Təhsil Nazirliyinin kollegiyasında

Yanvarın 23-də Təhsil Nazirliyinin böyük akt zalında Azərbaycan Respublikası Təhsil Nazirliyi kollegiyasının genişlənmiş iclası keçirildi. İclasda kollegiya üzvləri ilə yanaşı millət vəkilləri, ali məktəblərin rektorları, Təhsil Nazirliyinin struktur bölmə rəhbərləri, orta ixtisas təhsili müəssisələrinin, Bakı Şəhəri üzrə Təhsil İdarəsinin, bəzi rayon və şəhər təhsil şöbələrinin rəhbər işçiləri, məktəb direktorları, KİV nümayəndələri iştirak edirdilər.

Kollegiya iclasını açan təhsil naziri, kollegiyanın sədri Misir Mərdanov zala toplaşanları salamladı, dəvətlərini qəbul edib iclasa gəldikləri üçün qonaqlara minnətdarlıq etdi.

Bu günlərdə ölkəmizin hər yerində, müxtəlif idarə və təşkilatlarda ötən ilin yekunlarının, yeni ildə qarşıda duran vəzifələrin müzakirəsinə həsr olunmuş yığıncaqların keçirildiyini bildirən nazir kollegiyanın həmin iclasının da bu məsələyə həsr edildiyini, təhsil sahəsində 2007-ci ildə görülmüş işləri və 2008-ci ildə qarşıda duran vəzifələri müzakirə etmək üçün yığışdıqlarını söylədi.

Sonra təhsil naziri Misir Mərdanov müzakirə olunan məsələ barədə geniş məruzə-təqdimatla çıxış etdi. Proyektor vasitəsi ilə ekranda nümayiş etdirilən və nazirin şərhi ilə müşayiət olunan məruzə-təqdimatda ötən il təhsil sahəsində görülmüş işlər, əldə olunmuş uğurlar, mövcud problemlər və qarşıda duran vəzifələr geniş faktik material və fotogörüntülərlə əyani şəkildə iclas iştirakçılarına çatdırıldı.

Nazir öncə iclas iştirakçılarının diqqətini ümummilli lider Heydər Əliyevin dediyi müdrik "Təhsil millətin gələcəyidir" kəlamına yönəldərək ölkəmizin bu günü üçün, iqtisadiyyatın bütün sahələrində, o cümlədən də təhsildə əldə olunmuş uğurlara görə, ilk növbədə, müstəqil Azərbaycan dövlətinin qurucusu və banisi Heydər Əliyevə borclu olduğumuzu bildirdi. Qeyd etdi ki, ötən bir il ərzində əsası ümummilli liderimiz Heydər Əliyev tərəfindən qoyulmuş siyasi və iqtisadi kurs möhtərəm Prezidentimiz cənab İlham Əliyev tərəfindən uğurla davam etdirilmiş, Azərbaycan dünyada siyasi cəhətdən ən stabil ölkələr sırasına çıxmış, iqtisadi inkişaf tempinə görə lider ölkəyə çevrilmiş, beləliklə, ölkəmizdə təhsilin inkişafı üçün hərtərəfli şərait yaradılmışdır.

Son 4 il ərzində möhtərəm Prezidentimiz İlham Əliyevin rəhbərliyi və təhsil sahəsində çalışanların birbaşa iştirakı ilə respublikanın təhsil sistemində davamlı inkişafa yönəlmiş əsaslı infrastruktur dəyişikliklərinin baş verdiyini, inkişafyönümlü proqram və layihələrin həyata keçirildiyini söyləyən nazir, bütün bunların dövlət başçısının təhsilə göstərdiyi müntəzəm diqqət və qayğı nəticəsində mümkün olduğunu vurğuladı.

Dövlət siyasətində təhsilin prioritet roluna toxunan Misir Mərdanov bunun əyani təzahuru kimi təhsilə ayrılan büdcə vəsaitinin, onun inkişafına yönəlmiş investisiya xərclərinin ilbəil artdığını qeyd edib, təhsilin maliyyələşdirilməsinin inkişaf dinamikasını göstərən cədvəlləri iclas iştirakçılarının diqqətinə çatdırdı. Bildirdi ki, 2003-cü ildə dövlətimizin büdcəsi 1,5 milyard ABŞ dolları olduğu halda, 2008-ci ildə o 12 milyard manata çatdırılmışdır. Bu illər ərzində büdcədən təhsilə ayrılan vəsait də yüksələn xətlə getmiş, 2003-cü ildəki 243,2 milyon manata qarşı 2008-ci ildə 974,0 milyon manat təşkil etmişdir.

Sonra nazir 2007-ci ilin ən mühüm hadisələri sırasında enerji təhlükəsizliyi sahəsində atılmış addımları, o cümlədən Bakı-Tbilisi-Ceyhan əsas ixrac neft boru kəmərinin tam gücü ilə işləməyə başlamasını, Bakı-Tbilisi-Ərzurum qaz kəməri çəkilişinin uğurla başa çatmasını, Bakı-Tbilisi-Qars dəmiryolu xəttinin tikintisi ilə bağlı prinsipial razılıq əldə olunduğunu xüsusi qeyd edərək bu layihələrin respublikamızı bütövlükdə Avropa məkanının enerji təhlükəsizliyi sisteminin əsas təminatçılarından birinə çevirdiyini vurğuladı.

Məruzə-təqdimatda ölkə Prezidentinin təhsilə qayğısının əyani təzahürü olan faktlara geniş yer verildi. Nazir qeyd etdi ki, ötən il ölkə Prezidenti təhsillə bağlı 28 sərəncam imzalamış, 18 tədbirdə iştirak etmiş, öz sərəncamları ilə 204 təhsil işçisini orden və medallarla, fəxri adlarla mükafatlandırmışdır.

Həmin hadisə və faktları əks etdirən slaydlar ekranda nümayiş olundu.

Nazir ölkə Prezidenti ilə yanaşı, Azərbaycanın birinci xanımı, millət vəkili, YUNESKO və İSESKO-nun xoşməramlı səfiri Mehriban Əliyevanın rəhbərliyi ilə Heydər Əliyev Fondunun təhsil sahəsində apardığı işləri, əldə olunmuş nəticələri də kollegiya iştirakçılarının diqqətinə çatdırdı.

Daha sonra təhsil sistemi haqqında statistik məlumatlar təqdim olundu. Hazırda ölkənin məktəbəqədər, ümumtəhsil, məktəbdənkənar, texniki peşə, orta ixtisas, ali təhsil və əlavə təhsil sistemlərində müəssisələrin,  təhsil alanların, təhsil verənlərin sayını göstərən cədvəllər nümayiş olundu. Nazir həmin cədvəllərdən bəzi rəqəmləri diqqətə çatdırdı. Qeyd etdi ki, hazırda ölkədə 1757 dövlət, 4 özəl uşaq bağçası var. Onlarda müvafiq olaraq 109269 və 175 uşaq ictimai tərbiyə ilə əhatə olunub. 4543 dövlət və 16 özəl ümumtəhsil məktəbində müvafiq olaraq 1.482.521 və 6287 şagird təhsil alır. Onların təlim-tərbiyəsi ilə 160360 (159.303 dövlət məktəblərində, 1057 özəl məktəblərdə) müəllim məşğul olur. ölkədə 107 texniki peşə təhsili müəssisəsi mövcuddur. Onlardan 47-si peşə liseyi, 60-ı peşə məktəbidir. Ali təhsil sistemində 35 dövlət, 14 özəl ali məktəb fəaliyyət göstərir. Təhsil sistemində bu gün 1145 elmlər doktoru, 5152 nəfər isə elmlər namizədi çalışır.

Nazir onu da xüsusi vurğuladı ki, Azərbaycan Respublikasının təhsil sistemi 2.145.289 təhsil alan, 213355 təhsil verən və 104144 yardımçı heyətlə 2008-ci ilə qədəm qoymuşdur.

2007-ci ildə təhsil sahəsində həyata keçirilən proqramlar haqqında da iclas iştirakçılarına məlumat verildi.

Məruzə-təqdimatda müasir dövrdə təhsilin inkişafının əsas amilləri haqqında da geniş məlumat öz əksini tapmışdı. Nazir müəyyənləşdirilmiş həmin amilləri aşağıdakı kimi sıraladıqlarını bildirdi:

1.Təhsilə ictimai dəstək.

2.Əlverişli təlim və inkişaf mühitinin yaradılması.

3.Təhsilin məzmunu.

4.Yeni qiymətləndirmə sisteminin tətbiqi.

5.Təhsildə müəllim amili və müasir təlim texnologiyalarından istifadə.

6.Təhsil sisteminin informasiyalaşdırılması.

7.Elmi tədqiqatlar və təhsilin inkişafı.

8.İdarəetmə sisteminin təkmilləşdirilməsi.

9.Beynəlxalq əlaqələr.

10.İslahatların davamlı olaraq aparılması.

Nazir bu amillərin hər biri üzərində ətraflı dayandı. Birinci amildən söz açan Misir Mərdanov bildirdi ki, təhsili inkişaf etdirmək üçün öncə təhsilə ictimai dəstək lazımdır. Belə ki, ictimaiyyətin fəal köməyi, təhsil proseslərində iştirakı olmadan təkcə müəllimlərin, məktəblərin, təhsil işçilərinin gücü ilə təhsili inkişaf etdirmək qeyri-mümkündür. Misir müəllim təhsilə ictimai dəstəyin təmin olunması üçün bir sıra tədbirlərin həyata keçirilməsini zəruri saydı. Qeyd etdi ki, bunun üçün təhsil sahəsində maarifləndirməyə üstünlük verilməlidir, ictimaiyyət təhsilin əhəmiyyəti, onun ölkədə prioritet rol oynaması, təhsil sahəsində atılan addımlar, əldə olunan uğurlar barədə müntəzəm məlumatlandırılmalıdır. KİV-lə əlaqələr genişlənməli, yerli və beynəlxalq qeyri-hökumət təşkilatları ilə əməkdaşlığın daha səmərəli formalarından istifadə edilməlidir. Nazirliyin İnternet səhifəsinin mütəmadi olaraq yeniləşdirilməsini, gələcəkdə bütün təhsil müəssisələrində İnternet səhifələrinin olmasını, pedaqoji mətbuatın rolunun artırılmasını, xüsusən də son vaxtlar ölkə ictimaiyyəti tərəfindən maraqla qarşılanan "Azərbaycan müəllimi" qəzetinin fəaliyyətinin daha da genişləndirilməsini, onun təhsil alanlar və valideynlər üçün də maraqlı olmasını təmin etməyi və s. bu kimi məsələləri də nazir təhsilə ictimai dəstəyi gücləndirmək üçün atılacaq addımlardan hesab etdi.

Təhsildə valideynlərin həlledici rolu olduğunu vurğulayan nazir təhsilin inkişafına təsir edən əsas amillərin əhəmiyyətlilik ardıcıllığında - ailə, mühit, informasiya, məktəb-ailənin birinci yerdə durduğunu qeyd edib bu baxımdan valideynlərlə işə ciddi yanaşmağı tövsiyə etdi. Bildirdi ki, dünyanın aparıcı ölkələrində valideynlər məktəbin idarə olunmasında, kadrlarla təminatında və digər məsələlərdə yaxından iştirak edirlər.

Misir Mərdanov 3 pilot rayonunda fəaliyyət göstərən valideyn şuraları təcrübəsinin bütün məktəblərdə tətbiq olunmasını, YUNİSEF-in yaxından dəstəyi ilə yaradılmış Valideyn-Müəllim Assosiasiyası şəbəkəsinin genişləndirilməsini zəruri saydı.

Müasir dövrdə təhsilin inkişafına təsir göstərən əsas amillərdən birinin əlverişli təlim mühitinin yaradılması olduğunu bildirən nazir, bu istiqamətdə ötən il təhsilin bütün pillələrində görülmüş işləri, mövcud problemləri və qarşıda duran vəzifələri də məruzə-təqdimatında kollegiya iştirakçılarının diqqətinə çatdırdı. öncə məktəbəqədər təhsil sahəsində görülmüş işlərə toxunan nazir ölkə Prezidenti tərəfindən 2007-2010-cu illəri əhatə edən "Məktəbəqədər təhsilin yeniləşdirilməsi Proqramı"nın təsdiq edildiyini, son 20 ildə ilk dəfə olaraq Bakı şəhərində 11 yeni uşaq bağçasının tikildiyini, bu işin cari ildə də davam etdiriləcəyini, 2008-ci ildə 22 uşaq bağçasının əsaslı təmiri və müasir avadanlıqlarla təmin edilməsinin, yaxın gələcəkdə dünya təcrübəsinə uyğun olaraq 5 yaşlı uşaqların icbari məktəbəqədər təhsilə cəlbi üzrə tədbirlərin həyata keçirilməsinin nəzərdə tutulduğunu söylədi. Ekranda ötən il istifadəyə verilmiş bağçalardan fotogörüntülər nümayiş olundu.

ümumi orta təhsil sahəsində əlverişli təlim mühitinin yaradılması haqqında da ətraflı məlumat verən nazir son illərdə Azərbaycanda heç bir zaman olmayan addım atıldığını, ölkə Prezidentinin rəhbərliyi ilə 254.126 şagird yerlik 1217 yeni məktəb və əlavə korpuslar tikildiyini, ötən il 200 yeni məktəbin istifadəyə verildiyini, məktəb tikintisi sahəsində Heydər Əliyev Fondunun da böyük xidmətləri olduğunu faktlarla, əyani görüntülərlə iclas iştirakçılarının nəzərinə çatdırdı.

Kollegiyada 2008-ci il üzrə investisiya proqramında 122 yeni məktəb binasının, 34 məktəb üçün əlavə korpusların inşasının, 80 məktəbin əsaslı təmirinin, 21 məktəbəqədər təhsil müəssisəsinin, 7 texniki peşə məktəbinin əsaslı təmiri və avadanlıqla təminatının, 3 rayon təhsil şöbəsi üçün inzibati binanın tikintisinin nəzərdə tutulduğu qeyd olundu.

Məruzə-təqdimatda ümumtəhsil məktəblərinin avadanlıqla təchizi, xüsusi qayğıya ehtiyacı olan uşaqların təhsili ilə əlaqədar proqrama (2005-2009-cu illər) əsasən, De-institutlaşdırma Proqramı (2006-2015-ci illər) çərçivəsində görülmüş və görülməsi nəzərdə tutulan işlər haqqında da söhbət getdi, həmin işlərin miqyasını və həcmini əks etdirən faktlar gətirildi.

Təhsilin digər sahələrində, o cümlədən texniki peşə təhsilində, ali təhsildə əlverişli təlim mühiti yaratmaq istiqamətində həyata keçirilmiş işlər, xüsusən də maddi-texniki bazanın möhkəmləndirilməsi sahəsində atılan addımlar barədə də kollegiya iştirakçılarına ətraflı məlumat verildi.

Müasir dövrdə təhsilin inkişafının əsas amillərindən biri olan təhsilin məzmunu ilə bağlı görülmüş və görüləcək işlər barədə danışan təhsil naziri Misir Mərdanov bildirdi ki, məktəbəqədər təhsil sahəsində yeni kurrikulumun, təlim vəsaitlərin hazırlanması, şəxsiyyətyönümlu təlim yanaşmasının tətbiq edilməsi nəzərdə tutulmuşdur.

ümumi orta təhsil sistemində kurrikulum islahatları uğurla davam edir. Hökumət tərəfindən təsdiq olunmuş "Azərbaycan Respublikasında ümumi təhsilin Milli Kurrikulumu" konseptual sənədi əsasında fənn kurrikulumları hazırlanır, ibtidai təhsil pilləsi üçün yeni fənn kurrikulumları ötən il təsdiq olunmuşdur. 2008-2009-cu dərs ilindən bütün məktəblərin ibtidai siniflərində yeni kurrikulumla tədrisə başlanacaq. Nazir yeni Milli Kurrikulum sənədinə əsasən orta məktəblərdə xarici dil, informatika fənlərinin birinci siniflərdən tədris olunacağını, fizika və kimyanın tədrisinə bir il tez başlanacağını və s. məsələləri də kollegiya iştirakçılarının nəzərinə çatdırdı. Məlumat verdi ki, 2007-ci ildə dövlətin büdcəsindən ayrılmış vəsaitin hesabına 156 adda 5.188.800 nüsxə dərslik çap edilib məktəblərə vaxtında çatdırılmışdır. 2008-ci ildə isə 81 adda 4.204.900 nüsxə dərslik çap olunacaq.

Dərslik siyasətində yenilik olduğunu bildirən Misir müəllim nazirliyə tabe olmayan yeni bir qurum - Dərslikləri Qiymətləndirmə Şurası yaradıldığını, dərsliklərin qiymətləndirilməsinin bu ildən başlayaraq həmin Şura tərəfindən həyata keçiriləcəyini söylədi. Nazir, eyni zamanda bu sahədə problemlərin də mövcud olduğunu bildirərək onların bir çoxu ilə kollegiya iştirakçılarını tanış etdi, onların aradan qaldırılması üçün ilbəil iş aparıldığını dedi.

Nazir ali təhsil sistemində məzmunla bağlı görülmüş işlərdən də danışdı. Bildirdi ki, Boloniya prosesinə qoşulmuşuq, çox ciddi islahatlar həyata keçirilir, ancaq problemlər də çoxdur. Məlumat verdi ki, artıq bir neçə aydır cənab Prezidentin tapşırığı ilə ali təhsilin bakalavr pilləsində ixtisasların yeni siyahısının tərtib olunması ilə bağlı ciddi iş aparılır. Qərara alınıb ki, bakalavr sistemində indiyədək həddən artıq çox olan ixtisasların sayı azaldılaraq 146-ya endirilsin.

Həmin ixtisasların 80-nin hazırda mövcud olan, yerdə qalanının isə yeni ixtisaslar olduğunu söyləyən Misir müəllim yeni ixtisaslar üçün standartların, dərslik və proqramların hazırlanması üzərində müvafiq iş aparılacağını bildirdi.

Daha sonra məruzə-təqdimatda müasir dövrdə təhsilin inkişafının 4-cü amili - təhsildə müəllim amili və müasir təlim texnologiyalarından  istifadə  üzərində  dayanıldı.

Yaxşı müəllim olmadan təhsili inkişaf etdirməyin çətin olduğunu söyləyən nazir bu baxımdan Azərbaycan Respublikası Prezidentinin 2007-ci ilin 4 sentyabrında imzaladığı sərəncamı kollegiya iştirakçılarının diqqətinə çatdırdı. Dedi ki, həmin sərəncama görə biz il ərzində 50 məktəb və 100 ən yaxşı müəllim müəyyənləşdirib cənab Prezidentə təqdim etməliyik və Prezident ilin sonunda həmin məktəbləri və müəllimləri mükafatlandırmalıdır. Bununla əlaqədar nazir əsasnamənin artıq hazırlandığını, təşkilat komitəsi yaradıldığını bildirdi.

Nazir ümumtəhsil məktəblərinin pedaqoji kadrlarla təminatı ilə əlaqədar təsdiq olunmuş Proqram üzrə iş aparıldığını, bu sahədə problemlərin yaxın zamanda öz həllini tapacağını diqqətə çatdırdı.

Kollegiya iştirakçılarına təqdim olunan hesabat məruzəsində müasir dövrdə təhsilin inkişafına ciddi təsir göstərən yeni qiymətləndirmə sistemi barədə də söz açıldı. Nazir təhsil alanların biliyinin qiymətləndirilməsinə təhsil sahəsində aparılan islahatlarda xüsusi önəm verildiyini bildirib, bu sahədə görülmüş işlər, yeni qiymətləndirmə sisteminin tətbiqi ilə keçirilmiş mərkəzləşdirilmiş buraxılış imtahanları, 2007-ci il noyabrın 25-də aparılmış birinci sınaq yoxlama imtahanları, onların nəticələri barədə kollegiya iştirakçılarına geniş məlumat verdi, ötən il ölkənin ali məktəblərinə keçirilmiş qəbul imtahanlarının nəticələrinin əvvəlki illə müqayisəli təhlilini apardı, bu sahədə özünü göstərən irəliləyişləri diqqətə çatdırdı. Nazir yeni qiymətləndirmə sisteminin təhsilin digər sahələrində tətbiqini də zəruri saydı.

Məruzə-təqdimatında təhsil sisteminin informasiyalaşdırılması məsələsinə toxunan təhsil naziri İKT-nin inkişaf səviyyəsinin ölkənin intellektual və elmi potensialının, yüksək səviyyəli idarəetmənin, sosial-iqtisadi inkişafın və yoxsulluğun azaldılmasının vacib göstəricilərindən biri sayıldığını, təhsil sahəsinin informasiyalaşdırılmasının zamanın, müasir inkişafın tələbindən irəli gəldiyini söylədi, təhsil sisteminə İKT-nin inteqrasiyasının əsas tətbiq istiqamətləri, ümumtəhsil məktəblərinin İKT ilə təminatı Proqramının (2005-2007-ci illər) həyata keçirilməsi sahəsində əldə olunan uğurları faktlar və rəqəmlərlə iclas iştirakçılarının diqqətinə çatdırdı. Bildirdi ki, 2007-ci ildə respublikanın rayonlarının 2519 ümumtəhsil məktəbinin İKT avadanlığı ilə təmin edilməsi başa çatdırılmış, o cümlədən 666 məktəbə noutbuk və proyektor verilmiş, 4000 müəllim treninqlərdən keçmişdir. Beləliklə, üçillik Proqram uğurla həyata keçirilmiş, V-XI siniflərdə hər 29 şagirdə 1 kompüter nisbəti təmin edilmişdir.

Təhsil nazirinin slaydlarla təqdim etdiyi məruzədə müasir dövrdə təhsilin inkişafının əsas amillərindən sayılan elmi tədqiqatlar və təhsilin inkişafı, idarəetmənin təkmilləşdirilməsi, beynəlxalq əlaqələr, təhsil islahatlarının davamlı olaraq aparılmasından da ətraflı söz açıldı və bu istiqamətlərdə görülmüş işlər geniş təhlil olundu, görüləsi işlər xatırladıldı, problemlər, onların həlli yolları barədə fikir və mülahizələr bildirildi.

Nazir qeyd etdi ki, son bir il ərzində ali məktəb alimləri tərəfindən aparılmış 80 elmi-tədqiqat işinin nəticələri AMEA-nın son hesabatında uğurlu nailiyyətlər kimi qiymətləndirilmişdir. İdarəetmənin təkmilləşdirilməsi sahəsində atılmış mühüm addım - Bakıda rayon təhsil şöbələri ləğv edilməklə Təhsil Nazirliyinin birbaşa tabeliyində Bakı Şəhəri üzrə Təhsil İdarəsinin yaradılması ilə təhsil müəssisələrinə əsassız müdaxilələr azalmış, çevik idarəetmə nəticəsində son 1 il ərzində Bakı şəhərinin ümumtəhsil məktəblərinin keyfiyyət göstəriciləri artmışdır.

Azərbaycan Respublikasının Prezidenti cənab İlham Əliyevin cari ilin aprelində imzaladığı sərəncamla "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nı təsdiq etməsi ölkəmizin təhsil sahəsində beynəlxalq əlaqələrinin daha da genişlənməsinə hərtərəfli imkanlar açmışdır. Proqram çərçivəsində 45 nəfər ABŞ, Fransa, Böyük Britaniya, Rusiya, İsveç və Niderlandın aparıcı universitetlərinə göndərilmişdir.

çıxışının sonunda kollegiya materiallarında təhsil sektorunun ayrı-ayrı sahələri üzrə 2008-ci ildə qarşıda duran vəzifələrin müəyyənləşdirildiyini və kollegiya qərarında öz əksini tapacağını bildirən Misir Mərdanov bütün təhsili idarəetmə orqanları və təhsil müəssisələrinə 2008-ci il üçün fəaliyyət planlarında həmin vəzifələri nəzərə almalarını və həyata keçirilməsini təmin etmələrini tövsiyə etdi.

Sonra məruzə ətrafında müzakirələr oldu.

Millət vəkili Fəttah Heydərov belə əhəmiyyətli bir iclasa dəvət olunduğu üçün təşəkkürünü bildirdi. Son dövrlərdə dünyanın bir çox ölkələrində müxtəlif inqilabların baş verdiyini deyən millət vəkili təhsil naziri Misir Mərdanovun əhatəli və məzmunlu məruzəsini dinlədikdən sonra Azərbaycanda məhz təhsil sahəsində inqilabi iş getdiyi qənaətinə gəldiyini dedi. F.Heydərov qeyd etdi ki, bu gün ölkə başçısı cənab İlham Əliyevin rəhbərliyi altında ictimai həyatın bütün  sahələrinin inkişafı istiqamətində mühüm addımlar atılır. Amma dövlət başçısının və Heydər Əliyev Fondunun prezidenti, millət vəkili Mehriban Əliyevanın təhsilə diqqət və qayğısı daha artıq nəzərə çarpır və bu sahə, demək olar ki, yenidən qurulur. Gələcək nəslin yüksək həyat səviyyəsinin məhz təhsilin inkişafından asılı olduğunu vurğulayan natiq ilk əmək fəaliyyətinə adi müəllim kimi başlamış bir şəxs kimi bu qayğını yüksək dəyərləndirdiyini bildirdi.

Bakı Dövlət Universitetinin rektoru, millət vəkili Abel Məhərrəmov öz çıxışında Prezident İlham Əliyevin dəfələrlə qeyd etdiyi "ölkənin iqtisadi potensialını intellekt potensialına çevirməliyik" fikrini xatırladaraq son zamanlar təhsillə bağlı imzalanan sərəncamların bu məqsədə xidmət etdiyini dedi. Qürur hissi ilə demək olar ki, bu gün Azərbaycanda təhsilin inkişaf səviyyəsi nəinki MDB dövlətləri, eyni zamanda dünyanın aparıcı ölkələri ilə müqayisə oluna bilər.

A.Məhərrəmov məruzədə səslənən 977 ümumtəhsil məktəbinin məzunlarının ali məktəbə qəbul olmaması faktının onu daha çox düşündürdüyünü bildirdi. Digər tərəfdən, tələbə adını qazana bilməyən gənclərin də sonrakı fəaliyyəti haqqında fikirləşmək lazımdır. Bundan başqa, əgər müzakirə olunan Təhsil Qanununda nəzərdə tutulduğu kimi, 9 illik icbari təhsilə keçilsə, məktəbdən uzaqlaşan yeniyetmələrin taleyi necə olacaq? Onun sözlərinə görə, peşə məktəblərinin özünü hələ tam doğrultmadığı bir vaxtda bu məsələyə çox ehtiyatla yanaşmaq lazımdır.

Daha sonra BDU-nun rektoru ali məktəbdə də elmin və təhsilin inkişafı istiqamətində Proqramların qəbul edilməsi haqqında arzusunu diqqətə çatdırdı. O, bu hesabatı çox yüksək qiymətləndirdiyini bildirərək daha da irəliyə getməyin vacib olduğunu dedi və bu yolda hamıya uğurlar arzuladı.

Azərbaycan Dövlət İqtisad Universitetinin rektoru, millət vəkili Şəmsəddin Hacıyev çox mükəmməl, təhsilin bütün sahələrinə aid lazımi informasiyaların əks olunduğu bir çıxışa görə təhsil naziri Misir Mərdanova təşəkkür etdi. 

Bu gün təhsildə ən prioritet məsələlər, həyata keçirilən proqramlar, dünya təhsil sisteminə inteqrasiya istiqamətində atılan mühüm addımlar, tikilən yeni təhsil müəssisələri haqqında çox dolğun məlumatların səsləndiyini deyən millət vəkili təqdim olunan məruzədə diqqəti ən çox cəlb edən cəhət kimi bütün pillələrə aid analitik təhlilin verilməsini göstərdi.

Adətən, müəyyən məsələlər, o cümlədən təhsil sahəsi ilə bağlı lazımi informasiyaların verilmədiyini, bunun nəticəsində görülən işlərin cəmiyyətə təhrif olunmuş formada çatdırıldığını deyən natiq bu materialın bütövlükdə mətbuatda dərc olunmasının və ya ayrıca kitabça şəklində hazırlanmasının məqsədəuyğunluğu haqqında fikrini bildirdi.

Naxçıvan Dövlət Universitetinin rektoru İsa Həbibbəyli öz çıxışında qeyd etdi ki, dinlənilən məruzə təhsil islahatları Proqramının həyata keçirilməsi istiqamətində görülən işlərin nəticəsini bütün reallığı ilə əks etdirə bildi. İ.Həbibbəyliyə görə, bu hesabat 2007-ci ildə görülən işlərin deyil, eyni zamanla bu ilə qədər qəbul edilmiş qərarların, imzalanmış sərəncamların və reallaşdırılan proqramların məntiqi yekunudur. Əldə olunmuş nailiyyətlər ümummilli lider Heydər Əliyevin təhsil sahəsində müəyyən etdiyi siyasi kursun təntənəsi, eyni zamanda Azərbaycan Respublikasının Prezidenti cənab İlham Əliyevin rəhbərliyi altında Təhsil Nazirliyinin və ölkənin bütün təhsil  ictimaiyyətinin fədakar əməyinin nəticəsidir. İ.Həbibbəyli məruzədə təkcə uğurlardan bəhs edilmədiyini, təhsil sahəsinin müxtəlif pillələrində mövcud olan problemlərdən də söz açıldığını təqdirəlayiq hal kimi qiymətləndirdi.

Sonra çıxış üçün söz alan Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyevin sözlərinə görə, hər bir müəllim sinif otağına girəndə ən böyük vəzifə borsunun xalqın balalarına elm və bilik öyrətmək olduğunu xatırlamalıdır. çünki gələcək nəsil nə qədər savadlı, yüksək intellektə malik şəxsiyyət kimi yetişərsə, ölkənin istisadiyyatı, elmi, mədəniyyəti, dövlət quruculuğu da o qədər zəngin və möhkəm olar. S.Mehbalıyev təmsil etdiyi təşkilatın da, öz növbəsində, daim müəllimlərin sosial vəziyyətini yaxşılaşdırmağa, onların problemlərini həll etməyə çalışdığını bildirdi. O, məlumat verdi ki, keçən il yay tətili günlərində 90 nəfər təhsil işçisi Antalyada istirahət edib. Bu il isə Türkiyəyə daha çox sayda müəllimin göndərilməsi nəzərdə tutulub. Bundan başqa, İsmayıllı rayonunda yerləşən 2 hektar ərazinin mədəni istirahət zonası kimi abadlaşdırılması və burada müəllimlərin öz asudə vaxtlarını səmərəli keçirmələri üçün hər cür şəraitin yaradılması planlaşdırılıb.

Hicran ƏKBƏROVA,

Yusif ƏLİYEV