Təhsildə son yeniliklər

* Yeni dərs ilinin əvvəlinədək Bakı, Sumqayıt və Abşeronda yerləşən orta ümumtəhsil məktəblərinin geniş zolaqlı sürətli İnternetlə təmin olunması nəzərdə tutulub.

* Bu ilin aprel, may aylarınadək Bakı və Abşeronda yerləşən 5 pilot orta ümumtəhsil məktəbində "Elektron məktəb" layihəsinin başa çatdırılması planlaşdırılır.

* Dərs ilinin sonunadək Bakı və Sumqayıtdakı orta ümumtəhsil məktəbləri direktorlarının İKT sahəsində minimum bilik və bacarıqlara yiyələnməsi məqsədilə Bakı Pedaqoji Kadrların İxtisasartırma İnstitutunda müvafiq kurslardan keçməsi nəzərdə tutulub.

* Yeni dərs ilindən ölkənin bütün orta ümumtəhsil məktəblərində I siniflərdə yeni kurrikulumlar əsasında tədrisə başlanacaq. Dərslik, müəllimlər üçün dərs vəsaiti və şagirdlər üçün iş dəftəri bu kurrikuluma uyğun hazırlanacaq. 9000 müəllim yeni kurrikulumla iş üzrə təlim kurslarından keçiriləcək. Artıq 400 müəllim öyrədən kimi Azərbaycan Müəllimlər İnstitutunda hazırlanıb və onlar ölkəmizin bütün bölgələrini əhatə etməklə müəllimləri öyrədəcək. öyrədilmiş müdavimlər digər müəllimlərə cari ilin iyunundan başlayaraq öyrədici təlim kursları keçəcəklər.

* Növbəti tədris ilindən müəllimlərin işə qəbulu sahəsində dünya təcrübəsində tətbiq edilən yeni mexanizmə keçiriləcək. Belə ki, işə qəbul mərkəzləşdirilmiş qaydada, yalnız məktəblərin zəruri ehtiyacı əsasında müsabiqə yolu ilə həyata keçiriləcək.

* 2008-ci ildə ölkə üzrə 122 yeni məktəbin, 34 məktəb üçün əlavə korpusun inşası, 80 məktəb, 21 məktəbəqədər təhsil müəssisəsi və 7 texniki peşə məktəbinin əsaslı təmiri nəzərdə tutulub. Eyni zamanda cari ildə əsaslı təmir olunacaq məktəbəqədər təhsil və texniki peşə məktəblərinin avadanlıqlarla təminatı da planlaşdırılıb. 3 rayon təhsil şöbəsi üçün inzibati binanın tikintisi, habelə 300 məktəbin müasir avadanlıqlarla təmin olunması nəzərdə tutulub.

* ötən il Dövlət Proqramına uyğun olaraq 1308 nəfər stimullaşdırıcı tədbirlər tətbiq edilməklə ucqar bölgələrə göndərilib.