Təhsil Nazirliyinin məlumatı

Azərbaycan Respublikası Prezidentinin sərəncamına əsasən "İlin ən yaxşı ümumtəhsil məktəbi və ən yaxşı müəllimi" müsabiqəsinin keçirilməsi məqsədilə Təhsil Nazirliyində Təşkilat Komitəsi yaradılmışdır. Təşkilat Komitəsinin tərkibinə Təhsil Nazirliyinin əməkdaşları, yerli və beynəlxalq qeyri-hökumət təşkilatlarının nümayəndələri daxil edilmişdir. Hər iki müsabiqənin keçirilməsi qaydaları  hazırlanıb hökumətə təqdim olunmuşdur.

Məlumat üçün bildiririk ki, "İlin ən yaxşı ümumtəhsil məktəbi" müsabiqəsində məktəbin ən mühüm nailiyyətləri, kadr potensialı, maddi-texniki bazasının vəziyyəti, ali məktəblərə qəbulun nəticələri, habelə digər bu kimi meyarların əsas götürülməsi nəzərdə tutulur. "İlin ən yaxşı müəllimi" müsabiqəsində isə, ilk növbədə, müəllimin kompüter və müasir təlim texnologiyalarından istifadə bacarıqlarına, şagirdlərinin yüksək göstəricilərə malik olmasına üstünlük veriləcək.

Hər iki müsabiqənin 3 mərhələdə keçirilməsi planlaşdırılır. İlkin mərhələdə müraciət edən namizədlərin seçimi müəyyənləşdirilmiş meyarlar əsasında aparılacaq. "İlin ən yaxşı müəllimi" müsabiqəsi üzrə II mərhələdə  müəllimin dərsinin dinlənilməsi, sonuncu mərhələdə isə fəaliyyəti barədə 10-15 dəqiqəlik təqdimatı nəzərdə tutulur. "İlin ən yaxşı ümumtəhsil məktəbi" üzrə müvafiq meyarlara cavab verən və  I mərhələdən keçən məktəblərdə daha sonra şagirdlər arasında əsas fənlər üzrə test yoxlamalarının aparılması, Təşkilat Komitəsi qarşısında məktəblərin gördüyü işlər, qazandığı nailiyyətlərlə bağlı təqdimatı planlaşdırılır.

Onu da qeyd edək ki, hər iki müsabiqə ilə bağlı kvotalar zonalar üzrə müəyyənləşdirilib.