Xüsusi istedada malik uşaqların yekun seçim turu keçirildi

Hazırda respublikamızda ölkə Prezidenti cənab İlham Əliyevin sərəncamı ilə təsdiq edilmiş "Xüsusi istedada malik uşaqların (gənclərin) yaradıcılıq potensialının inkişafı üzrə Dövlət Proqramı (2006-2010-cu illər)"na uyğun olaraq əhəmiyyətli tədbirlər həyata keçirilir. Belə məqsədyönlü tədbirlərdən biri də ayrı-ayrı fənlər üzrə  fitri bacarıq və qabiliyyətə malik şagirdlərin aşkar edilməsi istiqamətində görülən  işlərdir.

Bu məqsədlə Təhsil Nazirliyində respublikanın bütün şəhər və rayonları üzrə riyaziyyat, fizika, kimya, biologiya və informatika fənlərindən istedadı ilə fərqlənən VIII-X sinif şagirdlərinin adlı siyahısından ibarət məlumat bankı yaradılıb. Dövlət Proqramının icrası ilə əlaqədar nazirliyin 2006-2010-cu illər üçün Fəaliyyət Planının müvafiq bəndində istedadlı şagirdlərin Bakı şəhərində təkrar seçiminin aparılması və ən istedadlılarının dəqiqləşdirilməsi nəzərdə tutulmuş və bununla bağlı göstərilən fənlər üzrə respublika fənn olimpiadalarını keçirən münsiflər heyətlərinin sədrləri tərəfindən müvafiq test və suallar hazırlanmışdır.

Mayın 27-də "Ankara məktəbi" məktəb-liseyində biologiya və riyaziyyat fənləri üzrə xüsusi qabiliyyəti ilə fərqlənən şagirdlərin ən istedadlılarının yekun seçim turu keçirildi. Verilən məlumata görə, biologiya fənni üzrə yekun turunda iştirak etmək hüququ qazanmış 221 məktəblidən 35-i VIII, 89-u IX, 97-si isə X sinif şagirdidir. Riyaziyyat fənni üzrə bilik yarışının son mərhələsinə vəsiqə qazanan 330 nəfərdən 91-i VIII, 112-si IX və 127-si X sinifdə oxuyur.

Azərbaycan Respublikasının təhsil naziri Misir Mərdanov günün birinci və ikinci yarısında təşkil edilən hər iki tədbirdə iştirak etdi. Təhsil naziri öncə istedadlılar kimi seçilmiş uşaqları təbrik etdi və onlara xüsusi istedada malik uşaqların yaradıcılıq potensialının inkişafı üzrə reallaşdırılan Dövlət Proqramı  haqqında məlumat verdi. O, proqramın həyata keçirilməsində əsas məqsədin respublikanın ümumtəhsil müəssisələrində mövcud olan istedad potensialını vaxtında müəyyənləşdirmək, istedadlı uşaq və gənclərin inkişafına dövlət qayğısını gücləndirməkdən ibarət olduğunu deyərək bu istiqamətdə görülmüş mühüm işlərdən bəhs etdi.

Təhsil naziri yekun seçim turunun iştirakçılarının diqqətinə çatdırdı ki, onlar 3 saat ərzində müvafiq siniflər üzrə hazırlanmış test tapşırıqlarını yerinə yetirərək öz bilik və bacarıqlarını nümayiş etdirməyə çalışmalıdırlar. Sonra bu işlər münsiflər heyətləri tərəfindən qiymətləndirilərək ballar müəyyən ediləcək və nəticələr haqqında yerlərə məlumat veriləcək. Nazirin bildirdiyinə görə, ən istedadlı uşaqlar kimi seçilmiş şagirdlərin sonrakı fəaliyyəti üçün hər cür zəruri imkan və şərait yaradılacaq, onların inkişaf edib formalaşmasına, təhsilinə xüsusi diqqət yetiriləcək, ictimaiyyətin, o cümlədən beynəlxalq və qeyri-hökumət təşkilatlarının, xeyriyyəçilərin nəzəri bu vacib məsələyə daha çox yönələcək, bölgələrdə xüsusi istedad və qabiliyyətə malik uşaqlar üçün yeni tipli təhsil müəssisələri yaradılacaq, onların təhsilini daha səmərəli və məzmunlu qurmaq üçün yeni tədris plan və proqramları, dərslik və dərs vəsaitləri yaradılacaq, eyni zamanda xüsusi istedada malik uşaqların istirahəti üçün zəruri şəraitlə təmin olunmaları daim dövlətin diqqət mərkəzində saxlanılacaqdır. Misir Mərdanov burada iştirak edən şagirdlərin müstəqil Azərbaycan dövlətinin inkişafı üçün gərəkli vətəndaşlar kimi yetişəcəklərinə ümid etdiyini söyləyərək onlara bugünkü  bilik yarışında uğurlar arzuladı və istedadlı uşaqların seçilməsində əməyi olanlara, eləcə də yekun seçim turunun keçirilməsinə yaradılmış şəraitə görə "Ankara məktəbi" məktəb-liseyinin rəhbərliyinə təşəkkürünü bildirdi.

Tədbirin fəxri qonaqları - akademik Urxan Ələkbərov və AMEA-nın müxbir üzvü Yusif Məmmədov ölkənin inkişafında məhz insan amilinin mühüm rol oynadığını, bu mənada xüsusi istedada malik uşaqların vaxtında aşkar edilməsinin böyük əhəmiyyət kəsb etdiyini vurğuladılar və bütün iştirakçılara bilik yarışında uğurlar arzuladılar.

Mayın 27-də biologiya və riyaziyyat fənləri üzrə xüsusi istedadlı uşaqların yekun seçim turunda təhsil nazirinin müavini İsgəndər İsgəndərov, nazirliyin müvafiq  şöbələrinin rəhbərləri və əməkdaşları, Bakı Şəhəri üzrə Təhsil İdarəsinin rəhbərliyi, respublika fənn olimpiadalarının münsiflər heyətlərinin rəhbərləri, KİV nümayəndələri və başqaları iştirak edirdilər.

Mayın 29-da həmin təhsil müəssisəsində xüsusi istedada malik uşaqların fizika fənni üzrə yekun seçim turu keçirildi. Mayın 30-da isə kimya fənni üzrə turun keçirilməsi nəzərdə tutulub.

Hicran ƏKBƏROVA