, 1 məktəbin isə yenidən qurulması nəzərdə tutulmuşdur. Dövlət Proqramı çərçivəsində ilk müasir tipli peşə təhsili müəssisəsi - Qəbələ Turizm və Otelçilik üzrə Peşə Tədrisi Mərkəzi yaradılmışdır. Bu, son 10 ildə inşa edilən və müasir avadanlıqlarla təchiz edilmiş ilk peşə təhsili müəssisəsidir. Tədris binası, yeməkxana, laboratoriyalar, emalatxana, yataqxana və tibb otaqlarının fəaliyyət göstərəcəyi mərkəzdə 1-2 illik təhsillə yanaşı, qısamüddətli kursların da təşkil edilməsi planlaşdırılıb. Bundan əlavə,  fasiləsiz təhsil konsepsiyasına uyğun olaraq, istənilən yaş həddində olanlar da peşə mərkəzində arzularına müvafiq müxtəlif peşələrə yiyələnmək imkanına malik olacaqlar. Mərkəz regionda əmək bazarının araşdırılmasına, digər məktəblərin mühəndis-pedaqoji heyətləri üçün ixtisasartırma kurslarının təşkil edilməsinə, regionda əmək bazarının tələblərinə uyğun olaraq peşələrin müəyyənləşdirilməsinə yardım edəcəkdir. Təhsil naziri Dövlət Proqramına əsasən daha bir neçə belə mərkəzin yaradılmasının nəzərdə tutulduğunu bildirdi.

Bütün bunlarla yanaşı, texniki peşə təhsili sahəsində mövcud olan bir sıra problemlərdən danışan Misir Mərdanov onların aradan qaldırılması, bu sahədə əsaslı islahatların həyata keçirilməsi məqsədilə hər kəsin üzərinə düşən məsuliyyəti dərk etməsinin vacibliyini vurğuladı.

Daha sonra çıxış edən nazirliyin Texniki peşə təhsili şöbəsinin müdiri Namiq Məmmədov bu sahə ilə bağlı digər aktual məsələlərə toxundu.

Müzakirələr zamanı peşə təhsili müəssisələri rəhbərlərinin təklifləri səsləndi və onları maraqlandıran suallara aydınlıq gətirildi. Sonda müəllimlərin XIII qurultayına nümayəndələr seçildi.

"İnteraktiv elm layihəsi"nin birinci mərhələsi başa çatdı

Son dövrlər British Council təşkilatı ölkəmizdə təhsil sahəsində müxtəlif tədbirlər həyata keçirir. Bunlardan biri də "İnteraktiv Elm layihəsi" çərçivəsində BP şirkətinin maliyyə dəstəyi ilə bu təşkilatın Azərbaycan Respublikasının Təhsil Nazirliyi, Azərbaycan Müəllimlər İnstitutu və Böyük Britaniyanın Təbiət Elmlərinin öyrənilməsi üzrə Milli Mərkəzi ilə birgə reallaşdırdığı "Azərbaycanda təbiət fənlərini tədris edən müəllimlər üçün peşəkar hazırlıq və kurrikulumun inkişafı üzrə proqram"dır.

Əsas məqsədi 2012-2013-cü illərdə orta məktəb səviyyəsində yeni kurrikulumun həyata keçirilməsinə hazırlıq çərçivəsində  müxtəlif regionlarda çalışan müəllimlərə təlim keçə biləcək bir qrup mütəxəssisi hazırlamaqla etibarlı inkişaf modeli yaratmaq, hər bir müəllimi interaktiv tədris metodları ilə tanış edərək bütün ölkə üzrə orta məktəblərdə təbiət fənlərinin tədrisi səviyyəsini yüksəltmək olan layihənin 3 mərhələdə həyata keçirilməsi nəzərdə tutulub. ölkəmizin ayrı-ayrı şəhər və rayonlarının ümumtəhsil məktəblərində və pedaqoji kadrlar hazırlayan ali təhsil müəssisələrində çalışan 52 müəllimin iştirak etdiyi 3 seminardan ibarət (25-28 aprel, 1-5 iyul, 1-5 sentyabr) I mərhələ artıq başa çatıb.

Sentyabrın 5-də "İrşad" otelində bu münasibətlə təntənəli mərasim keçirildi. Tədbiri açan British Council təşkilatının Azərbaycan üzrə direktoru Nikol de Laluvyer mərasim iştirakçılarına mart ayından başlayaraq layihə çərçivəsində görülmüş işlər haqqında ətraflı məlumat verdi. O, bu layihənin Azərbaycan Respublikasının Təhsil Nazirliyi ilə British Council təşkilatı arasında əməkdaşlıq əlaqələrinin ən parlaq simvolu olduğunu qeyd etdi və göstərilən əməli dəstəyə görə layihəyə qoşulmuş təhsil müəssisələrinə təşəkkürünü bildirdi. Xanım Nikol iştirakçı müəllimlərə pedaqoji fəaliyyətlərində bu seminarların səmərəsini hiss etməyi arzuladı.

Sonra çıxış üçün söz Təhsil Nazirliyinin Strateji təhlil, planlaşdırma və kadrların idarəolunması şöbəsinin müdiri Fərzəli Qədirova verildi. Layihənin I mərhələsinin uğurla başa çatması münasibətilə təşkilatçıları və müəllimləri təbrik edən F.Qədirov təbiət fənlərinin tədrisində daha çox çətinliklər mövcud olduğuna görə proqram çərçivəsində mənimsənilmiş bilik və bacarıqların müəllimlərin peşəkarlıq səviyyələrinin yüksəlməsində əhəmiyyətli rol oynayacağına, gələcəkdə bütün fənn müəllimlərinin interaktiv biliklərə yiyələnəcəyinə ümid etdiyini bildirdi. O, Təhsil Nazirliyinin BP-nin maliyyə dəstəyi ilə görülən bu işi çox yüksək dəyərləndirdiyini diqqətə çatdıraraq layihənin uğurla həyata keçirilməsində rolu olan hər kəsə minnətdarlığını bildirdi.

Böyük Britaniyanın Təbiət Elmlərinin öyrənilməsi üzrə Milli Mərkəzinin beynəlxalq proqramlar üzrə koordinatoru Mark Uindeyl bir neçə ay ərzində ünsiyyətdə olduğu müəllimlərlə işbirliyindən çox məmnun qaldığını dedi və onlara gələcək pedaqoji fəaliyyətlərində uğurlar dilədi.

Mərasimin sonunda layihədə iştirak etmiş müəllimlərə sertifikatlar təqdim olundu.

Hicran ƏKBƏROVA