Dərs ili yeniliklərlə yaddaqalan oldu

Artıq 2007-2008-ci dərs ili başa çatmaq üzrədir. Bu dərs ili bir sıra əlamətdar hadisələrlə zəngin olmuşdur. Bütün xalqımızla birlikdə təhsil işçiləri ümummilli liderimiz, müasir Azərbaycan Respublikasının qurucusu Heydər Əliyevin anadan olmasının 85 və Şərqdə ilk demokratik respublika olan Azərbaycan Xalq Cümhuriyyətinin 90 illik yubileylərini təntənə ilə qeyd etdilər. ölkəmizin bütün təhsil müəssisələrində rəngarəng tədbirlər - səhnəciklər, inşa yazılar, sərgilər, yarışlar, görüşlər, ekskursiyalar və s. keçirilmiş, Heydər Əliyev irsinin və Cümhuriyyət tarixinin öyrənilməsi istiqamətində, uşaqların, gənclərin vətənpərvərlik ruhunda tərbiyə edilməsi sahəsində çox dəyərli işlər görülmüşdür.

Başa vurduğumuz dərs ili ərəfəsində dövlətimizin başçısı cənab İlham Əliyevin imzaladığı "Ən yaxşı ümumtəhsil məktəbi və ən yaxşı müəllim mükafatlarının təsis edilməsi haqqında" sərəncam pedaqoji kollektivlərdə böyük canlanma və ruh yüksəkliyinə səbəb olmuşdur. Müsabiqələrin təşkili və keçirilməsi ilə bağlı lazımi tədbirlər görülmüş, hazırda yekun mərhələ həyata keçirilməkdədir.

2007-2008-ci dərs ilində 1,5 milyon şagirdi əhatə edən 4543 ümumtəhsil məktəbi fəaliyyət göstərmişdir. Bunlardan 207-də tədris yeni binalarda başlamışdır. Yola saldığımız dərs ilində təhsil sahəsində aparılan islahatlar davam etdirilmiş, 2008-2009-cu dərs ili üçün möhkəm zəmin yaradılmışdır.

ümumi orta təhsilin yeni məzmunu - kurrikulumu yeni dərs ilindən I siniflərdə tətbiq ediləcəkdir. Bu məqsədlə yeni dərsliklər və dərs vəsaitləri hazırlanıb, I siniflərdə dərs deyəcək 6 minə yaxın müəllim müvafiq treninqlərdən keçəcək.

Orta təhsil üzrə mərkəzləşdirilmiş qaydada, cavab kartları tətbiq edilməklə test üsulu ilə keçiriləcək buraxılış imtahanlarına hazırlıq davam etdirilmiş, dərs ili ərzində nazirlik tərəfindən üç dəfə sınaq yoxlamaları aparılmış və hər dəfə nəticələr müzakirə edilmişdir. Bu il nazirlik 9 regionda, 5 şəhər, 4 rayonda 52 minə yaxın XI sinif şagirdini əhatə etməklə mərkəzləşdirilmiş qaydada buraxılış imtahanı keçirəcəkdir.

Məktəblərimizin, xüsusilə ucqar kənd rayonlarındakı məktəblərin pedaqoji kadrlarla təminatı diqqət mərkəzində saxlanılıb və 4 minə yaxın müxtəlif ixtisaslar üzrə müəllim yerlərə göndərilmişdir.

Bütün məktəblər dərsliklər və dərs vəsaitləri ilə vaxtında təmin edilmiş, məktəblərdə yaradılmış dərslik fondu möhkəmləndirilmiş, dövlət başçısının məlum sərəncamı ilə latın qrafikalı Azərbaycan əlifbasında çap edilən, məktəblərə pulsuz verilən Azərbaycan və dünya klassik ədəbiyyatı nümunələri hesabına daha da zənginləşdirilmişdir.

Cari dərs ilində məktəblərin tikintisi, əsaslı təmiri və avadanlıqlarla təchizi və kompüterləşdirilməsi üçün yeni Dövlət proqramları layihələri hazırlanıb hökumətə təqdim edilmişdir. Onların təsdiqi və tətbiqi məktəblərimizin maddi-tədris bazasını daha da möhkəmləndirəcəkdir.

Əvvəlki dərs ilində olduğu kimi, bu dərs ilində də yalnız ümumi təhsil sahəsi üzrə müxtəlif məsələlərə dair 8 Dövlət proqramının həyata keçirilməsi davam etdirilmişdir.

Təhsil sahəsində aparılan islahat illərinin 9-cu dərs ilini başa vururuq. Bu illər ərzində aparılan gərgin işin nəticəsində ümumtəhsil məktəblərində tədrisin səviyyəsi xeyli yüksəlmişdir. Bunu sübut etmək üçün 2006 və 2007-ci illərdə məzunlarımızın ali məktəblərə qəbulunun nəticələrini müqayisə etmək kifayətdir.

Bu il 120 minə yaxın şagird XI sinfi, 155 mindən artıq şagird isə IX sinfi bitirir. Onların hər birinə cansağlığı, gələcək işlərində uğurlar, ölkəmizin layiqli vətəndaşı olmalarını arzu edirəm.

A.MURADOV,

Təhsil Nazirliyinin şöbə müdiri